લગ્નના બહાને રૂ. 1.30 લાખની ઠગાઈ કરનાર ગેંગનો ફિલ્મી ઢબે પર્દાફાશ
સુરત શહેરમાં લગ્નના નામે છેતરપિંડી અને લૂંટ ચલાવતી એક સુનિયોજિત ‘લૂંટેરી દુલ્હન’ ગેંગ સામે ચોકબજાર પોલીસે મોટી કાર્યવાહી કરી છે. મહારાષ્ટ્રના બોઇસર વિસ્તારમાંથી ગેંગના બે મુખ્ય આરોપીઓને ઝડપી લઈ સુરત લાવવામાં આવ્યા છે. આરોપીઓએ લગ્ન કરાવવાના બહાને ફરીયાદી પાસેથી કુલ રૂ. 1.30 લાખની રકમ ઉઘરાવી તેને છેતર્યો હોવાનો ચોંકાવનારો ખુલાસો થયો છે. આ કેસથી શહેરમાં લગ્નના નામે થતા ઠગાઈના કિસ્સાઓ ફરી ચર્ચામાં આવ્યા છે.
પૂર્વયોજિત કાવતરું અને લગ્નના નામે છેતરપિંડી
ફરીયાદ મુજબ, જુલાઈ-2025થી 26 નવેમ્બર 2025 દરમિયાન આરોપીઓએ સુનિયોજિત રીતે કાવતરું રચ્યું હતું. રેખાદેવી યાદવ સાથે લગ્ન કરાવવા માટે તેના દસ્તાવેજોમાં ફેરફાર કરવો, સગાઈ અને ફુલહારથી લગ્ન કરવાના બહાને વિશ્વાસ ઉભો કરવો અને ત્યારબાદ ટુકડે-ટુકડે રકમ ઉઘરાવવી—આ બધું પૂર્વયોજનાનો જ ભાગ હતું. આ સમયગાળા દરમિયાન ફરીયાદી પાસેથી કુલ રૂ. 1.30 લાખ વસૂલવામાં આવ્યા હતા, જે પછીથી છેતરપિંડી હોવાનું સ્પષ્ટ બન્યું.
લગ્ન બાદ બે દિવસમાં જ દુલ્હન ગાયબ
લગ્ન થયા બાદ રેખાદેવી માત્ર બે દિવસ માટે ફરીયાદીના ઘરે રહી હતી. ત્યારબાદ પ્રોપર્ટીના કામકાજનું બહાનું બનાવી ‘ગામ જઈને આવીશ’ કહીને ઘરેથી નીકળી ગઈ હતી. તે પછી તેણે પાછા ફરવાનું ટાળ્યું, મોબાઇલ ફોન બંધ કરી દીધો અને મહારાષ્ટ્ર સ્થિત પોતાનું રહેઠાણ પણ ખાલી કરી દીધું. આ તમામ પરિસ્થિતિઓને કારણે ફરીયાદીને છેતરપિંડી થયાની ખાતરી થઈ અને તેણે પોલીસમાં ફરિયાદ નોંધાવી.
મહારાષ્ટ્રમાં ટેકનિકલ તપાસ અને ફિલ્મી ઢબે ધરપકડ
ફરિયાદ નોંધાતાં ચોકબજાર પોલીસ સ્ટેશનના પીઆઈ એન.જી. ચૌધરીએ તપાસ પીએસઆઈ એ.એચ. નિનામાને સોંપી હતી. આરોપીઓને પકડવા માટે પોલીસ ટીમને મહારાષ્ટ્ર મોકલવામાં આવી. બોઇસર વિસ્તારમાં ટેકનિકલ એનાલિસિસ કરી આરોપીઓની અવરજવર ધરાવતા વિસ્તારો પર નજર રાખવામાં આવી. ચા-નાસ્તાની લારીઓ અને કરિયાણાની દુકાનદારો સાથે વિશ્વાસ કેળવી સતત વોચ રાખવામાં આવી હતી. તપાસ દરમિયાન જાણવા મળ્યું કે અજય ઉર્ફે સોનું ગુપ્તા નિયમિત રીતે એક ચાની લારી પાસે સિગારેટ પીવા આવતો હતો. યોગ્ય તક મળતાં જ પોલીસે તેને ઝડપી લીધો અને તેની પૂછપરછના આધારે લૂંટેરી દુલ્હન બનેલી રેખાદેવીને પણ પકડી લેવામાં આવી.
એજન્ટ મારફતે ચાલતું હતું આખું કૌભાંડ
આરોપીઓની પૂછપરછમાં ખુલાસો થયો કે આ સમગ્ર કૌભાંડ એજન્ટ અશ્વિન પાટીલ દ્વારા સંચાલિત થતું હતું. અશ્વિન પાટીલ વોટ્સએપ મારફતે યુવતીઓના ફોટા મોકલતો અને તેમાંથી પસંદગી થયા બાદ સંપર્ક નંબર આપવામાં આવતો હતો. અજય ઉર્ફે સોનું ગુપ્તા પોતાને રેખાદેવીનો બનેવી હોવાનું કહી ફરીયાદી સાથે સતત સંપર્કમાં રહ્યો અને લગ્નની તમામ વ્યવસ્થા ગોઠવી. લગ્ન બાદ મળેલી રકમ એજન્ટ સુધી પહોંચાડવામાં આવતી હોવાનું પણ તપાસમાં સામે આવ્યું છે.
કયા ગુનામાં કેસ અને કોણ છે આરોપી
ચોકબજાર પોલીસ સ્ટેશનમાં ન્યાય સંહિતા-2023ની કલમ 61(2), 318(4) અને 54 હેઠળ ગુનો નોંધવામાં આવ્યો છે. ઝડપાયેલા આરોપીઓમાં અજય ઉર્ફે સોનું ગુપ્તા (ઉંમર 40, રહેવાસી: બોઇસર, પાલઘર, મહારાષ્ટ્ર; મૂળ વતન: ઉત્તરપ્રદેશ) અને રેખાદેવી વિરેન્દ્રકુમાર યાદવ (ઉંમર 35, રહેવાસી: બોઇસર, પાલઘર, મહારાષ્ટ્ર; મૂળ વતન: ઉત્તરપ્રદેશ)નો સમાવેશ થાય છે. પોલીસે આ કાર્યવાહી અન્ય નાગરિકો માટે ચેતવણીરૂપ હોવાનું જણાવ્યું છે અને લગ્ન સંબંધિત કોઈપણ વ્યવહારમાં સંપૂર્ણ તપાસ અને સાવચેતી રાખવાની અપીલ કરી છે.
