સુરત જિલ્લામાં મતદાર યાદી સઘન સુધારણા ઝુંબેશની રોલ ઓબ્ઝર્વર ઐશ્વર્યા સિંઘ દ્વારા વિસ્તૃત સમીક્ષા

રાજ્યવ્યાપી મતદાર યાદી સુધારણા કાર્યક્રમ અંતર્ગત સુરતમાં ઉચ્ચસ્તરીય સમીક્ષા બેઠક

ગુજરાતમાં હાલમાં ચાલી રહેલા મતદારયાદી સઘન સુધારણા કાર્યક્રમની સમીક્ષા કરવા માટે કેન્દ્રીય આઈએએસ અધિકારી અને રોલ ઓબ્ઝર્વર સુશ્રી ઐશ્વર્યા સિંઘ સુરતની મુલાકાતે આવ્યા હતા. સુરત કલેક્ટર કચેરી ખાતે યોજાયેલી આ મહત્વપૂર્ણ બેઠકમાં તેમણે સુરત જિલ્લાની કામગીરીની વિગતવાર ચર્ચા કરી હતી. આ ઉપરાંત તેમણે ટેકનોલોજીના માધ્યમથી નર્મદા, તાપી અને વલસાડ જિલ્લાના કલેક્ટરો સાથે પણ વિડિયો કોન્ફરન્સ યોજીને જે તે જિલ્લામાં ચાલી રહેલી એસ.આઈ.આર. કામગીરીની પ્રગતિનો ચિતાર મેળવ્યો હતો.

મતદારોની નોંધણી માટે સઘન આયોજન

સુરત જિલ્લા કલેક્ટર ડૉ. સૌરભ પારઘીએ પાવર પોઈન્ટ પ્રેઝન્ટેશન દ્વારા ઓબ્ઝર્વરને માહિતગાર કર્યા હતા કે જિલ્લામાં જનજાતિ સમુદાય, આદિમજૂથો અને ખાસ કરીને ઔદ્યોગિક વસાહતોમાં રહેતા સ્થળાંતરિત શ્રમિકો સુધી પહોંચવા માટે વિશેષ પ્રયાસો કરવામાં આવ્યા છે. બૂથ લેવલ ઓફિસર એટલે કે બીએલઓ દ્વારા દરેક ઘર સુધી પહોંચીને ઇન્યુમરેશન ફોર્મની વહેંચણી અને તે પરત મેળવવાની કામગીરી કરવામાં આવી છે. ડિમોલિશનના કારણે જે મતદારો અન્ય સ્થળે ખસી ગયા છે તેમને પણ યાદીમાં આવરી લેવા માટે વહીવટી તંત્ર સતત કામ કરી રહ્યું છે.

ક્ષતિરહિત યાદી બનાવવા પર વિશેષ ભાર

રોલ ઓબ્ઝર્વર ઐશ્વર્યા સિંઘે બેઠકમાં ઉપસ્થિત અધિકારીઓને નામ અને ઉંમરની વિસંગતતા ધરાવતા મતદારોના પુરાવાઓનું કડક વેરિફિકેશન કરવા સૂચના આપી હતી. જે મતદારો ગેરહાજર છે અથવા તો મૃત્યુ પામ્યા છે તેમના નામ યાદીમાંથી દૂર કરવા માટે કાયદેસરની નોટિસ અને સુનાવણીની પ્રક્રિયામાં કોઈ ક્ષતિ ન રહી જાય તે જોવાની જવાબદારી તેમણે સોંપી હતી. ચૂંટણી પંચની માર્ગદર્શિકા મુજબ સમયમર્યાદામાં તમામ ડેટા એન્ટ્રી પૂર્ણ કરવા અને જે મતદારોનું મેપિંગ બાકી છે તેમનો ઝડપથી નિકાલ લાવવા તેમણે માર્ગદર્શન પૂરું પાડ્યું હતું.

સુરતના મોટા વરાછામાં માનવતાને શરમાવતી ઘટના: દિવ્યાંગ વ્યક્તિની કેબિનને તસ્કરોએ બનાવી નિશાન

એકસાથે અનેક ગુનાઓનો ભેદ ઉકેલાયો! ઉત્રાણ પોલીસે કરી વાહન ચોર અને પોક્સો આરોપીની ધરપકડ

રાજકીય પક્ષો અને મ્યુનિસિપલ કમિશનરની હાજરી

આ સમીક્ષા પ્રક્રિયાના ભાગરૂપે ઓબ્ઝર્વરે રાજકીય પક્ષોના પ્રતિનિધિઓ સાથે પણ બેઠક યોજી હતી અને તેમના દાવા તેમજ વાંધાઓ સાંભળ્યા હતા. બેઠકમાં સુરત મ્યુનિસિપલ કમિશનર શાલિની અગ્રવાલ અને ડેપ્યુટી કમિશનર નિધિ સિવાચે પણ શહેરી વિસ્તારમાં મતદાર નોંધણી પ્રક્રિયાને વધુ સરળ બનાવવા માટે જરૂરી સૂચનો રજૂ કર્યા હતા. વહીવટી તંત્રના તમામ એકમો વચ્ચે સંકલન સાધીને એક પણ પાત્ર મતદાર મતાધિકારથી વંચિત ન રહી જાય તેવા મક્કમ નિર્ધાર સાથે આ કામગીરીને આખરી ઓપ આપવામાં આવી રહ્યો છે.