રાજસ્થાન રોયલ્સનો મોટો ધડાકો: ₹16,000 કરોડની ડીલ ઠુકરાવી! અબજોની ઓફર છતાં કેમ ટીમ ન વેચી?
આઈપીએલ 2026ની શરૂઆત પહેલા ક્રિકેટના મેદાનની બહાર એક મોટું આર્થિક તોફાન આવ્યું છે. આઈપીએલની પ્રથમ વિજેતા ટીમ રાજસ્થાન રોયલ્સ (RR) ને ખરીદવા માટે એક કંપનીએ ₹16,000 કરોડની જંગી ઓફર આપી હતી, પરંતુ રોયલ્સના માલિકોએ આ ડીલને ઠુકરાવી દીધી છે. આ નિર્ણય દ્વારા ફ્રેન્ચાઈઝીએ સંકેત આપ્યો છે કે તેમની ટીમની કિંમત બજારમાં આના કરતા પણ ઘણી વધારે છે.
કેમ ઠુકરાવી ₹16,000 કરોડની ઓફર?
IPL 2026 ની શરૂઆત 28 માર્ચથી થવાની છે, તે પહેલા ફ્રેન્ચાઈઝીના વેચાણની ચર્ચાઓ તેજ બની છે. અહેવાલો મુજબ, યુનાઈટેડ સ્ટેટ્સ અને કેનેડામાં ફેલાયેલી ઇન્વેસ્ટમેન્ટ બેન્કિંગ કંપની CPCP કન્સોર્ટિયમે રાજસ્થાન રોયલ્સ માટે 1.7 બિલિયન ડોલર (આશરે ₹16,000 કરોડ) ની બોલી લગાવી હતી.
CPCP ના માલિકો નિશા સચદેવા અને દેબજીત ગુપ્તાએ તો બે અઠવાડિયામાં જ આખી પેમેન્ટ કરી દેવાનું વચન પણ આપ્યું હતું. તેમ છતાં, રાજસ્થાન રોયલ્સના બોર્ડે આ ઓફર નકારી કાઢી છે. માર્કેટ નિષ્ણાતોના મતે, રોયલ્સના માલિકો પોતાની ટીમની કિંમત આનાથી પણ વધુ આંકી રહ્યા છે અને આ અન્ય રોકાણકારો માટે એક સ્પષ્ટ સંદેશ છે કે જો તેઓ ટીમ ખરીદવા માંગતા હોય તો તેમણે મોટી રકમ ખર્ચવી પડશે.
સંજુ સેમસન વિના નવા યુગની શરૂઆત
આ વખતે રાજસ્થાન રોયલ્સની ટીમમાં મોટા ફેરફારો જોવા મળી રહ્યા છે. સ્ટાર ખેલાડી સંજુ સેમસન ચેન્નાઈ સુપર કિંગ્સમાં જોડાયા બાદ હવે ટીમની કમાન રિયાન પરાગના હાથમાં સોંપવામાં આવી છે. 2008માં પ્રથમ ખિતાબ જીત્યા બાદ રાજસ્થાનની ટીમ બીજી ટ્રોફીથી દૂર રહી છે. હવે નવા કેપ્ટન અને નવી રણનીતિ સાથે ટીમ મેદાનમાં ઉતરશે.
ટીમનો મજબૂત ગઢ: રવીન્દ્ર જાડેજા અને રવિ બિશ્નોઈની એન્ટ્રી
આ સીઝન માટે રાજસ્થાન રોયલ્સનું સ્ક્વોડ ઘણું સંતુલિત અને મજબૂત દેખાઈ રહ્યું છે. ટીમમાં રવીન્દ્ર જાડેજા અને રવિ બિશ્નોઈ જેવા દિગ્ગજ ખેલાડીઓના જોડાવાથી બોલિંગ અને ઓલરાઉન્ડ વિભાગ મજબૂત બન્યો છે. યશસ્વી જાયસ્વાલ અને શિમરોન હેટમાયર જેવા આક્રમક બેટ્સમેનો ટીમની બેટિંગ લાઈન-અપને મજબૂતી આપી રહ્યા છે.
RRનું સંપૂર્ણ સ્ક્વોડ
યશસ્વી જાયસ્વાલ, રિયાન પરાગ, ધ્રુવ જુરેલ, શિમરોન હેટમાયર, જોફ્રા આર્ચર, સંદીપ શર્મા, તુષાર દેશપાંડે, ક્વેના મફાકા, નાન્દ્રે બર્ગર, શુભમ દુબે, વૈભવ સૂર્યવંશી, લુઆન-ડ્રે પ્રિટોરિયસ, યુદ્ધવીર સિંહ ચરક, રવીન્દ્ર જાડેજા, સેમ કરન, ડોનોવન ફરેરા, રવિ બિશ્નોઈ, એડમ મિલ્ને, રવિ સિંહ, સુશાંત મિશ્રા, કુલદીપ સેન, વિગ્નેશ પુથુર, યશ રાજ પુંજા, અમન રાવ પેરાલા, બ્રિજેશ શર્મા.
