વ્યવસ્થિત આયોજનથી રાજકોટ માર્કેટ યાર્ડમાં સફળ ઉતરાઈ અને હરાજી
રાજકોટ માર્કેટ યાર્ડમાં આજે ખેડૂતો દ્વારા મોટી માત્રામાં જણસી લાવવામાં આવી હતી. ખાસ કરીને કપાસ, ઘઉં, સોયાબીન અને મગની આવક સૌથી વધુ રહી હતી. ખેડૂતોને યોગ્ય ભાવ મળતા હોવાથી આસપાસના વિસ્તારોમાંથી પણ મોટી સંખ્યામાં ખેડૂતોએ અહીં વેચાણ માટે પાક લાવ્યો હતો. શાકભાજી વિભાગમાં ટામેટા અને બટાકાની આવક ખાસ નોંધપાત્ર રહી હતી.
૧,૧૦૦થી વધુ વાહનો સાથે ભારે આવક
તા. ૦૫/૦૧/૨૦૨૬, સોમવારના રોજ રાજકોટ માર્કેટ યાર્ડમાં અંદાજે ૧,૧૦૦થી વધુ વાહનોની નોંધણી કરવામાં આવી હતી. કપાસની આવક ૧૮,૦૦૦ મણ નોંધાઈ હતી, જ્યારે ઘઉં ૬,૭૦૦ મણ અને સોયાબીન ૪,૨૦૦ મણ જેટલી આવક થઈ હતી. મગ, અડદ, ચણા, તલ અને જીરું જેવી જણસીઓની આવક પણ નોંધપાત્ર રહી હતી. તમામ વાહનોને ક્રમબદ્ધ રીતે પ્રવેશ આપી વ્યવસ્થિત રીતે ઉતરાઈ કરવામાં આવી હતી.
વ્યવસ્થિત આયોજનથી સુચારુ કામગીરી
આ સમગ્ર પ્રક્રિયા દરમિયાન માર્કેટ યાર્ડમાં સુવ્યવસ્થિત આયોજન કરવામાં આવ્યું હતું. ચેરમેન જયેશભાઈ બોઘરા, વાઇસ ચેરમેન, ડિરેક્ટરો અને સ્ટાફ દ્વારા સમગ્ર વ્યવસ્થા સંભાળવામાં આવી હતી. ખેડૂતો અને વેપારીઓને કોઈ પણ પ્રકારની અસુવિધા ન પડે તે માટે ખાસ તકેદારી રાખવામાં આવી હતી. પરિણામે ઉતરાઈ અને હરાજીની કામગીરી સરળતાથી પૂર્ણ થઈ હતી.
જણસીના આજના ભાવ
આજે ખેડૂતોને કપાસના ભાવ ૧૩૫૦થી ૧૫૮૦ રૂપિયા પ્રતિ મણ મળ્યા હતા. ઘઉંના ભાવ ૫૦૩થી ૫૪૦ રૂપિયા, સોયાબીનના ૮૮૨થી ૯૬૧ રૂપિયા અને મગના ૧૧૦૦થી ૧૯૫૦ રૂપિયા નોંધાયા હતા. ચણા, અડદ, લસણ, સિંગફાડા, તલ અને જીરુંના ભાવમાં પણ સંતોષકારક લેવલ જોવા મળ્યો હતો. ખેડૂતો માટે આ ભાવો લાભદાયી સાબિત થયા છે.
શાકભાજીમાં ટામેટા અને બટાકાની ચાલ
શાકભાજી વિભાગમાં સૂકી ડુંગળીની આવક ૪,૭૦૦ ક્વિન્ટલ નોંધાઈ હતી. ડુંગળીના ભાવ ૬૧થી ૨૭૬ રૂપિયા પ્રતિ મણ રહ્યા હતા. બટાકાની આવક ૩,૬૦૦ ક્વિન્ટલ અને ભાવ ૧૧૩થી ૩૨૭ રૂપિયા રહ્યા હતા. ટામેટાની આવક ૧,૧૦૯ ક્વિન્ટલ નોંધાઈ હતી અને તેના ભાવ ૪૨૭થી ૮૩૨ રૂપિયા સુધી રહ્યા હતા.
બહારના જિલ્લાઓથી પણ ખેડૂતોની આવક
રાજકોટ માર્કેટ યાર્ડમાં મળતા યોગ્ય ભાવને કારણે માત્ર રાજકોટ નહીં પરંતુ આસપાસના વિસ્તારોમાંથી પણ ખેડૂતો અહીં આવે છે. મોરબી, સુરેન્દ્રનગર, હળવદ સહિતના વિસ્તારોના ખેડૂતો પોતાનો પાક વેચવા રાજકોટ માર્કેટ યાર્ડ પસંદ કરે છે. આ કારણે યાર્ડની આવક અને વેપાર પ્રવૃત્તિમાં સતત વધારો જોવા મળી રહ્યો છે.
