ટી20 વર્લ્ડ કપ પહેલા ટીમ ઈન્ડિયા માટે ખતરાની ઘંટડી: શું ફરી એકવાર વિશ્વ વિજેતા બનવાનું સપનું અધૂરું રહેશે?
આઈસીસી મહિલા ટી20 વિશ્વ કપ 2026 હવે ઘર આંગણે આવીને ઉભો છે, પરંતુ તે પહેલા ભારતીય મહિલા ક્રિકેટ ટીમ માટે ચિંતાજનક સમાચાર સામે આવી રહ્યા છે. સાઉથ આફ્રિકા સામે રમાઈ રહેલી પાંચ મેચોની ટી20 શ્રેણીના શરૂઆતના બંને મુકાબલામાં ભારતનો પરાજય થયો છે. હરમનપ્રીત કૌરની આગેવાની હેઠળની ટીમ જે રીતે રમી રહી છે, તે જોતા ચાહકોના મનમાં ફાળ પડી છે કે શું આ વખતે પણ વર્લ્ડ કપનું સપનું ‘દૂરની કોડી’ સમાન બની રહેશે?
દક્ષિણ આફ્રિકા સામે શરણાગતિ: એકતરફી હારથી સવાલો ઉઠ્યા
ભારત અને દક્ષિણ આફ્રિકા વચ્ચેની આ શ્રેણી વર્લ્ડ કપની તૈયારીઓ માટે અત્યંત મહત્વની માનવામાં આવતી હતી, પરંતુ અત્યાર સુધીના પરિણામો નિરાશાજનક રહ્યા છે. શ્રેણીની બંને મેચોમાં ટીમ ઈન્ડિયા ક્યાંય લડત આપતી પણ દેખાઈ નથી.
પ્રથમ મેચ: પહેલા બેટિંગ કરતા ભારતીય ટીમ 7 વિકેટ ગુમાવીને માત્ર 157 રન જ બનાવી શકી હતી. સાઉથ આફ્રિકાની મહિલા ટીમે આ લક્ષ્યાંક 4 વિકેટ ગુમાવીને 5 બોલ બાકી રહેતા આસાનીથી હાંસલ કરી લીધો હતો.
બીજી મેચ: બીજા મુકાબલામાં સ્થિતિ વધુ ખરાબ રહી. ભારતીય બેટ્સમેનો નિષ્ફળ રહ્યા અને ટીમ માત્ર 147 રન પર અટકી ગઈ. સાઉથ આફ્રિકાએ માત્ર 2 વિકેટ ગુમાવીને 17 બોલ બાકી હતા ત્યારે જ મેચ જીતી લીધી હતી.
આ બંને મેચોમાં ભારતની બેટિંગ અને બોલિંગ બંને વિભાગમાં નબળાઈઓ છતી થઈ છે. ખાસ કરીને પાવરપ્લેમાં રન ન બનવા અને મધ્યમ ઓવરોમાં વિકેટ ન લઈ શકવી એ મોટી સમસ્યા બની રહી છે.
વર્લ્ડ કપનું લક્ષ્ય અને વર્તમાન ફોર્મ વચ્ચેનું અંતર
ટીમ ઈન્ડિયાનો અસલી ટાર્ગેટ આ દ્વિપક્ષીય શ્રેણી જીતવાનો જ નથી, પરંતુ જૂન મહિનામાં રમાનારા ટી20 વર્લ્ડ કપ પર કબજો કરવાનો છે. ભારતીય મહિલા ટીમે હજુ સુધી એક પણ વાર ટી20 વર્લ્ડ કપ જીત્યો નથી. જોકે, તાજેતરમાં જ વનડે વર્લ્ડ કપ જીતીને ટીમે ઈતિહાસ રચ્યો હતો, જેના કારણે ચાહકોની અપેક્ષાઓ વધી ગઈ છે. પરંતુ સાઉથ આફ્રિકા સામેનું આ કંગાળ પ્રદર્શન દર્શાવે છે કે ટી20 ફોર્મેટમાં હજુ પણ ઘણું કામ કરવાની જરૂર છે.
ઇંગ્લેન્ડની ધરતી પર થશે અસલી કસોટી
આગામી આઈસીસી મહિલા ટી20 વિશ્વ કપ 12 જૂનથી શરૂ થવા જઈ રહ્યો છે. આ વખતે ટુર્નામેન્ટનું આયોજન ઇંગ્લેન્ડમાં કરવામાં આવ્યું છે. ઇંગ્લેન્ડની કન્ડિશન હંમેશા એશિયન ટીમો માટે પડકારરૂપ હોય છે. ત્યાં બોલ સ્વિંગ થાય છે અને પિચોમાં ઉછાળો હોય છે. જો ભારતીય બેટ્સમેનો ઘર આંગણે સાઉથ આફ્રિકા સામે સંઘર્ષ કરી રહ્યા હોય, તો ઇંગ્લેન્ડની ધરતી પર ઓસ્ટ્રેલિયા અને ઇંગ્લેન્ડ જેવી મજબૂત ટીમો સામે ટકી રહેવું મુશ્કેલ બની શકે છે.
વર્લ્ડ કપની શરૂઆત 12 જૂને ઇંગ્લેન્ડ અને શ્રીલંકા વચ્ચેની મેચથી થશે. જ્યારે ભારત પોતાની પ્રથમ મેચ 14 જૂને પાકિસ્તાન સામે રમશે. પરંપરાગત હરીફ પાકિસ્તાન સામે જીતવું ભારત માટે બહુ અઘરું નથી, પરંતુ અસલી પરીક્ષા સેમીફાઈનલ અને ફાઈનલ સુધી પહોંચવા માટે અન્ય મોટી ટીમો સામે થશે.
શ્રેણીની હજુ ત્રણ મેચો બાકી છે અને ભારત પાસે વાપસી કરવાની તક છે. પરંતુ વિશ્વ વિજેતા બનવા માટે કેટલીક બાબતો પર ધ્યાન આપવું અનિવાર્ય છે:
- ઓપનિંગ ભાગીદારી: સ્મૃતિ મંધાના અને શેફાલી વર્માએ ટીમને વિસ્ફોટક શરૂઆત અપાવવી પડશે.
- મિડલ ઓર્ડરની જવાબદારી: હરમનપ્રીત કૌર અને જેમિમા રોડ્રિગ્સે મધ્યમ ઓવરોમાં રન ગતિ જાળવી રાખવી પડશે.
- ડેથ ઓવર્સ બોલિંગ: છેલ્લી ઓવરોમાં રન રોકવા માટે ફાસ્ટ બોલરોએ ચોકસાઈ રાખવી પડશે.
