સુરતના લિંબાયત વિસ્તારમાં એક વિદ્યાર્થીની કરપીણ હત્યા થઈ છે.અને જ્યાં સુધી આરોપીઓ ન ઝડપાય ત્યાં સુધી પરિવારજનોએ લાશ સ્વીકારવાનો ઈન્કાર કર્યો છે. ગોડાદરામાં રહેતા ધોરણ 12માં અભ્યાસ કરતા સાહિત નામના યુવકની હત્યા થઈ છે. ત્રણ શખ્સોએ હત્યા કરી હોવાનું અનુમાન છે. લિંબાયત વિસ્તારમાં સાત દિવસમાં હત્યાના ત્રણ બનાવોથી ચકચાર મચી છે. ક્રિષ્ના પાર્ક સોસાયટીમાં રહેતા 18 વર્ષીય સાહિલ જોષી સાથે કેટલાક શખ્સોએ માથાકુટ કર્યા બાદ હત્યા ઈંટ મારીને હત્યા કરી દેવાઈ હતી. આ સમગ્ર ઘટનામાં બપ્પી નામના ઇસમની સંડોવણી હોવાની માહિતી છે.પરિવારજનો જ્યાં સુધી આરોપીઓ ઝડપાય નહી ત્યાં સુધી મૃતદેહ સ્વીકારવાનો ઈન્કાર કર્યો છે.
પરિવારજનોમાં આક્રોશ
સુરતમાં કાયદો અને વ્યવસ્થાની દિનબદીન કથળતી જઇ રહી છે. એક બાદ એક હત્યાની ઘટનામાં વધારો થઈ રહ્યો છે. ત્યાં સુરતના લિંબાયત વિસ્તારમાં વધુ એક હત્યાની ઘટના બનતા પોલીસની કામગીરી સામે પણ સવાલ ઊભા થયા છે. ધોરણ 12 માં અભ્યાસ કરતા વિદ્યાર્થીની બોથડ પદાર્થ વડે ઇજા પહોંચાડી ચાર જેટલા ઈસમોએ મોતને ઘાટ ઉતારી દીધો છે. વિદ્યાર્થીના મોતના પગલે રોષે ભરાયેલા પરિવારજનોએ લાશ સ્વીકારવાનો ઇનકાર કર્યો છે. એટલું જ નહીં પરંતુ પોલીસના નાક નીચે ચાલતા દારૂના અડ્ડાઓ તેમજ ગાંજાના વેચાણ સહિત લુખ્ખા તત્વો નો કાયમી આતંક હોવાનો પણ ગંભીર આક્ષેપ પરિવારજનોએ કર્યો છે.
ગુનેગારો ફરાર
લિંબાયતના કેશવ નગર વિસ્તારમાં રહેતો 18 વર્ષીય સાહિલ સૂર્યકાંત જોશી ધોરણ 12 માં અભ્યાસ કરતો હતો. વિદ્યાર્થી ગતરોજ સમી સાંજે પોતાના ઘરેથી કામાર્થે નીકળ્યો હતો. જે દરમિયાન નજીકમાં આવેલા પાનના ગલ્લા પર ઊભેલા ચાર જેટલા અજાણ્યા ઈસમોએ તેને આંતરી માથાકૂટ કરી હતી. ત્યારબાદ બોથડ પદાર્થ વડે વિદ્યાર્થી પર જીવલેણ હુમલો કરી તેને ગંભીર ઈજા પહોંચાડી હતી. ઘટના બાદ ચારેય ઈસમો ફરાર થઈ ગયા હતા.
પરિવારજનોનો લાશ સ્વીકારવાનો ઈન્કાર
બનાવની જાણ થતાં પરિવારજનો અને લિંબાયત પોલીસ તાત્કાલિક ઘટનાસ્થળે પહોંચ્યા હતા અને ઇજાગ્રસ્ત વિદ્યાર્થીને તાત્કાલિક સુરત સિવિલ હોસ્પિટલ ખાતે ખસેડયો હતો. જોકે ફરજ પરના તબીબોએ વિદ્યાર્થીને મૃત જાહેર કર્યો હતો. વિદ્યાર્થીના મોતને લઈ પરિવાર શોકમાં ગરકાવ થઈ ગયો હતો. જ્યાં રોષે ભરાયેલા પરિવારજનોએ પોસ્ટમોર્ટમ રૂમ બહાર પોતાનો રોષ વ્યક્ત કરતા લાશ સ્વીકારવાનો સાફ ઇનકાર કરી દીધો હતો. પરિવારજનોએ જણાવ્યું કે જ્યાં સુધી આરોપીઓની ધરપકડ નહીં થાય ત્યાં સુધી લાશ સ્વીકારવામાં નહીં આવે.
વિદ્યાર્થીની હત્યાના દ્રશ્યો CCTVમાં કેદ
લીંબાયતમાં અસામાજિક તત્વોનો આતંક હોવાની સાથે ગોડાદરા વિસ્તારમાં દારૂ-ગાંજો જેવી ગેર- પ્રવૃત્તિઓ પણ ખુલ્લેઆમ ફૂલીફાલી રહી છે.જેથી પોલીસ આ મામલે યોગ્ય કાર્યવાહી કરે તેવી માંગ છે. વિધાર્થીની હત્યાની આ ઘટના સીસીટીવી કેમેરામાં પણ કેદ થવા પામી છે.જ્યાં નજીકમાં રહેલ પાનના ગલ્લામાં રહેલ સીસીટીવી કેમેરા આ ઘટના સ્પષ્ટપણે જોવા મળી રહી છે. અત્રે ઉલ્લેખનીય છે કે લીંબાયત વિસ્તાર લુખ્ખાતત્વો માટે અડ્ડા સમાન બની ગયું છે.આવા તત્વો પર પોલીસની પકડ ઢીલી થતી જય રહી છે.પરિણામે આવા લુખ્ખાતત્વો ને છુટ્ટો દૌર મળી રહ્યો છે.જે પોલીસ ની કામગીરી સામે સવાલ ઉભા કરી રહ્યા છે.