વડાપ્રધાનના આગમન પૂર્વે શૌર્ય યાત્રા માર્ગ પર યક્ષગાન, કુચિપુડી અને મણિયારો રાસનો સાંસ્કૃતિક મહોત્સવ
સોમનાથ સ્વાભિમાન પર્વ નિમિત્તે શંખ સર્કલથી હમીરજી સર્કલ સુધીના શૌર્ય યાત્રા માર્ગ પર મિની ભારત જેવો નજારો જોવા મળી રહ્યો છે. આ ભવ્ય માર્ગ પર અંદાજે ૨૦ જેટલા સ્ટેજ બનાવવામાં આવ્યા છે જ્યાં કર્ણાટક અને પશ્ચિમ બંગાળ સહિત દેશના વિવિધ રાજ્યોની સાંસ્કૃતિક પ્રસ્તુતિઓ રજૂ કરવામાં આવી રહી છે. એક ભારત શ્રેષ્ઠ ભારતના મંત્રને સાર્થક કરતા આ આયોજનમાં ભારતની વિવિધતામાં એકતાના દર્શન થાય છે જેનાથી યાત્રા માર્ગ જીવંત બન્યો છે.
વડાપ્રધાનના આગમન પૂર્વે કલાકારોનો જલવો
વડાપ્રધાન નરેન્દ્ર મોદીના સોમનાથ આગમન પૂર્વે સમગ્ર શૌર્ય યાત્રા માર્ગ પર કલાકારો દ્વારા અદભૂત પ્રદર્શન કરવામાં આવ્યું હતું. દેશના ખૂણેખૂણેથી આવેલા કલાકારોએ યક્ષગાન, કુચિપુડી નૃત્ય અને ભરતનાટ્યમ જેવા શાસ્ત્રીય નૃત્યો રજૂ કરીને સૌને મંત્રમુગ્ધ કર્યા હતા. આ સાથે ગુજરાતનો પ્રખ્યાત મણિયારો રાસ પણ આકર્ષણનું કેન્દ્ર બન્યો હતો. વિવિધતામાં એકતા દર્શાવતા આ કાર્યક્રમોએ સોમનાથના વાતાવરણમાં એક નવો જ આધ્યાત્મિક અને સાંસ્કૃતિક રંગ ઉમેર્યો છે.
શ્રદ્ધાળુઓ અને સ્થાનિકોની ભારે ભીડ
આ અનોખા સાંસ્કૃતિક નજારાને માણવા માટે સોમનાથમાં શ્રદ્ધાળુઓ અને સ્થાનિક નાગરિકોની ભારે ભીડ ઉમટી પડી છે. રસ્તાની બંને બાજુ ઉભા રહીને લોકો વિવિધ રાજ્યોની કલા અને સંસ્કૃતિને નિહાળી રહ્યા છે. સોમનાથ સ્વાભિમાન પર્વના ભાગરૂપે યોજાયેલા આ કાર્યક્રમોએ પ્રવાસીઓને ભારતની સમૃદ્ધ વિરાસતનો પરિચય કરાવ્યો છે. કલાકારોના ઉત્સાહ અને લોકોના પ્રતિસાદથી શૌર્ય યાત્રાનો માર્ગ ભક્તિ અને કલાના સંગમ સમાન બની ગયો છે.
