આગામી ૧૨ કલાકમાં ૧૧ રાજ્યોમાં વાવાઝોડા સાથે વરસાદની ચેતવણી, ગુજરાત માટે શું છે આગાહી?
દેશભરમાં હવામાનનો મિજાજ ફરી એકવાર પલટાયો છે. ભારતીય હવામાન વિભાગ (IMD) એ આજે ૮ એપ્રિલ માટે એક મોટી ચેતવણી જારી કરી છે. દિલ્હી, ઉત્તર પ્રદેશ, બિહાર અને ગુજરાત સહિત ૧૧ રાજ્યોમાં આગામી ૧૨ થી ૨૪ કલાક દરમિયાન ભારે પવન, વીજળીના કડાકા અને ગાજવીજ સાથે વરસાદ પડવાની સંભાવના છે. પવનની ગતિ કેટલીક જગ્યાએ ૮૫ કિમી પ્રતિ કલાક સુધી પહોંચી શકે છે, જે પાક અને કાચા મકાનો માટે નુકસાનકારક સાબિત થઈ શકે તેમ છે.
ગુજરાતમાં ક્યાં અને કેવો વરસાદ પડશે?
હવામાન વિભાગના લેટેસ્ટ બુલેટિન અનુસાર, આજે ૮ એપ્રિલે ગુજરાત રાજ્યના મોટાભાગના વિસ્તારોમાં વાવાઝોડા અને વીજળી સાથે છૂટાછવાયા હળવાથી મધ્યમ વરસાદની આગાહી છે.
-
ઉત્તર અને મધ્ય ગુજરાત: બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, દાહોદ અને મહિસાગરમાં પવન સાથે વરસાદની શક્યતા છે.
-
દક્ષિણ ગુજરાત: વડોદરા, છોટા ઉદેપુર, નર્મદા, ભરૂચ, તાપી અને ડાંગમાં મેઘમહેર થઈ શકે છે.
-
સૌરાષ્ટ્ર અને કચ્છ: સુરેન્દ્રનગર, રાજકોટ, જામનગર, અમરેલી, ભાવનગર, મોરબી, દ્વારકા, બોટાદ અને કચ્છ જિલ્લામાં ૩૦-૪૦ કિમીની ઝડપે પવન ફૂંકાવાની સાથે વરસાદની આગાહી છે.
અન્ય રાજ્યોની સ્થિતિ
૧. દિલ્હી અને એનસીઆર: ૫૦ કિમીની ઝડપે પવન ફૂંકાશે અને ભારે વરસાદ સાથે વાવાઝોડાની શક્યતા છે. ૨. ઉત્તર પ્રદેશ અને બિહાર: લખનૌ, પટના સહિત અનેક જિલ્લાઓમાં ૬૦-૮૦ કિમીની ઝડપે પવન ફૂંકાશે. બિહારમાં ભારે વરસાદની ચેતવણી છે. ૩. રાજસ્થાન અને હરિયાણા: જયપુર, અલવર અને ગુરુગ્રામમાં ધૂળની ડમરીઓ સાથે વરસાદની શક્યતા છે. પવનની ગતિ ૭૦ કિમી સુધી જઈ શકે છે. ૪. પહાડી રાજ્યો: ઉત્તરાખંડ અને હિમાચલ પ્રદેશમાં કરા પડવાની અને મધ્યમ વરસાદની આગાહી કરવામાં આવી છે.
ખેડૂતો અને સામાન્ય જનતા માટે સૂચના
હવામાન વિભાગે ખેડૂતોને તૈયાર પાક સુરક્ષિત સ્થળે ખસેડવા સલાહ આપી છે. વાવાઝોડા અને વીજળીના કડાકા વખતે ઝાડ નીચે અથવા નબળા બાંધકામો પાસે ઉભા ન રહેવા અપીલ કરવામાં આવી છે. પૂર્વી ભારતના રાજ્યોમાં તાપમાનમાં ૨ થી ૩ ડિગ્રીનો ઘટાડો થતાં ગરમીથી થોડી રાહત મળશે, પરંતુ આ કમોસમી વરસાદ આર્થિક નુકસાન લાવી શકે છે.
