ટીમ ઈન્ડિયામાંથી બહાર ચાલી રહેલી સ્ટાર બેટ્સમેન જેમીમા રોડ્રિગ્સને મળી નવી વૈશ્વિક જવાબદારી: સ્વિટ્ઝર્લેન્ડ ટુરિઝમે ‘ફ્રેન્ડશિપ એમ્બેસેડર’ બનાવી
ભારતીય મહિલા ક્રિકેટ ટીમની સ્માર્ટ અને વિસ્ફોટક બેટ્સમેન જેમીમા રોડ્રિગ્સ હાલમાં પોતાના સ્નાયુઓની ગંભીર ઈજાના કારણે ક્રિકેટના મેદાનથી દૂર છે. જોકે, આ મુશ્કેલ સમયગાળા વચ્ચે તેમની કારકિર્દીમાં એક નવી અને રોમાંચક આંતરરાષ્ટ્રીય જવાબદારી ઉમેરાઈ છે. સ્વિટ્ઝર્લેન્ડ ટુરિઝમે ભારતીય બેટ્સમેન જેમીમા રોડ્રિગ્સને ભારત માટે સત્તાવાર ‘ફ્રેન્ડશિપ એમ્બેસેડર’ (Friendship Ambassador) તરીકે નિયુક્ત કરવાની જાહેરાત કરી છે.
હવે રમતના મેદાનમાંથી થોડા સમય માટે બહાર રહેલી જેમીમા ભારતીય પ્રવાસીઓને સ્વિટ્ઝર્લેન્ડના મનોહર પ્રકૃતિના સ્થળો, ત્યાંની વૈવિધ્યસભર સંસ્કૃતિ અને અનન્ય પ્રવાસન અનુભવોનો પરિચય કરાવતી નજરે પડશે.
બેંગલુરુમાં વિશેષ પ્રોગ્રામ અને નવું મિશન
આ મહત્વપૂર્ણ ભાગીદારીની જાહેરાત ૧૫ ઓક્ટોબરના રોજ બેંગલુરુ ખાતે આયોજિત એક વિશેષ કાર્યક્રમમાં કરવામાં આવી હતી, જ્યાં સ્વિટ્ઝર્લેન્ડ ટુરિઝમના મુખ્ય કારોબારી અધિકારી (CEO) માર્ટિન નાયડેગર ખાસ હાજર રહ્યા હતા. જેમીમા પોતાના ઉત્સાહી, રમુજી અને ખુશખુશાલ સ્વભાવ માટે યુવાનોમાં અત્યંત લોકપ્રિય છે.
પોતાની આ નવી ભૂમિકામાં તે સ્વિટ્ઝર્લેન્ડના પરંપરાગત અને લોકપ્રિય વિઝિટિંગ સ્પોટ્સની સાથે સાથે ભારતીય પ્રવાસીઓ માટે અજાણ્યા કે ઓછા જાણીતા હોય તેવા હિડન ડેસ્ટિનેશન્સનો પણ પ્રચાર કરશે. આ અભિયાનનો મુખ્ય ઉદ્દેશ્ય કુદરતી સુંદરતા, વિવિધ ઋતુઓમાં પ્રવાસના વિકલ્પો અને સ્વિસ સંસ્કૃતિને ભારતીય પ્રવાસીઓ સાથે જોડવાનો છે.
આ નવી જવાબદારી અંગે ખુશી વ્યક્ત કરતા જેમીમા રોડ્રિગ્સે જણાવ્યું હતું કે, “ભારતનું પ્રતિનિધિત્વ કરવું હંમેશા મારા માટે ગર્વની ક્ષણ રહી છે. રમતના મેદાન બહાર નવી જગ્યાઓની મુલાકાત લેવી, નવા લોકોને મળવું અને પ્રવાસના અનોખા અનુભવો ભારતીય નાગરિકો સાથે શેર કરવા માટે હું અત્યંત ઉત્સાહિત છું.”
‘ધ હન્ડ્રેડ’ માં ઈજા અને એશિયા કપમાંથી બહાર રહેવાનો રંજ
જેમીમાની ક્રિકેટ સફર પર નજર કરીએ તો, ૩ ઓગસ્ટના રોજ ઈંગ્લેન્ડમાં રમાયેલી ક્રિકેટ સ્પર્ધા ‘ધ હન્ડ્રેડ’ માં સધર્ન બ્રેવ તરફથી રમતી વખતે તેના જમણા પગના સ્નાયુઓમાં ગંભીર ઈજા પહોંચી હતી. જેને કારણે તેણે અધવચ્ચેથી ટુર્નામેન્ટ છોડવી પડી હતી. આ ઈજા પહેલા તેણે ૬ ઈનિંગ્સમાં ૧૩૧.૧૯ ના આક્રમક સ્ટ્રાઈક રેટથી ૧૪૩ રન બનાવ્યા હતા અને સતત બે મેચમાં ‘પ્લેયર ઓફ ધ મેચ’ નો એવોર્ડ પણ જીત્યો હતો.
આ કમનસીબ ઈજાના કારણે જેમીમાએ મહિલા એશિયા કપ, એશિયન ગેમ્સ અને ઝિમ્બાબ્વે સામે યોજાનારી તાજેતરની દ્વિપક્ષીય T20I અને વનડે શ્રેણી પણ ગુમાવવી પડી છે.
દક્ષિણ આફ્રિકા પ્રવાસ પૂર્વે મેદાન પર પુનરાગમનની આશા
હાલના દિવસોમાં જેમીમા નેટ્સમાં બેટિંગ પ્રેક્ટિસ અને જીમમાં વર્કઆઉટ કરીને પોતાની ફિટનેસ પાછી મેળવવા માટે આકરી મહેનત કરી રહી છે, જેની ઝલક તે અવારનવાર સોશિયલ મીડિયા વીડિયો દ્વારા શેર કરતી રહે છે. તેનું મુખ્ય લક્ષ્ય આ વર્ષના ઉત્તરાધમાં યોજાનારા દક્ષિણ આફ્રિકા પ્રવાસ પૂર્વે પૂર્ણપણે ફિટ થઈને નેશનલ ટીમમાં પુનરાગમન કરવાનું છે.
જેમીમાની ગેરહાજરીમાં નિકી પ્રસાદ, જિન્તિમાની કાલિતા, અનુષ્કા શર્મા અને ગુનાલન કમલિની જેવા નવીન યુવા ખેલાડીઓને પોતાની પ્રતિભા દર્શાવવાની સુવર્ણ તકો સાંપડી છે. હાલમાં જેમીમા પોતાની ઈજામાંથી ઝડપથી સાજી થઈને ક્રિકેટના મેદાનમાં કમબેક કરવા પર પૂરેપૂરું ધ્યાન કેન્દ્રિત કરી રહી છે.
