ઈરાનની અમેરિકી ટેક કંપનીઓને ધમકી: ગૂગલ અને માઈક્રોસોફ્ટ પર હુમલાની ચેતવણી બાદ વ્હાઇટ હાઉસનો જડબાતોડ જવાબ
મધ્ય પૂર્વમાં ચાલી રહેલું યુદ્ધ હવે માત્ર રણમેદાન પૂરતું મર્યાદિત નથી રહ્યું, પરંતુ તે કોર્પોરેટ જગત અને સાયબર સ્પેસ સુધી પહોંચી ગયું છે. ઈરાનના રિવોલ્યુશનરી ગાર્ડ્સ (IRGC) એ તાજેતરમાં અમેરિકાની દિગ્ગજ ટેક કંપનીઓને નિશાન બનાવવાની ખુલ્લી ધમકી આપી છે. આ ધમકીના જવાબમાં વ્હાઇટ હાઉસે વળતો પ્રહાર કરતા કહ્યું છે કે અમેરિકી સેના ઈરાનના કોઈપણ દુસાહસને રોકવા માટે સજ્જ છે. રોયટર્સના અહેવાલ મુજબ, અમેરિકી અધિકારીઓએ દાવો કર્યો છે કે ઈરાનના બેલેસ્ટિક મિસાઈલ અને ડ્રોન હુમલામાં 90 ટકાનો ઘટાડો તેમની સજ્જતા દર્શાવે છે.
18 અમેરિકી કંપનીઓ ઈરાનના નિશાના પર
ઈરાની રિવોલ્યુશનરી ગાર્ડ્સ (IRGC) એ મંગળવારે (31 માર્ચ 2026) એક સત્તાવાર નિવેદન બહાર પાડીને અમેરિકાની 18 મોટી કંપનીઓને ચેતવણી આપી છે. ઈરાનનો આરોપ છે કે આ કંપનીઓ ઈઝરાયેલ અને અમેરિકાની સૈન્ય તેમજ ગુપ્તચર એજન્સીઓને મદદ કરી રહી છે. આ યાદીમાં ગૂગલ, માઈક્રોસોફ્ટ, એપલ, મેટા (ફેસબુક), ઇન્ટેલ, સિસ્કો, એચપી, ઓરેકલ, આઈબીએમ, ડેલ અને ટેસ્લા જેવી દિગ્ગજ કંપનીઓના નામ સામેલ છે. ઈરાને સ્પષ્ટ કર્યું છે કે જો વધુ ઈરાની નેતાઓની હત્યા કરવામાં આવશે, તો આ કંપનીઓની સંબંધિત યુનિટ્સને નષ્ટ કરી દેવામાં આવશે.
કર્મચારીઓને ઓફિસ છોડવાની સલાહ
IRGC ની આ ધમકીએ કોર્પોરેટ જગતમાં ફફડાટ ફેલાવી દીધો છે. ઈરાને માત્ર કંપનીઓને જ નહીં, પણ ત્યાં કામ કરતા કર્મચારીઓને પણ સીધી ચેતવણી આપી છે. નિવેદનમાં જણાવાયું છે કે જો કર્મચારીઓ પોતાનો જીવ બચાવવા માંગતા હોય, તો તેમણે તાત્કાલિક તેમના કાર્યસ્થળ છોડી દેવા જોઈએ. ઈરાન આ કંપનીઓને તેમના દેશ પર થતા સાયબર હુમલાઓ માટે જવાબદાર માને છે. નિશાના પર રહેલી અન્ય કંપનીઓમાં જેપી મોર્ગન, એનવીડિયા, જનરલ ઇલેક્ટ્રિક અને બોઇંગ જેવી નામાંકિત સંસ્થાઓનો પણ સમાવેશ થાય છે.
સાયબર વોરફેર
નિષ્ણાતો માને છે કે ઈરાન હવે સીધા સૈન્ય સંઘર્ષની સાથે ‘સાયબર વોર’ અને ‘ઇકોનોમિક વોર’ તરફ વળી રહ્યું છે. ગલ્ફ દેશોમાં આવેલા અમેરિકી સૈન્ય મથકો પર હુમલા કર્યા બાદ, હવે ટેક કંપનીઓને નિશાન બનાવવાની વાત કરીને ઈરાન અમેરિકા પર દબાણ લાવવાનો પ્રયાસ કરી રહ્યું છે. જોકે, અમેરિકાએ સ્પષ્ટ કર્યું છે કે તે તેની કંપનીઓ અને નાગરિકોની સુરક્ષા માટે કોઈપણ હદ સુધી જવા તૈયાર છે.
આ ધમકી બાદ વૈશ્વિક ટેક માર્કેટમાં પણ ચિંતા જોવા મળી રહી છે, કારણ કે આ કંપનીઓ વિશ્વભરના ડેટા અને ઈન્ફ્રાસ્ટ્રક્ચર સાથે જોડાયેલી છે. જો ખરેખર સાયબર હુમલાઓ વધશે, તો તેની અસર માત્ર અમેરિકા જ નહીં, પરંતુ ભારત સહિત સમગ્ર વિશ્વ પર પડી શકે છે.
