૧૨૦ ની સ્પીડ, પબમાં હંગામો અને હવે ૩ મિત્રોના મોત: જાણો કોણ હતો અમદાવાદનો અમીર બાપનો બેટો શાનેય ગજ્જર?
મુંબઈના કોસ્ટલ રોડ પર રવિવારે વહેલી સવારે સર્જાયેલા ગંભીર અકસ્માતે સમગ્ર દેશનું ધ્યાન ખેંચ્યું છે. મરીન ડ્રાઇવથી હાજી અલી તરફ જઈ રહેલી એક પૂરપાટ ઝડપે દોડતી BMW કાર અચાનક નિયંત્રણ બહાર ગઈ, બેરિકેડ તોડીને લગભગ ૭૫ ફૂટ નીચે નીચે પાર્કિંગ વિસ્તારમાં ખાબકી હતી. આ દર્દનાક દુર્ઘટનામાં કારમાં સવાર અમદાવાદના ત્રણ યુવાન વિદ્યાર્થીઓના કરૂણ મોત નીપજ્યા છે, જ્યારે એક ગંભીર રીતે ઘાયલ થયો છે.
પોલીસ તપાસમાં બહાર આવ્યું છે કે અકસ્માત સમયે કાર ચલાવી રહેલો ૨૧ વર્ષીય શાનેય ગજ્જર પહેલીવાર પોલીસના ચોપડે નથી ચડ્યો. તેના વિરૂદ્ધ મુંબઈના જ અલગ-અલગ પોલીસ સ્ટેશનોમાં અગાઉ પણ બે અલગ-અલગ ગુના નોંધાઈ ચૂક્યા છે, જેમાં એક ઓવરસ્પીડિંગ (બેફામ ગાડી ચલાવવી) અને બીજો દારૂના નશામાં પબ બહાર હંગામો કરવાનો કેસ શામેલ છે.
૭૫ ફૂટ નીચે ખાબકી પૂરપાટ ઝડપે આવતી BMW
પોલીસ પાસેથી મળતી વિગતો અનુસાર, આ દુર્ઘટના રવિવારે સવારે લગભગ ૫:૨૦ વાગ્યાની આસપાસ કોસ્ટલ રોડ પર લોટસ જેટી અને લાલા લજપતરાય કોલેજ નજીક બની હતી. બ્લેક કલરની BMW કાર (DD 01 C 6302) મરીન ડ્રાઇવ તરફથી હાજી અલી તરફ ખૂબ જ તેજ ગતિએ જઈ રહી હતી. રોડ પર ગાડીની સ્પીડ લિમિટ ૮૦ કિમી પ્રતિ કલાકની છે, પરંતુ પ્રાથમિક તપાસ અનુસાર કાર અંદાજે ૧૨૦ કિમી પ્રતિ કલાકથી વધુની ઝડપે દોડી રહી હતી.
#WATCH | Mumbai Coastal Road BMW Crash: Old Video Of Deceased Shanay Gajjar Arguing During Road Rage Incident Surfaces
Link: https://t.co/FGqvahs3xV
#MumbaiNews #CoastalRoad #BMWCrash https://t.co/U1aWHi0RSi
— Free Press Journal (@fpjindia) September 21, 2026
અચાનક કાર પરથી ડ્રાઇવરે કાબૂ ગુમાવતા કાર રસ્તાની પ્રોટેક્શન વોલ અને બેરિકેડ તોડીને ૭૫ ફૂટ નીચે બની રહેલા પાર્કિંગ એરિયામાં પડી હતી. ધડાકાનો અવાજ સાંભળીને ત્યાં હાજર સિક્યોરિટી ગાર્ડ અને શ્રમિકો તરત જ ઘટનાસ્થળે દોડી આવ્યા હતા.
દુર્ઘટનામાં કારનો કૂચડો નીકળી ગયો હતો. મૃતકોની ઓળખ શાનેય ગજ્જર (૨૧), આદિત્ય જકાસણિયા (૧૯) અને ધૈર્ય શેઠ (૧૭) તરીકે થઈ છે. જ્યારે ચોથો યુવક આદિત્ય ઓસવાલ (૨૧) ગંભીર રીતે ઘાયલ થયો હતો. તેને પહેલા નાયર હોસ્પિટલ અને ત્યારબાદ વધુ સારવાર માટે બ્રીચ કેન્ડી હોસ્પિટલમાં ખસેડવામાં આવ્યો હતો. આ ચારેય વિદ્યાર્થીઓ મૂળ અમદાવાદના હતા અને અભ્યાસ અર્થે મુંબઈમાં રહેતા હતા. ગાડી શાનેયના પિતા અને અમદાવાદના બિઝનેસમેન ફાલ્ગુન ગજ્જરના નામે રજિસ્ટર્ડ છે.
