IND vs ENG: સેમીફાઈનલ પહેલા વરુણ અને અભિષેકના ફોર્મ પર ઉઠ્યા સવાલ, કોચ મોર્ને મોર્કલે આપ્યો સચોટ જવાબ
T20 વર્લ્ડ કપ 2026ની બીજી સેમીફાઈનલમાં ભારત અને ઇંગ્લેન્ડ વચ્ચે જંગ જામવાનો છે. મુંબઈના ઐતિહાસિક વાનખેડે સ્ટેડિયમમાં 5 માર્ચના રોજ રમાનારી આ મેચમાં ભારત પાસે સતત બીજી વખત ફાઈનલમાં પહોંચવાની સુવર્ણ તક છે. જોકે, આ મહત્વની મેચ પહેલા ટીમ ઈન્ડિયાના બે મહત્વના ખેલાડીઓ સ્પિનર વરુણ ચક્રવર્તી અને ઓપનર અભિષેક શર્મા ના ફોર્મને લઈને ચર્ચાઓ તેજ થઈ છે. આ દરમિયાન ભારતીય બોલિંગ કોચ મોર્ને મોર્કલે આ બંને ખેલાડીઓનો બચાવ કરતા મોટું નિવેદન આપ્યું છે.
વરુણ ચક્રવર્તી પર મોર્કલે વ્યક્ત કર્યો અતૂટ વિશ્વાસ
બોલિંગ કોચ મોર્ને મોર્કલે વરુણ ચક્રવર્તીનું ખુલ્લેઆમ સમર્થન કર્યું છે. મોર્કલનું માનવું છે કે વરુણ પાસે એટલી વિવિધતા અને કૌશલ્ય છે કે તે કોઈપણ સમયે વિકેટ ઝડપવાની ક્ષમતા ધરાવે છે. મોર્કલે જણાવ્યું કે, “વરુણ એક અત્યંત પ્રતિભાશાળી બોલર છે. ક્યારેક રન વધુ આપ્યા હોય ત્યારે તેનો અર્થ એ છે કે બોલ પ્લાન મુજબ પડ્યો નથી. તેણે જૂની વાતો ભૂલીને દરેક નવા બોલ પર ધ્યાન કેન્દ્રિત કરવાની જરૂર છે.”
તેમણે વધુમાં ઉમેર્યું કે વરુણ ઘણીવાર શ્રેષ્ઠ પ્રદર્શન કરવાના દબાણમાં પોતાની જાત પર ભાર વધારી દે છે. બેટ્સમેનો માટે તેને વાંચવો મુશ્કેલ છે, તેથી તેને માત્ર પોતાની લેન્થ અને કંટ્રોલ પર ધ્યાન આપવાની સલાહ આપવામાં આવી છે. કોચના મતે, વરુણ ટીમ માટે સાચો ‘મેચ વિનર’ છે.
અભિષેક શર્માના ફોર્મ પર શું બોલ્યા કોચ?
આ વર્લ્ડ કપમાં યુવા ઓપનર અભિષેક શર્માનું પ્રદર્શન ચિંતાનો વિષય રહ્યો છે. અત્યાર સુધી રમાયેલી 6 મેચોમાં તે માત્ર 80 રન બનાવી શક્યો છે, જેમાં ત્રણ વખત તે શૂન્ય રને આઉટ થયો છે. આ નબળા ફોર્મ છતાં મોર્કલે તેનો બચાવ કરતા કહ્યું કે, “ક્રિકેટ ક્યારેક ખૂબ જ ક્રૂર રમત બની જાય છે. દરેક ખેલાડીના જીવનમાં આવો તબક્કો આવે છે. સંજુ સેમસને પણ આવો સમય જોયો છે.”
મોર્કલે આશા વ્યક્ત કરી કે અભિષેકને માત્ર એક કે બે સારા શોટ્સની જરૂર છે, જેનાથી તેનો આત્મવિશ્વાસ પાછો આવી જશે. તેમણે યાદ અપાવ્યું કે આ જ વાનખેડે મેદાન પર અભિષેકે ભૂતકાળમાં ઇંગ્લેન્ડ સામે સદી ફટકારી હતી. સેમીફાઈનલ તેના માટે પોતાની જાતને સાબિત કરવાની એક નવી અને શાનદાર તક છે.
સેમીફાઈનલ માટે ભારતની સંભવિત રણનીતિ
ભારતીય ટીમ મેનેજમેન્ટ અત્યારે ખેલાડીઓમાં વિશ્વાસ જગાવવાનું કામ કરી રહ્યું છે. વાનખેડેની પિચ બેટ્સમેનો માટે સ્વર્ગ સમાન માનવામાં આવે છે, પરંતુ સાંજની મેચ હોવાથી ઝાકળ અને ભેજ બોલરો માટે પડકારરૂપ બની શકે છે. આવી સ્થિતિમાં વરુણની સ્પિન અને અભિષેકની આક્રમક શરૂઆત ભારત માટે ગેમ-ચેન્જર સાબિત થઈ શકે છે.
