ગુજરાતમાં 94 હજાર HIV દર્દીઓ, સુરતમાં સૌથી વધુ
સુરતમાં HIV અને AIDS પોઝિટિવ વ્યક્તિઓ માટે કાર્ય કરતી GSNP પ્લસ રાજ્યની એકમાત્ર સંસ્થા છે જે છેલ્લા 22 વર્ષથી આરોગ્ય, કાનૂની માર્ગદર્શન, કાઉન્સેલિંગ અને સામાજિક સુરક્ષા જેવા ક્ષેત્રોમાં સેવા આપી રહી છે. સંસ્થાનો મુખ્ય ઉદ્દેશ HIV પોઝિટિવ લોકોને ગૌરવભર્યું જીવન અપાવવાનો છે. સારવારથી લઈને આત્મવિશ્વાસ સુધી, અહીં દરેક વ્યક્તિને માનવતાપૂર્વક સહારો આપવામાં આવે છે.
રાજ્યમાં 94 હજારથી વધુ HIV પોઝિટિવ કેસ, સુરત સૌથી આગળ
ગુજરાતમાં હાલ અંદાજે 94,000 લોકો HIV સાથે જીવન જીવી રહ્યા છે જેમાં 56,000 જેટલા પુરુષો અને 37,000 મહિલાઓ સામેલ છે. માત્ર સુરત શહેરમાં જ લગભગ 15,000 પોઝિટિવ કેસ નોંધાયેલા છે. શહેરના આ આંકડા ચિંતાજનક છે અને GSNP પ્લસ જેવી સંસ્થાઓ તેનો ભાર ઓછો કરવા અવિરત કાર્ય કરી રહી છે.
ART સારવારથી લઈને માનસિક સહાય સુધી સંપૂર્ણ સપોર્ટ
સંસ્થા HIV પોઝિટિવ લોકો માટે ART દવા, કાઉન્સેલિંગ, મેન્ટલ હેલ્થ સપોર્ટ અને રોજગાર દિશાનિર્દેશ જેવી જરૂરી સેવાઓ પૂરી પાડે છે. લોકોમાં આત્મવિશ્વાસ વધે અને ભેદભાવનો અંત આવે એ માટે પણ જાગૃતિ અભિયાન ચલાવવામાં આવે છે. GSNP પ્લસ અનેક પરિવારો માટે માર્ગદર્શક અને સશક્તિકરણનું મથક બની રહ્યું છે.
HIV પોઝિટિવ યુવક-યુવતીઓ માટે મેરેજ બ્યુરો
સંસ્થા HIV પોઝિટિવ વ્યક્તિઓ માટે મેરેજ બ્યુરો ચલાવે છે જેમાં યુવક-યુવતીઓને યોગ્ય જીવનસાથી મળે તે માટે સમન્વય કરવામાં આવે છે. સાથે જ HIV પોઝિટિવ બાલિકાઓ માટે સ્પેશિયલ કેર હોમમાં રહેઠાણ, સારવાર અને શિક્ષણની વ્યવસ્થા છે. સ્કિલ ડેવલપમેન્ટ પ્રોગ્રામ્સ દ્વારા તેમને આત્મનિર્ભર બનવા પ્રોત્સાહિત કરવામાં આવે છે.
ગર્ભવતી મહિલાઓને માર્ગદર્શન – બાળક HIV મુક્ત જન્મી શકે
જો દંપત્તિ અથવા ગર્ભવતી મહિલા HIV પોઝિટિવ હોય તો તેમને દવા અને તપાસ અંગે ખાસ માર્ગદર્શન આપવામાં આવે છે. સમયસર સારવાર શરૂ કરવામાં આવે તો બાળક HIV નેગેટિવ જન્મી શકે છે. જન્મ પછી 72 કલાકમાં મહત્વપૂર્ણ સીરપ આપવામાં આવે છે અને ચાર રિપોર્ટ દ્વારા તેની પુષ્ટિ કરવામાં આવે છે.
સંસ્થાના યુથ વિંગ પ્રેસિડેન્ટ ભૌતિક ઝાંખરીયાની વાત
યુથ વિંગના પ્રેસિડેન્ટ ભૌતિક ઝાંખરીયાએ કહ્યું કે તેઓ 2019થી સંગઠન સાથે જોડાયેલા છે અને HIV પોઝિટિવ લોકો માટે કરાતું કાર્ય તેમના માટે પ્રેરણાસ્થાન છે. તેમણે જણાવ્યું કે ગુજરાતમાં 94 હજારથી વધુ પોઝિટિવ લોકો છે જેમાં સુરતનો હિસ્સો સૌથી મોટો છે. સમાજની જૂઠી માન્યતાઓ દૂર કરવા સંસ્થા સતત પ્રયત્નશીલ છે.
