મહિલા એશિયા કપ 2026: નશરા સંધુના ઐતિહાસિક સ્પેલે પાકિસ્તાનને સેમિફાઇનલમાં પહોંચાડ્યું, હોંગકોંગ સામે 72 રનથી શાનદાર જીત
મહિલા એશિયા કપ 2026ની અત્યંત ઉત્તેજક મેચમાં પાકિસ્તાન મહિલા ક્રિકેટ ટીમે હોંગકોંગ સામે 72 રનથી ભવ્ય વિજય મેળવીને સેમિફાઇનલમાં પોતાનું સ્થાન નિશ્ચિત કરી લીધું છે. દુબઈ ઈન્ટરનેશનલ ક્રિકેટ સ્ટેડિયમ ખાતે રમાયેલી આ મેચમાં પાકિસ્તાની ડાબા હાથની સ્પિનર નશરા સંધુએ પોતાની ઘાતક બોલિંગ વડે ઈતિહાસ રચ્યો હતો. નશરા સંધુએ પોતાના 4 ઓવરના સ્પેલમાં માત્ર 7 રન આપીને 6 વિકેટ ઝડપી હતી. આ પ્રદર્શન સાથે જ તે મહિલા T20I ક્રિકેટમાં એક જ ઈનિંગમાં 6 વિકેટ લેનારી પ્રથમ પાકિસ્તાની બોલર બની ગઈ છે.હવે 11 સપ્ટેમ્બરના રોજ યોજાનાર બીજા સેમિફાઇનલ મુકાબલામાં પાકિસ્તાનનો સામનો શ્રીલંકા સામે થશે.
નશરા સંધુની સ્પિન જાળમાં ફસાયું હોંગકોંગ
144 રનના વિજયી લક્ષ્યાંકનો પીછો કરવા ઉતરેલી હોંગકોંગની ટીમ શરૂઆતમાં જ દબાણમાં આવી ગઈ હતી. પાવરપ્લેના અંત સુધીમાં હોંગકોંગે 28 રનમાં પોતાની પ્રથમ બે વિકેટ ગુમાવી દીધી હતી. આ પછી બોલિંગમાં આવેલી નશરા સંધુએ હોંગકોંગના બેટિંગ લાઈનઅપને સંપૂર્ણપણે તહસ-નહસ કરી નાખ્યું હતું.
સંધુએ સૌથી પહેલા યાસ્મીન દાસવાણી (13 રન) અને કૅરી ચાન વચ્ચેની ભાગીદારી તોડી હતી. ત્યારબાદ તેણે પોતાના સ્પિનના જાદુથી માત્ર ચાર બોલના ગાળામાં મરિના લેમ્પલો અને મરિયમ બીબીને પેવેલિયન ભેગા કરી દીધા હતા, જેના કારણે હોંગકોંગનો સ્કોર 40 રનમાં 5 વિકેટ થઈ ગયો હતો. હોંગકોંગની ટીમ આ આઘાતમાંથી બહાર આવી શકી નહીં અને આગામી 15 રન ઉમેરતામાં તો વધુ ચાર ખેલાડીઓ આઉટ થઈ ગયા હતા. સમગ્ર હોંગકોંગની ટીમ 19 ઓવરમાં માત્ર 71 રન બનાવીને ઓલઆઉટ થઈ ગઈ હતી. હોંગકોંગ માટે કૅરી ચાને સૌથી વધુ 30 રન બનાવ્યા હતા.
રેકોર્ડ બુકમાં નશરા સંધુનું નામ નોંધાયું
નશરા સંધુનું આ બોલિંગ પ્રદર્શન (4-0-7-6) પાકિસ્તાન મહિલા T20I ક્રિકેટ ઈતિહાસનું સર્વશ્રેષ્ઠ પ્રદર્શન બની ગયું છે. આ અગાઉ આ રેકોર્ડ ઓમૈમા સોહેલના નામે હતો, જેણે 2022માં શ્રીલંકા સામે 13 રન આપીને 5 વિકેટ લીધી હતી.
સંધુ મહિલા T20I ક્રિકેટમાં એક ઈનિંગમાં 5 કે તેથી વધુ વિકેટ ઝડપનારી ત્રીજી પાકિસ્તાની બોલર બની છે. તેની પહેલાં નિકા દાર (2018) અને ઓમૈમા સોહેલ (2022) આ સિદ્ધિ મેળવી ચૂક્યા છે. ચાલુ એશિયા કપ ટુર્નામેન્ટમાં પણ આ બીજી વખત બન્યું છે જ્યારે કોઈ બોલરે 6 કે તેથી વધુ વિકેટ લીધી હોય; આ પહેલા શ્રીલંકાની ચમારી અથાપથુએ ઈન્ડોનેશિયા સામે માત્ર 7 રન આપીને 7 વિકેટ ઝડપી હતી.
પાકિસ્તાનનો પ્રથમ દાવ: શવાલ અને આયશાનો મહત્વપૂર્ણ ફાળો
ટોસ જીતીને પ્રથમ બેટિંગ પસંદ કરનાર પાકિસ્તાની ટીમે નિર્ધારિત 20 ઓવરમાં 8 વિકેટના નુકસાને 143 રન બનાવ્યા હતા. પાકિસ્તાનની શરૂઆત મજબૂત રહી હતી. ઓપનર શવાલ ઝુલ્ફિકરે ઉત્કૃષ્ટ બેટિંગ કરતા 35 બોલમાં 7 ચોગ્ગાની મદદથી 47 રન બોર્ડ પર જોડ્યા હતા.
મધ્યમ ક્રમમાં આયશા ઝફરે 19 બોલમાં 26 રન અને કેપ્ટન ફાતિમા સનાએ અણનમ 24 રન (2 છગ્ગા) નું ઉપયોગી યોગદાન આપ્યું હતું. હોંગકોંગ તરફથી જોયલીન કૌરે શાનદાર બોલિંગ પ્રદર્શન કરતા 19 રનમાં 4 વિકેટ ઝડપી હતી, જ્યારે ઈકરા સહર અને કૅરી ચાને 2-2 વિકેટ લીધી હતી. જોકે, હોંગકોંગના બોલરોના આ પ્રયાસો નશરા સંધુની વિઘાતક સ્પિન સામે વ્યર્થ સાબિત થયા હતા.
