ખાડી સંકટ પર પીએમ મોદીની સતત નજર: રાજ્યસભામાં વિદેશ મંત્રી એસ. જયશંકરનું મહત્વનું નિવેદન
પશ્ચિમ એશિયા અને ખાસ કરીને ખાડી દેશોમાં વધી રહેલા તણાવને લઈને ભારત સરકાર અત્યંત ગંભીર છે. આજે સોમવારે રાજ્યસભામાં વિદેશ મંત્રી ડો. એસ. જયશંકરે મધ્ય પૂર્વમાં ચાલી રહેલા યુદ્ધ અને ઈરાન પર અમેરિકા તથા ઈઝરાયેલના હુમલાઓ અંગે મહત્વનું નિવેદન આપ્યું હતું. તેમણે સ્પષ્ટ કર્યું હતું કે વડાપ્રધાન નરેન્દ્ર મોદી પોતે આ સમગ્ર સ્થિતિ પર સતત નજર રાખી રહ્યા છે.
મુત્સદ્દીગીરી અને શાંતિ માટે અપીલ
વિદેશ મંત્રીએ સદનમાં જણાવ્યું હતું કે, ભારત સરકાર હંમેશા સંવાદ અને કૂટનીતિ દ્વારા વિવાદોના ઉકેલની પક્ષધર રહી છે. તેમણે કહ્યું, “અમારી સરકારે 20 ફેબ્રુઆરીએ સત્તાવાર નિવેદન જારી કરીને આ મામલે ઊંડી ચિંતા વ્યક્ત કરી હતી. અમે તમામ પક્ષોને સંયમ રાખવા વિનંતી કરી છે. અમારું માનવું છે કે તણાવ ઘટાડવા માટે વાતચીત અને મુત્સદ્દીગીરીના માર્ગે આગળ વધવું જોઈએ.”
પીએમ મોદીની સક્રિય ભૂમિકા
જયશંકરે ગૃહને માહિતી આપી હતી કે વડાપ્રધાન મોદી આ સંકટને ટાળવા માટે વ્યક્તિગત રીતે સક્રિય છે. પીએમ મોદીએ ખાડી દેશોના નેતાઓ સાથે સીધી વાતચીત કરી છે. આ ઉપરાંત, ભારતીય વિદેશ મંત્રાલયે ઈરાનના વિદેશ મંત્રી સાથે પણ ચર્ચા કરી છે, જેથી કરીને પ્રાદેશિક સ્થિરતા જાળવી શકાય. યુદ્ધમાં જે નિર્દોષ લોકોએ જીવ ગુમાવ્યા છે, તે બદલ વિદેશ મંત્રીએ ઊંડા દુઃખની લાગણી વ્યક્ત કરી હતી.
વિરોધ પક્ષના હોબાળા વચ્ચે નિવેદન
રાજ્યસભામાં જ્યારે વિદેશ મંત્રી પોતાનું નિવેદન આપી રહ્યા હતા, ત્યારે વિરોધ પક્ષના સાંસદો દ્વારા સૂત્રોચ્ચાર કરવામાં આવી રહ્યા હતા. જોકે, ભારે હોબાળા વચ્ચે પણ એસ. જયશંકરે ભારતનું વલણ સ્પષ્ટ કર્યું હતું. તેમણે ભારપૂર્વક જણાવ્યું કે પશ્ચિમ એશિયાની સ્થિતિ ભારત માટે વ્યૂહાત્મક અને આર્થિક રીતે અત્યંત મહત્વની છે, કારણ કે ત્યાં લાખો ભારતીયો વસે છે અને ભારતની ઉર્જા સુરક્ષા તેની સાથે જોડાયેલી છે.
