ગુજરાત વિધાનસભા ચૂંટણી વખતે રાહુલ ગાંધી માટે અને તેમની સાથે જોરદાર ચૂંટણી પ્રચાર કરનાર પાટીદાર અનામત આંદોલન નેતા હાર્દિક પટેલે શુક્રવારે એક નિવેદન આપતા કહ્યું કે, ‘રાહુલ ગાંધી મારા નેતા નથી. હું તેમને નેતા માનતો નથી.’ જોકે હાર્દિકે રાહુલ ગાંધીની બહેન પ્રયિંકા ગાંધી વાડ્રાને સક્રિય રાજનીતિમાં આવવા અંગે સમર્થન જાહેર કર્યું હતું.
હાર્દિકે આ સાથે જ બીજી મોટી જાહેરાત કરી કે આગામી લોકસભા ચૂંટણી વખતે તે 25 વર્ષનો થઈ ગયો હશે તેમ છતા ચૂંટણી નહીં લડે અને તેને ગર્લફ્રેન્ડ પણ છે. મુંબઈ ખાતે એક કાર્યક્રમમાં હાજરી આપવા દરમિયાન તેણે આ વાતો કહી હતી.
હાર્દિકે કહ્યું કે, ‘વ્યક્તિગત સ્તરે હું રાહુલ ગાંધીને પસંદ કરું છું. પરંતુ તેમને નેતા નથી માનતો કેમ કે તેઓ મારા નેતા નથી.’ ઉલ્લેખનીય છે કે 2 મહિના પહેલા જ રાહુલ ગાંધી સાથે ચૂંટણી પ્રચાર માટે હાર્દિકે સમગ્ર ગુજરાતનો પ્રવાસ ખેડ્યો હતો. હાર્દિકે ત્યાં સુધી દાવો કર્યો કે જો કોંગ્રેસ પૂર્ણરુપે પાટીદાર અનામત આંદોલનના સમર્થનમાં આવ્યું હોત તો ભાજપને માત્ર 66 બેઠકો જ મળી હોત અને કોંગ્રેસ સત્તામાં આવી શક્યું હોત.
હાર્દિકે કહ્યું કે, ‘તેમ છતા પણ ગુજરાત વિધાનસભામાં કોંગ્રેસની વધેલી હાજરીને જોઈને મને ખૂબ આનંદ થાય છે. હવે ગુજરાતની જનતાનો અવાજ વિધાનસભામાં કોઈ ઉઠાવી રહ્યું છે.’ તેમજ તે આગામી લોકસભામાં ચૂંટણી લડશે કે નહીં તે સવાલ પર હાર્દિકે ના પાડતા કહ્યું કે, ‘હું ભલે 25 વર્ષનો થઈ જાવ પરંતુ હાલ લોકસભા લડવાનો કોઈ પ્લાન નથી.’
જ્યારે તેમના અંગત જીવન અંગે પૂછવામાં આવ્યું ત્યારે તેમણે સ્વીકાર્યું કે ‘હા મારી ગર્લફ્રેન્ડ છે અને અમે બંને લગ્ન કરવાના છીએ.’ તેણે કહ્યું કે, ‘મારે ગર્લફ્રેન્ડ છે તે સ્વીકારવામાં કોઈ શરમ નથી.’ તો સેક્સ સીડી પર પણ તેણે ખુલ્લા મને વાત કરતા કહ્યું કે, ‘હું મારા રુમમાં શું કરું છું તેનાથી કોઇને કશો મતલબ નથી. હું લોકોને કેમ કરીને સમજાવું કે આ મારી પર્સનલ લાઇફ પણ છે.’
હાર્દિકે કહ્યું કે, ‘ભાજપે રામ મંદિર નામે લોકોને જ નહીં તેના સાથી ટેકેદારોને પણ છેતર્યા છે. રામ મંદિર બંધાવશે તેમ કહીને સત્તા તો મેળવી લીધી પરંતુ હવે બજરંગ દળ અને વિશ્વ હિંદૂ પરિષદના કાર્યકર્તાઓને રામ મંદિરની વાત ન કરવા અને જો કરશે તો પોલીસનો ડર દેખાડી રહ્યા છે.
Dipal
Satyaday, Gujarat’s largest language media group, brings to you the most comprehensive Gujarati News Website. The app covers Latest Gujarati news from all around the world giving you a complete up-to-date coverage on news anytime and anywhere.