નરસૈયાની નગરી જૂનાગઢમાં વિકાસનો મહોત્સવ, મુખ્યમંત્રીના હસ્તે 26 વિકાસ કામોનું લોકાર્પણ અને ખાતમુહૂર્ત
મુખ્યમંત્રી શ્રી ભૂપેન્દ્ર પટેલે ગરવા ગિરનારની ગોદમાં જૂનાગઢ શહેર અને જિલ્લા માટે રૂ. ૨૧૫ કરોડના વિકાસકાર્યોની ૨૬ ભેટ ધરી છે. જૂનાગઢ કૃષિ યુનિવર્સિટી ખાતે આયોજિત ભવ્ય કાર્યક્રમમાં તેમણે ઈ-તકતીના અનાવરણ દ્વારા લોકાર્પણ અને ખાતમુહૂર્તની વિધિ સંપન્ન કરી હતી.
વિકાસ પ્રકલ્પોની મુખ્ય વિગતો
મુખ્યમંત્રીશ્રીએ જૂનાગઢના અર્થતંત્ર અને સુવિધાને વેગ આપતા અનેક પ્રોજેક્ટ્સ ખુલ્લા મૂક્યા:
-
નરસિંહ મહેતા સરોવર: જૂનાગઢના હૃદય સમાન આ સરોવરનું નવીનીકરણ કરી પ્રવાસનનું નવું નજરાણું અર્પણ કર્યું.
-
જળ વિતરણ (અમૃત ૨.૦): ધારાગઢ ખાતે ૧૦૦ લાખ લીટરનો અંડરગ્રાઉન્ડ સંપ અને ૨૫ લાખ લીટરની ટાંકીથી એક લાખથી વધુ નાગરિકોને પીવાનું શુદ્ધ પાણી મળશે.
-
હોકર્સ ઝોન: મધુરમ વિસ્તારમાં ૧૫૭ જેટલા નાના વેપારીઓને સન્માનપૂર્વક વ્યવસાય કરવા માટે રૂ. ૨.૧૯ કરોડના ખર્ચે હોકર્સ ઝોન ફાળવ્યો.
-
આરોગ્ય અને શિક્ષણ: વંથલીમાં ૨૫ બેડનું સામુહિક આરોગ્ય કેન્દ્ર અને જિલ્લામાં શિક્ષણની ભૌતિક સુવિધા વધારતા રૂ. ૧૦.૫૮ કરોડના ૭ કામોનું લોકાર્પણ.
-
રમત-ગમત: યુવાનો માટે રૂ. ૧૨.૭૦ કરોડના ખર્ચે ઇન્ડોર સ્ટેડિયમ સહિતની સુવિધાઓનું ખાતમુહૂર્ત.
મુખ્યમંત્રીશ્રીનો પ્રેરણાદાયી સંદેશ
મુખ્યમંત્રીશ્રીએ પોતાના સંબોધનમાં સ્વચ્છતા અને પર્યાવરણના જતન પર વિશેષ ભાર મૂક્યો:
૧. સ્વચ્છતા એ સંસ્કાર: જૂનાગઢ પ્રવાસનનું હબ હોવાથી અહીં સ્વચ્છતા જાળવવી એ દરેક નાગરિકની જવાબદારી છે.
૨. પર્યાવરણ રક્ષણ: ‘એક પેડ મા કે નામ’ અને ‘કેચ ધ રેઈન’ અભિયાનમાં જોડાઈ ગ્લોબલ વોર્મિંગ સામે લડવા અપીલ કરી.
૩. પ્રાકૃતિક ખેતી: જમીન અને લોકોના સ્વાસ્થ્ય માટે પ્રાકૃતિક કૃષિ અપનાવવા અનુરોધ કર્યો.
પદ્મશ્રી હાજીભાઈ મીરનું સન્માન
આ પ્રસંગે જૂનાગઢના જાણીતા ઢોલક વાદક પદ્મશ્રી એવોર્ડ વિજેતા શ્રી હાજીભાઈ કાસમભાઇ મીર (હાજી રમકડું)નું મુખ્યમંત્રીશ્રી દ્વારા સાલ ઓઢાડીને વિશેષ સન્માન કરવામાં આવ્યું હતું, જે જૂનાગઢની કલા અને સંસ્કૃતિ માટે ગૌરવની ક્ષણ બની રહી.
સહ પ્રભારી મંત્રી શ્રી કૌશિક વેકરીયાએ જણાવ્યું કે સરકાર છેવાડાના માનવી સુધી વિકાસ પહોંચાડવા કટિબદ્ધ છે. આ કાર્યક્રમમાં ધારાસભ્યશ્રીઓ, મેયર અને વરિષ્ઠ અધિકારીઓ મોટી સંખ્યામાં ઉપસ્થિત રહ્યા હતા.
