POTM જીત્યા બાદ અભિષેક શર્માનો મોટો ખુલાસો, રોહિત શર્માનો ઉલ્લેખ કરતાં કહ્યું “હું તેના પગલે ચાલવાનો પ્રયાસ કરી રહ્યો છું”
ટીમ ઈન્ડિયાના યુવા અને વિસ્ફોટક ઓપનિંગ બેટ્સમેન અભિષેક શર્માએ 2026ની શરૂઆત પણ એ જ આત્મવિશ્વાસ અને આક્રમકતાથી કરી છે, જેમ રીતે તેણે 2025માં પોતાનું નામ સ્થાપિત કર્યું હતું. ન્યૂઝીલેન્ડ સામે રમાયેલી પાંચ મેચની T20 આંતરરાષ્ટ્રીય શ્રેણીની પહેલી મેચમાં અભિષેકે શાનદાર પ્રદર્શન કરી ટીમ ઈન્ડિયાને મજબૂત શરૂઆત અપાવી.
નાગપુરમાં રમાયેલી આ મેચમાં અભિષેક શર્માએ માત્ર 35 બોલમાં 84 રનની તોફાની ઇનિંગ રમી. તેની આ ઇનિંગમાં પાંચ ચોગ્ગા અને આઠ ભવ્ય છગ્ગાનો સમાવેશ થયો હતો. અભિષેકની આ બેફામ બેટિંગના કારણે ભારતે ન્યૂઝીલેન્ડ સામે 48 રનથી મોટી જીત મેળવી. આ શાનદાર પ્રદર્શન બદલ તેને ‘પ્લેયર ઓફ ધ મેચ’નો ખિતાબ પણ આપવામાં આવ્યો.
POTM બાદ રોહિત શર્માનું નામ લેતા અભિષેક
મેચ બાદ બ્રોડકાસ્ટર સાથે વાત કરતાં અભિષેક શર્માએ પોતાના ભૂતપૂર્વ ભારતીય કેપ્ટન રોહિત શર્માની ખુલ્લેઆમ પ્રશંસા કરી. તેણે કહ્યું,
“રોહિત ભાઈએ દેશ માટે ઘણું બધું કર્યું છે. આપણે સૌએ જોયું છે કે તેમણે ટીમને હંમેશા કેવી આક્રમક શરૂઆત અપાવી છે. જ્યારે હું ટીમમાં આવ્યો, ત્યારે કેપ્ટન અને કોચ બંને મારી પાસેથી પણ આવી જ શરૂઆતની અપેક્ષા રાખતા હતા. હું તેના પગલે ચાલવાનો પ્રયાસ કરી રહ્યો છું.”
અભિષેકે આગળ ઉમેર્યું કે આધુનિક T20 ક્રિકેટમાં પાવરપ્લેનો યોગ્ય ઉપયોગ ખૂબ જ મહત્વપૂર્ણ બની ગયો છે.
“ટીમ ઈન્ડિયા પ્રથમ છ ઓવરમાં મહત્તમ રન બનાવવાનું લક્ષ્ય રાખે છે. તેથી જ હું મેચ પહેલા પ્રેક્ટિસ દરમિયાન પણ એ જ પ્રકારની બેટિંગ કરું છું. મોટાભાગે દરેક ટીમ પોતાના મુખ્ય બોલરો પ્રથમ ત્રણ ઓવરમાં બોલિંગ માટે લાવે છે. જો આપણે ત્યાં જ રન બનાવી લઈએ, તો પછી આખી ઇનિંગમાં તેનો ફાયદો મળે છે.”
વિરોધી ટીમો મારી સામે ખાસ યોજના બનાવે છે
અભિષેક શર્માએ સ્વીકાર્યું કે હવે તે વિરોધી ટીમોની રણનીતિનો કેન્દ્રબિંદુ બની ગયો છે.
“શરૂઆતથી જ અમારી પાસે એક સ્પષ્ટ યોજના છે અને અમે તેને મેદાન પર અમલમાં મૂકવાનો પ્રયાસ કરીએ છીએ. જો તમારે 200ના સ્ટ્રાઇક રેટથી બેટિંગ કરવી હોય, તો માત્ર આક્રમકતા પૂરતી નથી, તમારી યોજના પણ મજબૂત હોવી જરૂરી છે.”
તેણે આગળ કહ્યું,
“હવે દરેક ટીમ મારી સામે અલગ યોજના બનાવે છે. તેથી મારા માટે મેદાન પર માનસિક અને તકનીકી રીતે તૈયાર રહેવું ખૂબ જરૂરી બની ગયું છે. હું પરિસ્થિતિ અનુસાર મારી જાતને ઢાળવાનો પ્રયાસ કરું છું. આ માટે હું નેટ સેશન દરમિયાન જ વિવિધ પરિસ્થિતિઓનું અનુસરણ કરું છું, જ્યાં બોલરો મને મારી સામે સંભવિત લાઈન્સ અને લેન્થ પર બોલિંગ કરે છે. પછી હું તે મુજબ મારા શોટ્સ તૈયાર કરું છું.”
ટીમ ઈન્ડિયાને મળ્યો વિશ્વસનીય ઓપનર
અભિષેક શર્માનું આ સતત પ્રદર્શન ટીમ ઈન્ડિયા માટે ખૂબ જ સકારાત્મક સંકેત છે, ખાસ કરીને T20 વર્લ્ડ કપને ધ્યાનમાં રાખીને. રોહિત શર્માની આક્રમક શરૂઆતની વિચારધારાને આગળ વધારતા અભિષેક હવે ભારતીય T20 ટીમના નવા ચહેરા તરીકે ઉભરી રહ્યો છે.
જો અભિષેક શર્મા આ જ રીતે ફોર્મ અને આત્મવિશ્વાસ જાળવી રાખે છે, તો તે આવનારા સમયમાં ટીમ ઈન્ડિયાના સૌથી ખતરનાક ઓપનિંગ બેટ્સમેન તરીકે પોતાની ઓળખ વધુ મજબૂત કરશે. ન્યૂઝીલેન્ડ સામેની શ્રેણીમાં મળેલી આ જીત સાથે ભારતીય ટીમનો ઉત્સાહ પણ ઊંચો છે અને અભિષેક શર્માની બેટિંગે ચાહકોની અપેક્ષાઓને વધુ વધારી દીધી છે.
