સ્કોર્પિયો પ્રેમીઓ માટે ખુશખબર! Mahindra Scorpio Classic નો નવો અવતાર, લુકથી લઈને ફીચર્સ સુધી બધું જ બદલાશે

ભારતીય ઓટોમોબાઈલ માર્કેટમાં ‘મહીન્દ્રા સ્કોર્પિયો’ (Mahindra Scorpio) નો એક અલગ જ દબદબો રહ્યો છે. દાયકાઓથી ભારતીય રસ્તાઓ પર રાજ કરનારી આ દમદાર એસયુવી (SUV) આજે પણ યુવાનો અને કાર પ્રેમીઓમાં ભારે લોકપ્રિય છે. હવે મહીન્દ્રા પોતાની આ આઇકોનિક કારને એક નવો અને આધુનિક અવતાર આપવાની તૈયારી કરી રહી છે. તાજેતરમાં ‘મહીન્દ્રા સ્કોર્પિયો ક્લાસિક ફેસલિફ્ટ’ (Mahindra Scorpio Classic Facelift) ની કેટલીક ડિજિટલ તસવીરો (Renders) સોશિયલ મીડિયા પર સામે આવી છે. આ તસવીરોમાં કારના નવા લુક, અપડેટ ડિઝાઇન અને અંદરના ફીચર્સની ઝલક જોવા મળે છે. જોકે, કંપની તરફથી આ બાબતે હજુ સુધી કોઈ સત્તાવાર જાહેરાત કે લોન્ચ ડેટ જાહેર કરવામાં આવી નથી.

સામે આવેલી ડિજિટલ તસવીરો પર નજર કરીએ તો નવી સ્કોર્પિયો ક્લાસિકનો આગળનો ભાગ (Front Profile) પહેલા કરતાં ઘણો આક્રમક અને પ્રીમિયમ દેખાઈ રહ્યો છે. વર્તમાન મોડેલમાં જોવા મળતી ઊભી લાઈનો (Vertical Slats) વાળી ગ્રીલની જગ્યાએ હવે હનીકોમ્બ (Honeycomb) અથવા મેશ ડિઝાઇન વાળી નવી ફ્રન્ટ ગ્રીલ આપવામાં આવી છે.

આ ઉપરાંત, કારના ફ્રન્ટ બંપરને પણ સંપૂર્ણપણે નવો શેપ આપવામાં આવ્યો છે. તેમાં પહેલાં કરતાં વધુ મોટી અને સ્પોર્ટી સિલ્વર કલરની ફોક્સ સ્કિડ પ્લેટ જોવા મળે છે. ફોગ લેમ્પની આસપાસની ડિઝાઇન પણ બદલાયેલી છે, જ્યારે હેડલેમ્પનો મુખ્ય આકાર જૂના મોડેલ જેવો જ જાળવી રાખવામાં આવ્યો છે. વર્તમાન મોડેલમાં બંપર પર એલઇડી ડીઆરએલ (LED DRLs) આવે છે, જેની જગ્યાએ રenders માં ક્રોમ ગાર્નિશ જોવા મળે છે.

કારના સાઇડ પ્રોફાઇલમાં બહુ મોટો ફેરફાર કરવામાં આવ્યો નથી, પરંતુ કેટલીક ઝીણી અને મહત્વપૂર્ણ બાબતો અપડેટ કરાઈ છે. ફ્રન્ટ ફેન્ડર પર લાગેલી ગાર્નિશને નવી ડિઝાઇન મળી છે. સાઇડ ટર્ન ઇન્ડિકેટર્સને હવે ફેન્ડર પરથી હટાવીને ઓઆરવીએમ (ORVM – બહારના રિયર વ્યૂ મિરર) પર શિફ્ટ કરવામાં આવ્યા છે, જે તેને મોર્ડન લુક આપે છે.

