ગુજરાત રાજ્ય કાનૂની સેવા સત્તા મંડળના માર્ગદર્શન હેઠળ જામનગરમાં કોર્ટ સ્ટાફ માટે વિશેષ આરોગ્ય તપાસ શિબિર
ગુજરાત રાજ્ય કાનૂની સેવા સત્તા મંડળના માર્ગદર્શન હેઠળ જામનગર જિલ્લા કાનૂની સેવા સત્તા મંડળ દ્વારા એક મહત્વપૂર્ણ આરોગ્યલક્ષી કાર્યક્રમ યોજાયો હતો. પ્રિન્સીપાલ ડિસ્ટ્રીકટ જજ એન. આર. જોષીની પ્રેરણાથી અને શહેરની જી. જી. સરકારી હોસ્પિટલના સહયોગથી ધનવંતરી ઓડીટોરીયમ ખાતે કોર્ટના કર્મચારીઓ માટે ‘મેડીકલ ચેક-અપ કેમ્પ’નું આયોજન કરવામાં આવ્યું હતું. આ કેમ્પનો હેતુ ન્યાયિક ક્ષેત્રે કાર્યરત કર્મચારીઓના સ્વાસ્થ્યની જાળવણી કરવાનો હતો.
૧૪૦ થી વધુ કર્મચારીઓએ લીધો આરોગ્ય તપાસનો લાભ
આ મેડિકલ કેમ્પમાં જામનગર ડિસ્ટ્રીકટ કોર્ટ અને તેની નીચે આવતી તમામ અદાલતોના આશરે ૧૪૦ જેટલા કર્મચારીઓએ ઉત્સાહભેર ભાગ લીધો હતો. રોજના કામના ભારણ વચ્ચે કર્મચારીઓ પોતાના સ્વાસ્થ્યનું ધ્યાન રાખી શકે તે માટે આ એક સરાહનીય પ્રયાસ હતો. કેમ્પમાં હાજર રહેલા તમામ સ્ટાફ મેમ્બર્સનું પ્રાથમિક સ્વાસ્થ્ય પરીક્ષણ કરવામાં આવ્યું હતું, જેનાથી તેઓ પોતાની શારીરિક સ્થિતિ વિશે માહિતગાર થઈ શક્યા હતા.
નિષ્ણાત તબીબોની ટીમ દ્વારા બ્લડપ્રેશર અને સુગરની તપાસ
તબીબી તપાસ દરમિયાન જી. જી. હોસ્પિટલના ૩ નિષ્ણાત મેડીકલ ઓફીસરો અને નર્સીંગ સ્ટાફ સહિત કુલ ૯ સભ્યોની ટીમે સેવાઓ આપી હતી. આ ટીમે કર્મચારીઓના બ્લડપ્રેશર, સુગર લેવલ તેમજ અન્ય જરૂરી પ્રાથમિક તપાસ કરી હતી. ડોક્ટરોએ કર્મચારીઓને રિપોર્ટ મુજબ જરૂરી તબીબી સલાહ અને જીવનશૈલીમાં સુધારો કરવા અંગેનું માર્ગદર્શન પણ પૂરું પાડ્યું હતું.
