દુનિયા પર ‘ડિજિટલ યુદ્ધ’નો ખતરો! ઈરાનની એક ધમકીથી અનેક દેશો થઈ શકે છે ‘ઓફલાઇન’, જાણો શું છે મામલો

ઈરાનની ગંભીર ચેતવણી: લાલ સમુદ્રના ઇન્ટરનેટ કેબલ કપાશે તો અડધી દુનિયા થઈ જશે ‘ઓફલાઇન’

ઈઝરાયલ, અમેરિકા અને ઈરાન વચ્ચે ચાલી રહેલા સંઘર્ષની જ્વાળાઓ હવે ડિજિટલ વિશ્વ સુધી પહોંચી છે. અત્યાર સુધી આ યુદ્ધ માત્ર મિસાઇલો અને ડ્રોન પૂરતું મર્યાદિત હતું, પરંતુ હવે ઈરાને લાલ સમુદ્ર (Red Sea) ના તળિયે પથરાયેલા ઇન્ટરનેટ ફાઇબર-ઓપ્ટિક કેબલ્સને નુકસાન પહોંચાડવાની ધમકી આપી છે. જો આ કેબલ્સ કાપવામાં આવે, તો ભારત સહિત એશિયા, યુરોપ અને મધ્ય પૂર્વના દેશોમાં ઇન્ટરનેટ સેવાઓ ઠપ્પ થઈ શકે છે.

શું છે આ નવો ખતરો?

મળતા અહેવાલો મુજબ, ઈરાને અખાતી દેશોને સ્પષ્ટ ચેતવણી આપી છે કે જો તેઓ અમેરિકન સૈન્ય દળોને આશ્રય આપવાનું ચાલુ રાખશે, તો લાલ સમુદ્રમાંથી પસાર થતા મહત્ત્વના ઇન્ટરનેટ કેબલ્સને નિશાન બનાવવામાં આવશે. લાલ સમુદ્ર એ વૈશ્વિક ઇન્ટરનેટ કનેક્ટિવિટી માટેની ‘લાઈફલાઈન’ ગણાય છે, કારણ કે દુનિયાનો અંદાજે 17% ઇન્ટરનેટ ટ્રાફિક આ વિસ્તારના સમુદ્ર તળિયે આવેલા કેબલ્સ દ્વારા સંચાલિત થાય છે.

ટેક જાયન્ટ્સ અને AI હબ પર જોખમ

આ ઇન્ટરનેટ કેબલ્સ માત્ર સામાન્ય બ્રાઉઝિંગ માટે નથી, પરંતુ તે સાઉદી અરેબિયા અને UAE માં આવેલા ગૂગલ, માઇક્રોસોફ્ટ અને એમેઝોન જેવા દિગ્ગજોના આર્ટિફિશિયલ ઇન્ટેલિજન્સ (AI) ડેટા સેન્ટર્સને કનેક્ટિવિટી પૂરી પાડે છે. જો આ નેટવર્ક ખોરવાય, તો વૈશ્વિક સ્તરે ક્લાઉડ કમ્પ્યુટિંગ અને AI ઇન્ફ્રાસ્ટ્રક્ચર પડી ભાંગશે. પરિસ્થિતિની ગંભીરતા જોતા, મેટા (Meta) જેવી કંપનીઓના કોન્ટ્રાક્ટરોએ પહેલેથી જ પર્સિયન ગલ્ફ વિસ્તાર છોડવાનું શરૂ કરી દીધું છે.

પૈસાની લાલચમાં દેશ સાથે વિશ્વાસઘાત: અમેરિકી ટેક એક્સપર્ટની ઈરાન માટે જાસૂસીના આરોપમાં ધરપકડ

પોતાના જ દેશમાં વિશ્વાસ ગુમાવી રહ્યા છે પાકિસ્તાનીઓ, સર્વેમાં ચોંકાવનારા આંકડા

ભારત પર કેવી અસર થશે?

જો લાલ સમુદ્રમાં કેબલ્સને નુકસાન થાય, તો ભારત પર તેની સીધી અને વ્યાપક અસર પડશે:

• ઇન્ટરનેટની ગતિ: ભારતમાં ઇન્ટરનેટની સ્પીડમાં ભારે ઘટાડો થઈ શકે છે.
• ડિજિટલ ટ્રાન્ઝેક્શન: બેંકિંગ સેવાઓ, UPI પેમેન્ટ અને ઓનલાઇન સ્ટોક ટ્રેડિંગમાં અવરોધ આવી શકે છે.
• આઈટી સેક્ટર: ભારતનું વિશાળ આઈટી અને સોફ્ટવેર સેક્ટર, જે ક્લાઉડ સર્વિસ પર નિર્ભર છે, તેને અબજો ડોલરનું નુકસાન થઈ શકે છે.

રિપેરિંગમાં મુશ્કેલી અને લાંબો સમય

નિષ્ણાતોના મતે, અંડરવોટર કેબલ રિપેર કરવું એ અત્યંત જટિલ પ્રક્રિયા છે. જો યુદ્ધગ્રસ્ત વિસ્તારમાં કેબલ તૂટે, તો ત્યાં રિપેરિંગ જહાજો મોકલવા જોખમી હોય છે. આથી, એકવાર કેબલ કપાયા પછી ઇન્ટરનેટ સેવાઓ પૂર્વવત કરવામાં મહિનાઓનો સમય લાગી શકે છે. ઈરાનની આ ધમકીએ માત્ર સૈન્ય નિષ્ણાતો જ નહીં, પણ ટેકનોલોજીની દુનિયાના માંધાતાઓની પણ ઊંઘ હરામ કરી દીધી છે.