ડ્રાઇવર શાનેય ગજ્જરનો જૂનો ગુનાહિત રેકોર્ડ
પોલીસ રેકોર્ડ દર્શાવે છે કે શાનેય અગાઉ પણ પોતાની બેફામ ડ્રાઇવિંગ અને વર્તણૂકને કારણે પોલીસની ઝપટે ચડી ચૂક્યો હતો:
૧. ગામદેવી પોલીસ સ્ટેશનમાં સ્પીડિંગનો કેસ (માર્ચ ૨૦૨૬): ૨૮ માર્ચ ૨૦૨૬ના રોજ બ્રીચ કેન્ડી હોસ્પિટલ નજીકથી બાઇક પર જઈ રહેલા ઓમકાર શિર્કે અને તેમની પત્નીને આ જ BMW કારે જોખમી રીતે ઓવરટેક કરી હતી. મહાલક્ષ્મી મંદિર નજીક જ્યારે શિર્કે ગાડીના ડ્રાઇવરને સ્પીડ બાબતે પૂછવા ગયા ત્યારે તેમની સાથે બોલાચાલી કરવામાં આવી હતી. આ મામલે ગામદેવી પોલીસે અજાણ્યા ડ્રાઇવર વિરૂદ્ધ રશ ડ્રાઇવિંગનો કેસ નોંધ્યો હતો.
૨. બાંદ્રા પબ બહાર નશામાં હંગામો (ઓગસ્ટ ૨૦૨૬): ૨૦ ઓગસ્ટ ૨૦૨૬ના રોજ બાંદ્રા વેસ્ટમાં આવેલા એક પબ બહાર શાનેય અને તેના અન્ય ૩ મિત્રો દારૂના નશામાં જાહેરમાં હંગામો કરી રહ્યા હતા. પોલીસે જ્યારે તેમને શાંત રહેવા કહ્યું ત્યારે તેમણે પોલીસ કર્મચારીઓ સાથે ગેરવર્તણૂક કરી હતી અને પોલીસ સ્ટેશનના ડ્યુટી ઓફિસરના રૂમમાં પણ ધમાલ મચાવી હતી. બાંદ્રા પોલીસે મહારાષ્ટ્ર પ્રોહિબિશન એક્ટ હેઠળ ગુનો નોંધીને ૪ સપ્ટેમ્બર ૨૦૨૬ના રોજ કોર્ટમાં ચાર્જશીટ પણ રજૂ કરી દીધી હતી.
તાડદેવ પોલીસ સ્ટેશનમાં નોંધાયેલી FIR ની વિગતો
અકસ્માત બાદ તાડદેવ પોલીસે મૃતક ડ્રાઇવર શાનેય ફાલ્ગુન ગજ્જર વિરૂદ્ધ મોટર વાહન અધિનિયમની કલમ ૧૮૪ અને ભારતીય ન્યાય સંહિતા (BNS) ની કલમ ૨૮૧, ૧૨૫(b) અને ૧૦૬(૧) હેઠળ ગુનો નોંધ્યો છે.
તાડદેવ પોલીસ સ્ટેશનના પીએસઆઈ રાજેન્દ્ર બબન ઇંગોલે તેમની ટીમ સાથે સવારે ૫:૧૯ વાગ્યે કન્ટ્રોલ રૂમનો મેસેજ મળતાં જ સ્થળ પર પહોંચ્યા હતા. ત્યાં સિક્યોરિટી ગાર્ડ ચંદ્રકાંત ઠાકુરે જણાવ્યું કે થાંભલા નંબર HAI 637 અને HAI 634 ની વચ્ચેથી કાર નીચે ખાબકી હતી.
પોલીસે ઘટનાસ્થળેથી ૪ મોબાઈલ ફોન અને એક વોલેટ કબજે કર્યું હતું. વોલેટમાંથી મળેલા ઓળખપત્ર તેમજ વારંવાર આવી રહેલા સંબંધીઓના ફોન કોલ્સના આધારે તમામ ૪ યુવાનોની ઓળખ શક્ય બની હતી. ડ્રાઇવરની સીટ પર શાનેય ગજ્જર અડધો અંદર અને અડધો બહારની હાલતમાં લોહીલુહાણ મળ્યો હતો. નાયર હોસ્પિટલના ડોક્ટરોએ શાનેય, ધૈર્ય અને આદિત્ય જકાસણિયાને લાવતાની સાથે જ મૃત જાહેર કર્યા હતા.
દારૂ પીધેલી હાલતમાં ગાડી ચલાવવાની આશંકા: તપાસ ચાલુ
અકસ્માત એટલો ભયાનક હતો કે કારનો સંપૂર્ણ ભૂકો બોલી ગયો હતો. હાલ તાડદેવ પોલીસ એ દિશામાં તપાસ કરી રહી છે કે શું શાનેય દારૂના નશામાં ગાડી ચલાવી રહ્યો હતો. આ માટે તેના બ્લડ સેમ્પલ ફોરેન્સિક લેબોરેટરીમાં મોકલવામાં આવ્યા છે.
આ ઉપરાંત, કારમાં કોઈ મિકેનિકલ ખામી (જેમ કે બ્રેક ફેલ થવી) સર્જાઈ હતી કે નહીં તે ચકાસવા માટે રીજનલ ટ્રાન્સપોર્ટ ઓફિસ (RTO) ની મદદ લેવામાં આવી રહી છે.
નાની વયે માતા-પિતા દ્વારા મોંઘી અને સ્પીડી કાર આપી દેવી અને વારંવારની ભૂલો છતાં ગંભીરતા ન દાખવવી, આખરે ત્રણ હોનહાર યુવાનોના જીવ લઈ ગઈ. આ દુર્ઘટનાએ ફરી એકવાર સાબિત કર્યું છે કે રસ્તા પરની બેદરકારી માત્ર પોતાના જ નહીં પરંતુ નિર્દોષ લોકોના પરિવારને પણ ક્યારેય ન પુરાય તેવું દુઃખ આપી જાય છે.