કારના દરવાજા અને વ્હીલ આર્ચ પર લગાવવામાં આવેલી બ્લેક કલેડિંગને પણ અપડેટ કરવામાં આવી છે. ફેસલિફ્ટ મોડેલમાં નવી બ્લેક કલરની 5-સ્પોક એલોય વ્હીલ્સ (Alloy Wheels) દર્શાવવામાં આવી છે, જે કારને બોલ્ડ લુક આપે છે. આ સિવાય નવી રૂફ રેલ્સ, પાછળની તરફ ઇન્ટિગ્રેટેડ રૂફ સ્પોઇલર અને હાઇ-માઉન્ટેડ બ્રેક લેમ્પ આપવામાં આવ્યા છે. રિયર ટેલ-લેમ્પમાં બ્લેક ઇન્સર્ટ્સ અને નવા ડિઝાઇનની રિયર સ્કિડ પ્લેટ કારના પાછળના ભાગને વધુ આકર્ષક બનાવે છે.

નવી સ્કોર્પિયો ક્લાસિકના કેબિન એટલે કે અંદરના ભાગમાં પણ કેટલાક મહત્વના કમ્ફર્ટ અને ટેકનોલોજી આધારિત ફેરફારો જોવા મળી શકે છે. તેમાં નવી કલર થીમ અને અપડેટેડ ટચસ્ક્રીન ઇન્ફોટેનમેન્ટ સિસ્ટમ મળવાની પૂરેપૂરી શક્યતા છે.

પરંતુ આ કારમાં સૌથી મોટો અને ચર્ચાસ્પદ ફેરફાર ‘ઇલેક્ટ્રિક સનરૂફ’ (Electric Sunroof) હોઈ શકે છે. જો પ્રોડક્શન મોડેલમાં સનરૂફ ફીચર આપવામાં આવશે, તો તે સ્કોર્પિયો ક્લાસિકના ચાહકો માટે સૌથી મોટી ભેટ સાબિત થશે. કારણ કે આ એસયુવીના લોન્ચિંગથી લઈને અત્યાર સુધી ક્યારેય સ્કોર્પિયો ક્લાસિકમાં સનરૂફનો ઓપ્શન મળ્યો નહોતો. જોકે, સેફ્ટી ફીચર્સ અને સીટિંગ લેઆઉટમાં શું બદલાવ થશે તે અંગે હજુ કોઈ ચોક્કસ માહિતી સામે આવી નથી.

એન્જિનની વાત કરીએ તો મહીન્દ્રા સ્કોર્પિયો ક્લાસિક ફેસલિફ્ટમાં કોઈ મોટો મિકેનિકલ ફેરફાર થવાની શક્યતા ખૂબ જ ઓછી છે. તેમાં કંપનીનું અત્યંત વિશ્વાસુ અને પાવરફુલ 2.2-લીટર mHawk ડીઝલ એન્જિન જ ચાલુ રાખવામાં આવશે.

આ એન્જિન તેની દમદાર કામગીરી, ઉત્તમ પાવર અને રફ-એન્ડ-ટફ રસ્તાઓ પર શાનદાર પરફોર્મન્સ માટે જાણીતું છે.

મહીન્દ્રા નવી સ્કોર્પિયો ક્લાસિક ફેસલિફ્ટને પોતાના વાર્ષિક ઇવેન્ટમાં રજૂ કરી શકે છે અથવા તો તેને ૨૦૨૬ના અંત સુધીમાં ભારતીય માર્કેટમાં લોન્ચ કરી શકે છે. હાલમાં કંપની દ્વારા લોન્ચિંગ કે કિંમત અંગે કોઈ સત્તાવાર પુષ્ટિ કરવામાં આવી નથી.

કારની આખરી કિંમત અને તેના ફાયનલ ફીચર્સની જાહેરાત કંપનીના સત્તાવાર લોન્ચ સમયે જ થશે. પરંતુ એટલું ચોક્કસ છે કે જો આ ફેસલિફ્ટ વર્ઝન રenders જેવું જ રોડ પર ઉતરશે, તો ભારતીય કાર માર્કેટમાં સ્કોર્પિયોનો ક્રેઝ ફરી એકવાર ચરમસીમાએ પહોંચશે.