તમિલનાડુમાં ‘થલપથિ’ વિજયની સુનામી: બેરોજગારોને ₹4000 ભથ્થું અને મહિલાઓને સહાય; મેનિફેસ્ટોએ DMK-AIADMK ના પાયા હચમચાવી દીધા!
તમિલનાડુના રાજકારણમાં આજે એવો વળાંક આવ્યો છે જેની કલ્પના કદાચ મોટા રાજકીય વિશ્લેષકોએ પણ કરી નહોતી. દાયકાઓથી રાજ્યની સત્તા પર જે બે પક્ષોનો કબ્જો રહ્યો છે – DMK અને AIADMK – તેમનું વર્ચસ્વ હવે જોખમમાં હોય તેવું લાગી રહ્યું છે. સુપરસ્ટાર વિજયની નવી પાર્ટી ‘તમિલગા વેટ્ટી કઝગમ’ (TVK) એ જે રીતે ચૂંટણી મેદાનમાં એન્ટ્રી કરી છે, તેણે આખા દેશને ચોંકાવી દીધો છે. ચૂંટણી પંચના લેટેસ્ટ વલણો મુજબ, વિજયની પાર્ટી 234 બેઠકોમાંથી 105 બેઠકો પર લીડ ધરાવી રહી છે, જે તમિલનાડુના ઈતિહાસમાં કોઈ નવા પક્ષ માટે અભૂતપૂર્વ છે.
વિજયનો જાદુઈ મેનિફેસ્ટો: ‘તિરુક્કુરલ’ ના સિદ્ધાંતો પર આધાર
વિજયે પોતાની રાજકીય સફરની શરૂઆત કોઈ સામાન્ય વચનોથી નહીં, પણ એક સુનિયોજિત 95 પાનાના જાહેરનામા (મેનિફેસ્ટો) થી કરી છે. તેમણે આ મેનિફેસ્ટોને પવિત્ર ગ્રંથ ‘તિરુક્કુરલ’ ના ત્રણ મુખ્ય સ્તંભો – અરમ (પુણ્ય), પોરુલ (ધન) અને ઇમ્બમ (સુખ) પર આધારિત ગણાવ્યો છે. વિજયે સીધો પ્રહાર કરતા કહ્યું કે, તેમનું જાહેરનામું માત્ર પોકળ વચનોનો પોટલો નથી, પરંતુ ઈમાનદારીનું આશ્વાસન છે.
યુવાનો અને બેરોજગારો માટે મોટી જાહેરાત
વિજયની પાર્ટી તરફ યુવાનોના આકર્ષણનું સૌથી મોટું કારણ બેરોજગારી ભથ્થું છે. તેમણે વચન આપ્યું છે કે:
જે ગ્રેજ્યુએટ (સ્નાતક) યુવાનો બેરોજગાર છે, તેમને દર મહિને ₹4,000 નું ભથ્થું આપવામાં આવશે.
ડિપ્લોમા ધારકો ને દર મહિને ₹2,500 ની આર્થિક સહાય અપાશે.
જે યુવાનો સ્કિલ ટ્રેનિંગ લઈ રહ્યા છે, તેમને ₹10,000 સુધીની મદદ આપવામાં આવશે.
આ જાહેરાતે રાજ્યના લાખો યુવાનોમાં એક નવી આશા જગાડી છે, જે લાંબા સમયથી રોજગારીની તકો શોધી રહ્યા છે.
મહિલાઓ અને ઘરગથ્થુ રાહતો
મહિલા મતદારોને રીઝવવા માટે પણ વિજયે કોઈ કસર બાકી રાખી નથી. તેમણે જાહેર કર્યું છે કે:
દરેક પરિવારની મહિલા વડાને દર મહિને ₹2,500 ની આર્થિક સહાય મળશે.
વર્ષમાં 6 ફ્રી ગેસ સિલિન્ડર આપવામાં આવશે.
દરેક નવવધૂને લગ્ન સમયે સોનાનો સિક્કો અને રેશમી સાડી ભેટમાં આપવામાં આવશે.
ખેડૂતો અને કૃષિ ક્ષેત્ર માટે આકર્ષક યોજનાઓ
ખેડૂતોના મત મેળવવા માટે ‘થલપથિ’ વિજયે દેવામાફીનું મોટું પત્તું ખેલ્યું છે. તેમણે વચન આપ્યું છે કે 5 એકર સુધીની જમીન ધરાવતા ખેડૂતોના સહકારી પાક ધિરાણ સંપૂર્ણપણે માફ કરવામાં આવશે. આ ઉપરાંત, ડાંગર અને શેરડીના પાક માટે ભારે લઘુત્તમ ટેકાના ભાવ (MSP) ની ખાતરી પણ આપી છે.
ભવિષ્યનું વિઝન: દેશનું પ્રથમ AI મંત્રાલય
વિજયની રાજનીતિ માત્ર જૂની પદ્ધતિઓ સુધી મર્યાદિત નથી. તેમણે વચન આપ્યું છે કે જો તેમની સરકાર બનશે, તો તેઓ રાજ્યમાં આર્ટિફિશિયલ ઇન્ટેલિજન્સ (AI) માટે અલગ મંત્રાલય બનાવશે. આ પ્રકારનું મંત્રાલય ધરાવનાર તમિલનાડુ દેશનું પ્રથમ રાજ્ય બની શકે છે.
સરકારી કર્મચારીઓ અને પોલીસ માટે સારા સમાચાર
વિજયે વહીવટી તંત્રને મજબૂત કરવા માટે પોલીસ અને સરકારી કર્મચારીઓનો સાથ માંગ્યો છે:
પોલીસ કર્મચારીઓનો મૂળ પગાર ₹18,000 થી વધારીને ₹25,000 કરવાનું અને ₹1,000 નું ‘સ્ટ્રેસ એલાઉન્સ’ (તણાવ ભથ્થું) આપવાનું વચન આપ્યું છે.
લાંબા સમયથી ચાલી રહેલી માગણી એવી જૂની પેન્શન યોજના (OPS) ને ફરીથી લાગુ કરવા અંગે પણ સકારાત્મક વિચારણાનો ભરોસો આપ્યો છે.
