અમેરિકાને તેના જ ઘરમાં ઘેરવાની તૈયારી: ઈરાન અને રશિયાએ ક્યુબાને મોકલ્યા 300 ઘાતક ડ્રોન, ટ્રમ્પ વહીવટીતંત્ર એલર્ટ
વૈશ્વિક રાજકારણ અને સત્તાની ખેંચતાણ હવે અમેરિકાના ઘર આંગણે આવી પહોંચી છે. ઈરાન અને રશિયાએ અમેરિકાના કટ્ટર હરીફ ગણાતા પડોશી દેશ ક્યુબા સાથે મળીને એક નવો મોરચો ખોલી દીધો છે. એક તાજેતરના અમેરિકી ગુપ્તચર અહેવાલમાં દાવો કરવામાં આવ્યો છે કે ક્યુબાએ રશિયા અને ઈરાન પાસેથી 300થી વધુ આધુનિક સૈન્ય ડ્રોન ખરીદ્યા છે.
આ અહેવાલ સામે આવ્યા બાદ વૉશિંગ્ટન (અમેરિકા) ના રાજકીય વર્તુળોમાં હડકંપ મચી ગયો છે. અમેરિકી સુરક્ષા એજન્સીઓનું માનવું છે કે આ ડ્રોનનો ઉપયોગ અમેરિકાના દરિયાઈ જહાજો અને મહત્વના નૌકાદળના મથકોને નિશાન બનાવવા માટે થઈ શકે છે, જે અમેરિકાની રાષ્ટ્રીય સુરક્ષા સામે અત્યાર સુધીનો સૌથી મોટો પડકાર છે.
ગ્વાન્તાનામો બે અને ફ્લોરિડા પર તોળાતું સંકટ
અહેવાલ મુજબ, અમેરિકી ગુપ્તચર એજન્સીઓને પાકા અહેવાલો મળ્યા છે કે ક્યુબા વર્ષ 2023થી જ રશિયા અને ઈરાન પાસેથી સતત ‘એટેક ડ્રોન’ (હુમલાખોર ડ્રોન) ની ખરીદી કરી રહ્યું છે અને હવે તે આ ભંડારને વધુ મોટો કરવાની તૈયારીમાં છે.
નિષ્ણાતોના મતે, ક્યુબા આ ડ્રોનનો ઉપયોગ અમેરિકાના પ્રખ્યાત નૌકાદળ મથક ‘ગ્વાન્તાનામો બે’ (Guantanamo Bay), કેરેબિયન સમુદ્રમાં ફરતા અમેરિકી જહાજો અને ફ્લોરિડાના વ્યૂહાત્મક રીતે મહત્વપૂર્ણ એવા ‘કી વેસ્ટ’ (Key West) વિસ્તારને નિશાન બનાવવા માટે કરી શકે છે. અમેરિકાની આટલી નજીક ઘાતક ડ્રોન ટેક્નોલોજી પહોંચવી એ ભૌગોલિક રાજનીતિમાં એક મોટો વળાંક માનવામાં આવે છે.
ટ્રમ્પ વહીવટીતંત્રની ચિંતા અને ઈરાની સલાહકારોની હાજરી
આ ઘટનાક્રમને લઈને રાષ્ટ્રપતિ ડોનાલ્ડ ટ્રમ્પનું પ્રશાસન અત્યંત ચિંતિત છે. અમેરિકી વરિષ્ઠ અધિકારીઓનું કહેવું છે કે ક્યુબાની રાજધાની હવાનામાં માત્ર ડ્રોન જ નથી પહોંચ્યા, પરંતુ તેની સાથે ઈરાની સૈન્ય સલાહકારો (Military Advisors) પણ ત્યાં હાજર છે, જે ક્યુબાના સૈનિકોને આ ડ્રોન ઓપરેટ કરવાની તાલીમ આપી રહ્યા છે.
એક વરિષ્ઠ અમેરિકી અધિકારીએ નામ ન આપવાની શરતે જણાવ્યું કે, “અમેરિકાની સરહદની આટલી નજીક આવી આધુનિક ટેક્નોલોજી અને ડ્રોન વોરફેરનું પહોંચવું એ ગંભીર બાબત છે. આંતરરાષ્ટ્રીય આતંકવાદી સંગઠનો, ડ્રગ કાર્ટેલ અને રશિયા-ઈરાન જેવા અમેરિકા વિરોધી દેશોની સક્રિયતાને જોતા આ ખતરો આગામી દિવસોમાં વધુ ભયાનક સ્વરૂપ લઈ શકે છે.”
