સુરતના સચીનમાં સેઝની યુનિવર્સલ યુનિટમાંથી સિન્થેટિકની સાથે નેચરલ ડાયમંડ ભેળવી એક્સપોર્ટ કરવાના સ્કેન્ડલમાં ગાજેલા રૂ. 204 કરોડના ડાયમંડ હવાલા કાંડમાં સંડોવાયેલાં આરોપી મીત કાછડિયાની જામીન અરજી ચીફ કોર્ટે નામંજૂર કરી દીધી છે.
કસ્ટમ વિભાગની એફિડેવિટ અને એપીપી ધર્મેન્દ્ર પ્રજાપતિની દલીલોને ગ્રાહ્ય રાખી કોર્ટે આરોપીના જામીન નામંજૂર કર્યા છે.
કસ્ટમની દલીલ હતી કે આરોપી માહિતી આપતો નથી સેઝમાં જે રફ ડાયમંડ સપ્લાય કરતી એમ.કે. એક્સપોર્ટની વિગતો અને લેપટોપ અને આઇપેડના પાસવર્ડ પણ આરોપીએ આપ્યા નથી આરોપી પોતે પાસવર્ડ ભૂલી ગયાનું રટણ કરી રહ્યો છે ઉપરાંત મીત કાછડિયાની યુનિવર્સલ જેમ્સના એકાઉન્ટ તેની બહેન નિધિ વિશાલ ખોખર જોઇ છે જે એક ચાર્ટર્ડ એકાઉન્ટન્ટ છે, ઉપરાંત મુખ્ય રફ સપ્લાયર કરનાર એમ.કે.એક્સપોર્ટના પ્રોપ્રાયટર આરોપીના પિતા કનુ વિરજી કાછડિયા છે. બંને જણા તપાસમાં સહકાર આપતા નથી એવુ કસ્ટમનું કહેવુ છે.
સેઝની યુનિવર્સિલ જેમ્સમાં દરોડા દરમિયાન કસ્ટમ વિભાગે જે ડાયમંડ સિઝ કર્યા હતા તેની ચકાસણી આઇડીઆઇ પાસે કરાવવામાં આવી હતી, જેમાં લેબ ડાયમંડની જગ્યાએ 99.2 ટકા ડાયમંડ નેચરલ હતા.
તપાસમાં એક્સપોર્ટ કરાયેલાં નેચરલ ડાયમંડ કોઈ સપ્લાયર પાસે કે બ્રોકર પાસેથી ખરીદવામાં આવ્યા હતા અને તેની સાથે અમેરિકા અને એન્ટવર્પ સહિતની એજન્સીઓના સર્ટિફિકેટનો ઇશ્યુ પણ જોડાયેલાં હોવાનું સામે આવ્યું છે.
