T20 વર્લ્ડ કપમાં ન મળી તક, હવે શુભમન ગિલે જણાવ્યું પોતાનું આગામી લક્ષ્ય; નજર વધુ એક ICC ટ્રોફી પર
ભારતીય ટેસ્ટ અને વનડે ટીમના કેપ્ટન શુભમન ગિલને તાજેતરમાં રમાયેલા T20 વર્લ્ડ કપ 2026માં રમવાની તક મળી ન હતી. ખરાબ ફોર્મને કારણે તેને ટીમમાંથી બહાર રાખવામાં આવ્યો હતો. જોકે, આ નિરાશાને પાછળ છોડીને હવે ગિલે સ્પષ્ટ કર્યું છે કે તેનું સંપૂર્ણ ધ્યાન 2027ના વનડે વર્લ્ડ કપ પર છે. ગિલનું લક્ષ્ય આગામી સમયમાં ટીમ ઈન્ડિયા માટે વધુ આઈસીસી ટ્રોફી જીતવાનું છે.
2027 વર્લ્ડ કપ જીતવું એ સૌથી મોટું લક્ષ્ય
BCCI ‘નમન એવોર્ડ્સ’ દરમિયાન સ્ટાર સ્પોર્ટ્સ સાથે વાત કરતા શુભમન ગિલે પોતાના ભવિષ્યના આયોજન વિશે વાત કરી હતી. જ્યારે તેને પૂછવામાં આવ્યું કે શું તે આગામી વનડે વર્લ્ડ કપ વિશે વિચારે છે, ત્યારે તેણે કહ્યું, “ચોક્કસ, હું તેના વિશે વિચારું છું. એ જ અમારું સૌથી મોટું લક્ષ્ય છે. છેલ્લી વખતે જ્યારે અમે ભારતમાં વર્લ્ડ કપ રમી રહ્યા હતા, ત્યારે અમે જીતની ખૂબ નજીક પહોંચી ગયા હતા. હવે દક્ષિણ આફ્રિકામાં અમને ફરીથી તે જીતવાની તક મળશે, જે અમારા માટે શાનદાર તક હશે.”
2013ની યાદો અને ચેમ્પિયન્સ ટ્રોફીનું સપનું
પોતાની સફરને યાદ કરતા ગિલે જણાવ્યું હતું કે, 2013માં જ્યારે ભારત ચેમ્પિયન્સ ટ્રોફી જીત્યું ત્યારે તે એક શાળાએ જતો બાળક હતો અને ટીવી પર મેચ જોઈ રહ્યો હતો. તેણે કહ્યું, “2013માં એક બાળક તરીકે તે જીત જોવી ખૂબ ખાસ હતી. વિરાટ ભાઈ, રોહિત ભાઈ, એશ ભાઈ અને માહી ભાઈ જેવા મારા આદર્શોને સ્ક્રીન પર ઈંગ્લેન્ડ સામે જીતતા જોવા એ અદ્ભુત અહેસાસ હતો.”
ગિલે વધુમાં ઉમેર્યું કે, “જ્યારે તમે દેશ માટે રમવાનું શરૂ કરો છો, ત્યારે તમારું સપનું આઈસીસી ટ્રોફી જીતવાનું હોય છે. લગભગ 12 વર્ષ પછી ચેમ્પિયન્સ ટ્રોફી જેવી મોટી ટુર્નામેન્ટ જીતવી એ હંમેશા યાદગાર રહેશે.”
વનડે ક્રિકેટમાં ગિલનું શાનદાર પ્રદર્શન
શુભમન ગિલ વનડે ફોર્મેટમાં ભારતનો સૌથી ભરોસાપાત્ર બેટ્સમેન રહ્યો છે. 2023ના વર્લ્ડ કપમાં પણ તેણે શાનદાર પ્રદર્શન કર્યું હતું. ભલે તેને T20 ફોર્મેટમાં પડતો મૂકવામાં આવ્યો હોય, પરંતુ વનડે અને ટેસ્ટમાં તે ટીમ ઈન્ડિયાના નેતૃત્વની સાથે સાથે બેટિંગની મુખ્ય ધરી પણ છે.