ક્યુબાનો અમેરિકા પર પલટવાર: “આ માત્ર યુદ્ધનું બહાનું છે”
આ સનસનાટીભર્યા અહેવાલો બહાર આવ્યા બાદ ક્યુબાએ પણ અમેરિકા સામે આક્રમક વલણ અપનાવ્યું છે. ક્યુબાના વિદેશ મંત્રી બ્રુનો રોડ્રિગેઝ પારિલાએ અમેરિકાના આ તમામ આરોપોને પાયાવિહોણા અને સસ્તી કાવતરાખોરી ગણાવ્યા છે. તેમણે સોશિયલ મીડિયા પ્લેટફોર્મ ‘X’ પર અમેરિકાની આકરી ટીકા કરતા લખ્યું:
“અમેરિકા ક્યુબા વિરૂદ્ધ ખોટા અને મનગડત આરોપો લગાવીને વૈશ્વિક સ્તરે દુષ્પ્રચાર કરી રહ્યું છે. આ કાવતરા પાછળનો અસલી હેતુ ક્યુબા પર આર્થિક દબાણ વધારવાનો અને ભવિષ્યમાં અમારી સામે કોઈ લશ્કરી કાર્યવાહી કરવા માટેનું નકલી બહાનું તૈયાર કરવાનો છે. ક્યુબા એક શાંતિપ્રિય દેશ છે, અમે ન તો યુદ્ધ ઈચ્છીએ છીએ અને ન તો કોઈને ધમકી આપીએ છીએ.” – બ્રુનો રોડ્રિગેઝ, વિદેશ મંત્રી, ક્યુબા
જો કે, ક્યુબાના વિદેશ મંત્રીએ પોતાના નિવેદનમાં રશિયા અને ઈરાન પાસેથી ડ્રોન ખરીદવાની વાતનો સીધો ઈન્કાર કર્યો નથી, જેને કારણે અમેરિકાની શંકા વધુ મજબૂત બની છે.
અમેરિકી પ્રતિબંધો અને ક્યુબામાં સર્જાયેલું વીજ સંકટ
અમેરિકા અને ક્યુબા વચ્ચેનો શીતયુદ્ધ (Cold War) ના સમયનો દાયકાઓ જૂનો તણાવ હાલમાં ફરી વકર્યો છે. ટ્રમ્પ વહીવટીતંત્ર ક્યુબાને આર્થિક રીતે પાયમાલ કરવા માટે તેના પર સતત નવા કડક પ્રતિબંધો લાદી રહ્યું છે. તાજેતરમાં જ ટ્રમ્પે ક્યુબાને ક્રૂડ ઓઈલ (તેલ) સપ્લાય કરતા દેશોને પણ ભારે ટેરિફ અને દંડ ફટકારવાની ધમકી આપી છે.
અમેરિકાના આ આર્થિક નાકાબંધીના કારણે ક્યુબામાં અત્યારે ઈંધણની ભારે અછત સર્જાઈ છે, જેને લીધે આખા દેશમાં ભયાનક વીજળી સંકટ (Power Crisis) ઊભું થયું છે અને કલાકો સુધી પાવર કટ રહે છે. આ તણાવ વચ્ચે, રાષ્ટ્રપતિ ટ્રમ્પે તાજેતરમાં એવું વિવાદાસ્પદ નિવેદન પણ આપ્યું હતું કે અમેરિકા ખૂબ જ ટૂંક સમયમાં ક્યુબા પર સંપૂર્ણ કબજો મેળવી શકે છે.
Sin excusa legítima alguna, el gobierno de #EEUU construye, día tras día, un expediente fraudulento para justificar la guerra económica despiadada contra el pueblo cubano y la eventual agresión militar.
Medios de prensa específicos le hacen el juego, promoviendo calumnias y…
— Bruno Rodríguez P (@BrunoRguezP) May 17, 2026
સિંગલ આઉટ એક્શન: રાઉલ કાસ્ટ્રો અને CIA ચીફની કડક ચેતવણી
આ દરમિયાન એવી પણ અટકળો તેજ થઈ છે કે અમેરિકા ક્યુબાના પૂર્વ રાષ્ટ્રપતિ રાઉલ કાસ્ટ્રો (જેઓ ક્યુબાના પ્રખ્યાત ક્રાંતિકારી નેતા ફિદેલ કાસ્ટ્રોના ભાઈ છે) વિરૂદ્ધ કોઈ મોટી સીધી કાર્યવાહી કરવાની યોજના બનાવી રહ્યું છે. આ વધતા જતા તણાવ વચ્ચે અમેરિકી ગુપ્તચર એજન્સી સીએઆઈ (CIA) ના ચીફ જોન રેટક્લિફે અચાનક ક્યુબાની મુલાકાત લીધી હતી.
અહેવાલ અનુસાર, સીએઆઈ ચીફે ક્યુબાના ટોચના નેતૃત્વને કડક શબ્દોમાં અંતિમ ચેતવણી આપી છે કે, ક્યુબા અમેરિકાના કટ્ટર દુશ્મનો (રશિયા અને ઈરાન) માટે સેફ હેવન (સુરક્ષિત આશ્રયસ્થાન) બનવાનો પ્રયાસ ન કરે, અન્યથા તેના પરિણામો આખા ક્યુબાએ ભોગવવા પડશે.
