કરાચીમાં ગણેશોત્સવની ધૂમ: ‘દેવા શ્રી ગણેશા’ પર નાચ્યા પાકિસ્તાની યુવાનો
ગણેશ ચતુર્થીનો તહેવાર માત્ર ભારતમાં જ નહીં, પરંતુ પાડોશી દેશ પાકિસ્તાનમાં પણ પૂરા ઉત્સાહ, શ્રદ્ધા અને ભક્તિભાવ સાથે ઉજવવામાં આવ્યો. પાકિસ્તાનના કરાચી શહેરમાં વસેલા કોંકણી મરાઠી સમુદાયના હિંદુઓએ ખૂબ જ ધામધૂમથી ગણપતિ બાપ્પાનું સ્વાગત કર્યું. ખાસ વાત એ છે કે આ વખતે સોશિયલ મીડિયા પર કરાચીના ઘણા વીડિયો વાયરલ થયા, જેમાં સ્થાનિક યુવાનો ‘દેવા શ્રી ગણેશા’ ગીત પર નાચતા જોવા મળ્યા.
પૂજા અને સાંસ્કૃતિક કાર્યક્રમો
આ વીડિયોમાં કરાચીના મુખ્ય મંદિરો જેમ કે રત્નેશ્વર મહાદેવ મંદિર, ગણેશ મઠ અને સ્વામિનારાયણ મંદિરની ભવ્ય સજાવટ, વિશેષ પૂજા-અર્ચના અને પરંપરાગત સાંસ્કૃતિક કાર્યક્રમોની ઝલક જોવા મળે છે. એક વીડિયોમાં સ્વામિનારાયણ મંદિરમાં યુવા ગ્રુપને બોલિવુડ ફિલ્મ ‘અગ્નિપથ’ના પ્રખ્યાત ગીત ‘દેવા શ્રી ગણેશા’ પર નાચતા જોવામાં આવ્યા, જે લોકોમાં ખૂબ લોકપ્રિય થયો છે.
View this post on Instagram
આ આયોજને માત્ર પાકિસ્તાનમાં વસેલા હિંદુઓના ધાર્મિક ઉત્સવોને જ ઉજાગર કર્યા નથી, પરંતુ એ પણ દર્શાવ્યું કે ધર્મ અને સંસ્કૃતિની અભિવ્યક્તિ સીમાઓથી પર છે. ઇન્સ્ટાગ્રામ પર @vikash_vada અને @aariyadhanwani જેવા પાકિસ્તાની યુઝર્સે આ સુંદર પળોને શેર કરી, જેના પર વિશ્વભરના નેટીઝન્સ, ખાસ કરીને ભારતીયોએ દિલ ખોલીને પ્રેમ વરસાવ્યો.
સોશિયલ મીડિયા પર પ્રતિક્રિયાઓ
ઘણા યુઝર્સે કોમેન્ટ્સમાં એકતા અને ભાઈચારાની પ્રશંસા કરી. કોઈએ લખ્યું, “અલ્લાહ તમને હંમેશા ખુશ રાખે”, તો કોઈએ કહ્યું, “આવી જ રીતે એકતા જાળવી રાખો.” એક પાકિસ્તાની હિંદુ યુઝરે ગર્વથી લખ્યું, “મને પાકિસ્તાની હિંદુ હોવાનો ગર્વ છે.”
ગણેશોત્સવ જેવા આયોજનો દર્શાવે છે કે પાકિસ્તાનમાં રહેતા લઘુમતી સમુદાયો પોતાના ધાર્મિક તહેવારોને પૂરી શ્રદ્ધા અને ગરિમા સાથે ઉજવે છે. આ આયોજન સાંસ્કૃતિક એકતા, સહિષ્ણુતા અને પરંપરાગત મૂલ્યોનું ઉદાહરણ બનીને ઊભર્યું છે. સોશિયલ મીડિયા પર વાયરલ થયેલા આ વીડિયો વિશ્વભરના દર્શકો માટે એ સંદેશ લઈને આવ્યા છે કે ખુશી, ભક્તિ અને સંસ્કૃતિની કોઈ સીમા હોતી નથી.
