ગુજરાતમાં 20 વર્ષનો શહેરી વિકાસનો સફર, વર્લ્ડ ક્લાસ ઇન્ફ્રાસ્ટ્રક્ચર અને ઇઝ ઓફ લિવિંગમાં નોંધપાત્ર વૃદ્ધિ
વડાપ્રધાન નરેન્દ્ર મોદી આગામી ૩૧ માર્ચ, ૨૦૨૬ના રોજ ગુજરાતની મુલાકાતે આવી રહ્યા છે, જ્યાં તેઓ શહેરી વિકાસના વિવિધ પ્રકલ્પોનું લોકાર્પણ અને ખાતમુહૂર્ત કરશે. વર્ષ ૨૦૦૫ને ‘શહેરી વર્ષ’ જાહેર કર્યા બાદ શરૂ થયેલી ગુજરાતની આ વિકાસયાત્રાને ૨૦ વર્ષ પૂર્ણ થયા છે. આ બે દાયકા દરમિયાન રાજ્યમાં માળખાગત સુવિધાઓ જેવી કે રોડ-રસ્તા, સ્ટ્રીટ લાઈટ અને પીવાના પાણીની વ્યવસ્થામાં અભૂતપૂર્વ સુધારો થયો છે. મુખ્યમંત્રી ભૂપેન્દ્ર પટેલના નેતૃત્વમાં ૨૦૨૫ના વર્ષને ફરી ‘શહેરી વિકાસ વર્ષ’ તરીકે ઉજવીને રાજ્યના શહેરોને વર્લ્ડ ક્લાસ બનાવવા માટે સરકાર કટિબદ્ધ બની છે, જેનાથી નાગરિકોના ‘ઇઝ ઓફ લિવિંગ’માં વધારો થયો છે.
રોડ, રેલવે અને એર કનેક્ટિવિટીનું મજબૂત નેટવર્ક
ગુજરાત આજે પરિવહન ક્ષેત્રે દેશનું મોડેલ સ્ટેટ બન્યું છે. દ્વારકા અને બેટ દ્વારકાને જોડતો ‘સુદર્શન સેતુ’ સિગ્નેચર બ્રિજ હોય કે અમદાવાદ-ગાંધીનગર વચ્ચે દોડતી મેટ્રો ફેઝ-૨, રાજ્યની કનેક્ટિવિટી દિન-પ્રતિદિન આધુનિક બની રહી છે. સુરત મેટ્રો અને બુલેટ ટ્રેન જેવા પ્રોજેક્ટ્સ ઝડપભેર આગળ વધી રહ્યા છે, જ્યારે ૫ વંદે ભારત ટ્રેનો રાજ્યમાં કાર્યરત છે. હવાઈ માર્ગે જોડાણ વધારવા માટે રાજકોટમાં હીરાસર ગ્રીનફિલ્ડ એરપોર્ટ અને સુરત આંતરરાષ્ટ્રીય એરપોર્ટને અત્યાધુનિક સુવિધાઓ સાથે સજ્જ કરવામાં આવ્યા છે. વધુમાં, ૬૮૦ કિ.મી. લાંબો સોમનાથ-દ્વારકા એક્સપ્રેસ વે રાજ્યના આર્થિક વિકાસને નવી ગતિ આપશે.
અમૃત યોજના અને સ્માર્ટ સિટી મિશન દ્વારા આધુનિક સુવિધાઓ
શહેરોને ‘જળ સુરક્ષિત’ બનાવવા માટે અમૃત ૨.૦ યોજના હેઠળ અંદાજે ૧૨૦૦ કરોડ રૂપિયાથી વધુના પાણી પુરવઠા અને ગટર વ્યવસ્થાના પ્રોજેક્ટ્સ અમલમાં મૂકવામાં આવ્યા છે. સ્માર્ટ સિટી મિશન અંતર્ગત અમદાવાદ, સુરત, વડોદરા સહિતના ૬ શહેરોમાં ૧૧,૫૦૦ કરોડથી વધુના ખર્ચે ડિજિટલ અને ભૌતિક માળખામાં સુધારો કરવામાં આવ્યો છે. ગરીબ અને મધ્યમ વર્ગના પરિવારો માટે ‘પ્રધાનમંત્રી આવાસ યોજના’ હેઠળ ૯ લાખથી વધુ ઘરોનું નિર્માણ કરીને તેમને પોતાના ઘરનું સપનું પૂરું કરી આપવામાં આવ્યું છે. તાજેતરમાં ૯ નવી મહાનગરપાલિકાઓની જાહેરાત સાથે હવે રાજ્યમાં કુલ ૧૭ મહાનગરપાલિકાઓ વધુ સુઆયોજિત વિકાસ માટે સજ્જ થઈ છે.
ભવિષ્યના લક્ષ્યાંકો અને ઓલિમ્પિક રેડી સિટીનું વિઝન
વર્ષ ૨૦૨૬-૨૭ના બજેટમાં શહેરી વિકાસ માટે ૩૩,૫૦૪ કરોડ રૂપિયાની માતબર જોગવાઈ કરવામાં આવી છે, જે ગત વર્ષ કરતા ૧૭% વધુ છે. આ બજેટનો મોટો હિસ્સો અમદાવાદ અને અન્ય શહેરોને ‘ઓલિમ્પિક રેડી સિટી’ બનાવવા પાછળ ખર્ચાશે, જેમાં આંતરરાષ્ટ્રીય સ્તરના સ્પોર્ટ્સ કોમ્પ્લેક્સ અને સ્ટેડિયમનું નિર્માણ થશે. કોમનવેલ્થ ગેમ્સ ૨૦૩૦ના આયોજનના વિઝન સાથે ગુજરાત હવે ગ્લોબલ ઇવેન્ટ્સ માટે તૈયાર થઈ રહ્યું છે. સસ્ટેનેબલ ડેવલપમેન્ટ અને આધુનિક ઈન્ફ્રાસ્ટ્રક્ચર દ્વારા ગુજરાતના શહેરો રોકાણકારો અને નાગરિકો માટે આકર્ષણનું કેન્દ્ર બન્યા છે, જે રાજ્યના સર્વાંગી આર્થિક વિકાસમાં પાયાની ભૂમિકા ભજવી રહ્યા છે.
