વર્લ્ડ ચેમ્પિયનશિપ ઓફ લિજેન્ડ્સ (WCL) 2026 માં પાકિસ્તાન ક્રિકેટ બોર્ડનો અહંકાર અને ભારત સામેની નવી નાટકબાજી
વર્લ્ડ ચેમ્પિયનશિપ ઓફ લિજેન્ડ્સ (WCL) ની ત્રીજી સીઝનમાંથી પાકિસ્તાન ચેમ્પિયન્સની ટીમ સત્તાવાર રીતે બહાર થઈ ગઈ છે. પાકિસ્તાન ક્રિકેટ બોર્ડ (PCB) દ્વારા પોતાના જ પૂર્વ ખેલાડીઓને એનઓસી (NOC – નો ઓબ્જેક્શન સર્ટિફિકેટ) જારી કરવાનો ઇનકાર કરી દેવાતા પાકિસ્તાની ટીમે આ ગ્લોબલ ટૂર્નામેન્ટમાંથી ખસી જવું પડ્યું છે. આ વિવાદ પાછળ પાકિસ્તાન ક્રિકેટ બોર્ડની અવાસ્તવિક અને હાસ્યાસ્પદ શરતો જવાબદાર હોવાનું સામે આવ્યું છે, જેમાં તેમણે ભારતીય ખેલાડીઓ પાસે લેખિતમાં માફી માંગવાની માંગ કરી હતી.
ભારત અને પાકિસ્તાન વચ્ચેના રાજકીય અને ખેલ તણાવનો આ વિવાદ નવો નથી. ગયા વર્ષે યોજાયેલી WCL ની બીજી સીઝન દરમિયાન ભારતીય ટીમે પાકિસ્તાન સામે રમવાનો ઇનકાર કરી દીધો હતો. ત્યારથી જ પાકિસ્તાન ક્રિકેટ બોર્ડ વર્લ્ડ ચેમ્પિયનશિપ લીગને નિશાન બનાવી રહ્યું હતું અને પોતાના ખેલાડીઓ પર આ લીગમાં ભાગ લેવા પર રોક લગાવવાના પ્રયાસો કરી રહ્યું હતું.
‘ભારતીય ખેલાડીઓ લેખિત માફી માંગે’ – PCB ની અસંભવ શરતો
અહેવાલો અનુસાર, PCB ના અધિકારીઓ પાકિસ્તાની ખેલાડીઓને આ ટૂર્નામેન્ટ રમવા માટે NOC આપવા તૈયાર થયા હતા, પરંતુ તેમણે WCL ના આયોજકો સમક્ષ કેટલીક અત્યંત જટિલ અને અસ્વીકાર્ય શરતો મૂકી દીધી હતી. PCB ની મુખ્ય શરત એ હતી કે ગયા વર્ષે પાકિસ્તાન સામે રમવાનો ઇનકાર કરવા બદલ ‘ટીમ ઇન્ડિયા’ ના ખેલાડીઓ લેખિતમાં માફી માંગે. આ ઉપરાંત, મેચ દરમિયાન અને મેચ પૂરી થયા પછી ભારતીય અને પાકિસ્તાની ખેલાડીઓ એકબીજા સાથે હાથ મિલાવશે તે બાબતની ખાતરી પણ માંગવામાં આવી હતી.
વર્લ્ડ ચેમ્પિયનશિપ ઓફ લિજેન્ડ્સના આયોજકોએ કેટલીક સામાન્ય શરતો સ્વીકારી લીધી હતી, પરંતુ ભારતીય ખેલાડીઓની લેખિત માફી અને ફરજિયાત હાથ મિલાવવાની ખાતરી આપવાનો પ્રશ્ન ઉકેલી શકાય તેમ નહોતો. ભારતીય ખેલાડીઓએ કોઈપણ સંજોગોમાં માફી માંગવાનો સ્પષ્ટ ઇનકાર કરી દીધો હતો. આ પરિણામસ્વરૂપ, પાકિસ્તાન ક્રિકેટ બોર્ડે NOC ન આપતા પાકિસ્તાની ટીમને આખી સીઝનમાંથી ખસી જવાની ફરજ પડી હતી.
૧૦ ઓક્ટોબરનો મહામુકાબલો રદ, રનર્સ-અપ પાકિસ્તાનને મોટો ફટકો
WCL 2026 ના પૂર્વ નિર્ધારિત શિડ્યુલ મુજબ, ૧૦ ઓક્ટોબરના રોજ ઇન્ડિયન ચેમ્પિયન્સ અને પાકિસ્તાન ચેમ્પિયન્સ વચ્ચે હાઇ-વોલ્ટેજ મેચ રમાવાની હતી. પરંતુ પાકિસ્તાન ટૂર્નામેન્ટમાંથી બહાર ફેંકાઈ જતાં હવે આ મેચ યોજાશે નહીં અને ક્રિકેટ ચાહકોને બંને દેશો વચ્ચેની ટક્કર જોવાનો મોકો મળશે નહીં.
નોંધનીય છે કે, WCL ની અગાઉની બંને સીઝનમાં પાકિસ્તાન ચેમ્પિયન્સની ટીમ રનર્સ-અપ એટલે કે ઉપવિજેતા રહી હતી. ૨૦૨૪ માં યોજાયેલી પ્રથમ સીઝનની ફાઇનલમાં ભારતીય ટીમે પાકિસ્તાનને હરાવીને ટાઇટલ જીત્યું હતું. જ્યારે ૨૦૨૫ ની બીજી સીઝનમાં દક્ષિણ આફ્રિકાએ ફાઇનલમાં પાકિસ્તાનને ધૂળ ચાટતી કરીને ટ્રોફી પર કબજો કર્યો હતો. આ વખતે સતત ત્રીજી વાર ફાઇનલમાં પહોંચવાના પાકિસ્તાનના સ્વપ્ન પર તેમના જ બોર્ડના નિર્ણયથી પાણી ફરી વળ્યું છે.
ભારતીય ટીમનો હવે પછીનો મુકાબલો કોની સામે?
વર્લ્ડ ચેમ્પિયનશિપ ઓફ લિજેન્ડ્સની ત્રીજી સીઝન ૩ ઓક્ટોબરથી ૧૮ ઓક્ટોબર ૨૦૨૬ સુધી રમાઈ રહી છે. ભારતીય ટીમે અત્યાર સુધી આ લીગમાં બે રમતો રમી છે. પોતાની પ્રથમ મેચમાં ભારતે ઓસ્ટ્રેલિયન ચેમ્પિયન્સને ૪૬ રને હરાવીને શાનદાર શરૂઆત કરી હતી, પરંતુ બીજી મેચમાં ઈંગ્લેન્ડ સામે ૨૧ રને પરાજય થયો હતો.
પાકિસ્તાન બહાર થતાં આયોજકો દ્વારા સમયપત્રકમાં સુધારો કરવામાં આવ્યો છે. હવે ૧૦ ઓક્ટોબરે પાકિસ્તાન સામે રમવાને બદલે ભારતીય ટીમનો સામનો દક્ષિણ આફ્રિકા સામે થશે. આ પછી ૧૧ ઓક્ટોબરે ભારતનો મુકાબલો બાંગ્લાદેશ સામે અને ૧૩ ઓક્ટોબરે વેસ્ટ ઇન્ડીઝના ચેમ્પિયન્સ સામે થશે.
