સંસદમાં ઘમાસાણ: રાહુલ ગાંધીના ‘ઓપરેશન સિંદૂર’ અને ‘નોટબંધીના જાદુગર’ નિવેદન પર હોબાળો
ભારતીય સંસદમાં મહિલા અનામત બિલના અમલીકરણ અને સીમાંકન પ્રક્રિયાને લઈને ચાલી રહેલી ચર્ચાએ શુક્રવારે ત્યારે નવું વળાંક લીધો જ્યારે લોકસભામાં વિપક્ષના નેતા રાહુલ ગાંધીએ આક્રમક તેવર અપનાવ્યા. રાહુલ ગાંધીએ સરકાર પર આકરા પ્રહારો કરતા સીમાંકન અને નોટબંધી જેવા મુદ્દાઓને વણી લઈને વડાપ્રધાન મોદી પર પરોક્ષ નિશાન સાધ્યું હતું. આ નિવેદનોને કારણે ગૃહમાં ભારે હોબાળો થયો અને અંતે સ્પીકરે વિવાદિત ટિપ્પણીઓને રેકોર્ડ પરથી દૂર કરવાનો આદેશ આપવો પડ્યો.
રાહુલ ગાંધીના પ્રહાર: “આ બિલ મહિલા સશક્તિકરણ નહીં, પણ અન્યાય છે”
લોકસભામાં ચર્ચા દરમિયાન રાહુલ ગાંધીએ મહિલા અનામત બિલના વર્તમાન સ્વરૂપ સામે સખત વાંધો ઉઠાવ્યો હતો. તેમણે કહ્યું કે, “આ બિલ મહિલાઓને વાસ્તવિક રીતે સશક્ત બનાવવાનું સાધન નથી, પરંતુ આ એક શરમજનક કાયદો છે.” તેમણે સરકારને પડકાર ફેંકતા જણાવ્યું કે જો સરકાર ખરેખર મહિલાઓનું ભલું ઈચ્છતી હોય તો જૂનું બિલ (જેમાં સીમાંકનની શરત નહોતી) લાવવું જોઈએ, તો જ વિપક્ષ તેને સમર્થન આપશે.
રાહુલ ગાંધીનો મુખ્ય આરોપ એ હતો કે આ બિલનો ઉપયોગ માત્ર ભારતના મતવિસ્તારોના નકશા બદલવા માટે કરવામાં આવી રહ્યો છે. તેમના મતે, મહિલા અનામતના ઓઠા હેઠળ સરકાર પોતાની સત્તાકીય ગણતરીઓ પૂરી કરવા માંગે છે.
OBC અને દલિત કાર્ડ: “ક્રૂરતાની પરાકાષ્ઠા”
રાહુલ ગાંધીએ આ બિલને સામાજિક ન્યાયના પરિપ્રેક્ષ્યમાં પણ જોયું. તેમણે કહ્યું કે, “ભારતના ઇતિહાસનું આ સૌથી કડવું સત્ય છે કે આ બિલમાં ઓબીસી (OBC) અને દલિત વર્ગો માટે કોઈ ખાસ જોગવાઈ નથી. આ બિલ આ પછાત વર્ગો માટે ક્રૂરતા સમાન છે.”
તેમણે આરોપ લગાવ્યો કે સરકાર ઓબીસી સમુદાયના અધિકારો છીનવી લેવા માંગે છે. રાહુલ ગાંધીના મતે, જ્યાં સુધી અનામતમાં જ્ઞાતિ આધારિત પેટા-અનામત (Quota within Quota) આપવામાં નહીં આવે, ત્યાં સુધી મહિલા અનામતનો લાભ માત્ર ઉચ્ચ વર્ગની મહિલાઓ સુધી સીમિત રહેશે અને પછાત વર્ગની મહિલાઓ વંચિત રહી જશે.
‘ઓપરેશન સિંદૂર’ અને ‘જાદુગર’ પર વિવાદ
ભાષણ દરમિયાન જ્યારે રાહુલ ગાંધીએ વડાપ્રધાન મોદીનું નામ લીધા વિના “ઓપરેશન સિંદૂર અને નોટબંધીનો જાદુગર પકડાઈ ગયો છે” એવી ટિપ્પણી કરી, ત્યારે ગૃહમાં તણાવની સ્થિતિ સર્જાઈ. આ શબ્દપ્રયોગ સાંભળતા જ એનડીએ (NDA) ના સાંસદોએ ઊભા થઈને વિરોધ પ્રદર્શન શરૂ કરી દીધું.
સત્તાધારી પક્ષના સાંસદોએ આક્ષેપ કર્યો કે રાહુલ ગાંધી દેશના વડાપ્રધાનનું અપમાન કરી રહ્યા છે અને અભદ્ર ભાષાનો ઉપયોગ કરી રહ્યા છે. હોબાળાને જોતા સ્પીકર ઓમ બિરલાએ તાત્કાલિક હસ્તક્ષેપ કર્યો અને રાહુલ ગાંધીના ભાષણમાંથી આ વિવાદિત અંશોને સંસદની કાર્યવાહીમાંથી હટાવી દેવાનો નિર્ણય લીધો.
સીમાંકન અને સીટોનો વધારો: વિપક્ષની શંકા
હાલમાં લોકસભામાં ત્રણ સુધારેલા બિલો પર ચર્ચા ચાલી રહી છે, જે અંતર્ગત સીમાંકન બાદ લોકસભાની બેઠકોની સંખ્યામાં ધરખમ વધારો થઈ શકે છે. રાહુલ ગાંધી અને અન્ય વિપક્ષી નેતાઓનો તર્ક છે કે સીમાંકન પ્રક્રિયાથી દક્ષિણ ભારતના રાજ્યોને અન્યાય થશે અને ઉત્તર ભારતના રાજ્યો, જ્યાં ભાજપ મજબૂત છે, ત્યાં બેઠકો વધી જશે.
વિપક્ષનું કહેવું છે કે જો સરકારની દાનત સાફ હોય તો વસ્તી ગણતરી અને સીમાંકનની રાહ જોયા વિના અત્યારે જ મહિલા અનામત લાગુ કેમ કરવામાં આવતી નથી?
