પાકિસ્તાનને ફરી સતાવ્યો એરસ્ટ્રાઇકનો ડર, આર્મી ચીફના ‘ટ્રેલર’વાળા નિવેદન પર ખ્વાજા આસિફ બોલ્યા- ‘ભારત બોર્ડર પાર હુમલો…’
ખ્વાજા આસિફે કહ્યું કે પાકિસ્તાન બે મોરચે- ભારત અને અફઘાનિસ્તાન પર ફસાઈ શકે છે અને આ સ્થિતિમાં ભારત યુદ્ધ ટાળીને સરહદ પાર હુમલો કરવાનો પ્રયાસ કરી શકે છે.
ભારતીય સેના પ્રમુખ જનરલ ઉપેન્દ્ર દ્વિવેદીના તાજેતરના નિવેદને પાકિસ્તાનમાં ખળભળાટ મચાવ્યો છે. તેમણે કહ્યું હતું કે ઓપરેશન સિંદૂર માત્ર એક ટ્રેલર હતું. આ નિવેદન પછી પાકિસ્તાનને ફરીથી એરસ્ટ્રાઇક જેવી કાર્યવાહીનો ડર સતાવવા લાગ્યો છે. પાકિસ્તાનના સંરક્ષણ મંત્રી ખ્વાજા આસિફે દાવો કર્યો છે કે ભારત ગમે ત્યારે બોર્ડર પાર હુમલો કરી શકે છે અને તેમના મતે પાકિસ્તાન આ શક્યતાને નજરઅંદાજ કરી શકે નહીં.
ખ્વાજા આસિફે શું આક્ષેપો કર્યા?
એક ટીવી કાર્યક્રમમાં ખ્વાજા આસિફે કહ્યું કે ભારતીય સેના પ્રમુખનું નિવેદન એમ જ આપવામાં આવ્યું નથી અને પાકિસ્તાન આ ચેતવણીને હળવાશથી લઈ શકે નહીં. આસિફે દાવો કર્યો કે ભારત પાકિસ્તાન પર દબાણ બનાવવા માટે સરહદ પાર કાર્યવાહી કરી શકે છે અને પાકિસ્તાને તેના માટે તૈયાર રહેવું જોઈએ. તેમણે એવું પણ કહ્યું કે અફઘાનિસ્તાનમાંથી થતી ઘૂસણખોરીમાં ભારતની ભૂમિકા હોય છે અને ઘણા દેશો- સાઉદી અરેબિયા, યુએઈ, ઈરાન, ચીન- પાકિસ્તાનમાં આવી ઘૂસણખોરી પર રોક લગાવવા માંગે છે. અફઘાનિસ્તાન પર આકરા પ્રહારો કરતાં આસિફે કહ્યું કે કાબુલ આતંકવાદીઓનું અડ્ડો બની ગયું છે.
સેના પ્રમુખનું નિવેદન બન્યું પાકિસ્તાનની બેચેનીનું કારણ
જનરલ ઉપેન્દ્ર દ્વિવેદીએ સોમવારે કહ્યું હતું, ‘ઓપરેશન સિંદૂર માત્ર એક ટ્રેલર હતું અને તે ૮૮ કલાકમાં પૂરું થયું. જો પાકિસ્તાન અમને તક આપશે, તો અમે તેને શીખવીશું કે જવાબદાર રાષ્ટ્ર પોતાના પાડોશીઓ સાથે કેવી રીતે વર્તન કરે છે.’ આ જ નિવેદન પાકિસ્તાનમાં ચિંતાનું કારણ બની ગયું છે, જેને તે સંભવિત સૈન્ય કાર્યવાહીનો સંકેત માની રહ્યું છે.
ભારત પર ભરોસો કરી શકાય નહીં: આસિફ
ખ્વાજા આસિફે કહ્યું કે પાકિસ્તાન બે મોરચે- ભારત અને અફઘાનિસ્તાન પર ફસાઈ શકે છે અને આ સ્થિતિમાં ભારત યુદ્ધ ટાળીને સરહદ પાર હુમલો કરવાનો પ્રયાસ કરી શકે છે. તેમણે કહ્યું કે પાકિસ્તાન કોઈપણ સંજોગોમાં ભારત પર ભરોસો કરી શકે નહીં. મિડલ ઈસ્ટના મુદ્દાઓ પર બોલતા, તેમણે ગાઝા પર આંતરરાષ્ટ્રીય દળોમાં પાકિસ્તાનની ભાગીદારીની વાત કહી અને સ્પષ્ટ કર્યું કે પાકિસ્તાન અબ્રાહમ કરારમાં સામેલ થશે નહીં.
ખૈબર પખ્તૂનખ્વાના મુખ્યમંત્રીએ પોતાની જ સરકાર પર ઉઠાવ્યા સવાલ
બીજી તરફ, પાકિસ્તાનની અંદરથી જ અવાજ ઉઠવા લાગ્યો છે. ખૈબર પખ્તૂનખ્વાના મુખ્યમંત્રી સોહેલ આફ્રિદીએ આરોપ લગાવ્યો છે કે પ્રાંતમાં ‘નકલી આતંકવાદી હુમલા’ કરાવવામાં આવી રહ્યા છે, જેનો ફાયદો કેન્દ્ર સરકારને થાય છે. ટોલો ન્યૂઝ અનુસાર, આફ્રિદીએ કહ્યું કે ઈસ્લામાબાદ જાણીજોઈને ખૈબર વિસ્તારમાં શાંતિ પ્રયાસોમાં અવરોધ ઊભો કરે છે અને રાજકીય લાભ માટે આતંકવાદનો ઉપયોગ કરે છે.
આફ્રિદીએ આરોપ લગાવ્યો કે પાકિસ્તાનની સંઘીય વ્યવસ્થામાં હાજર કેટલાક શક્તિશાળી જૂથો ક્ષેત્રમાં અસ્થિરતા જાળવી રાખવા માંગે છે. તેમણે દાવો કર્યો કે પશ્તૂન તહફુઝ આંદોલનના સભ્યોનું અપહરણ પણ આ જ માનસિકતાનો એક ભાગ છે, જેથી અફઘાનિસ્તાન સાથે ચાલી રહેલા શાંતિ પ્રયાસો પાટા પરથી ઉતરી જાય.
આફ્રિદીએ કહ્યું, ‘આ આતંકવાદ મનઘડંત છે. નિર્ણયો જનતાની ઈચ્છાથી નહીં, પરંતુ કેટલાક લોકોના હિતો અનુસાર લેવાય છે. ખૈબર પખ્તૂનખ્વાના લોકો આ જાતે સર્જેલા હુમલાઓથી તંગ આવી ગયા છે.’ તેમણે સ્પષ્ટ કહ્યું કે જે કોઈ પણ ક્ષેત્રની શાંતિ ભંગ કરશે, તે જનતાનો સહિયારો દુશ્મન છે.
