મોંઘવારી અને મિડલ ઇસ્ટ સંઘર્ષની અસર, અમેરિકામાં ટ્રમ્પની લોકપ્રિયતા સૌથી નીચલા સ્તરે!
યુએસ કોંગ્રેસની મહત્વપૂર્ણ ચૂંટણીઓ પહેલાં રાષ્ટ્રપતિ ડોનાલ્ડ ટ્રમ્પ અને તેમના પક્ષ માટે ખરાબ સમાચાર સામે આવ્યા છે. રોઇટર્સ/ઇપ્સોસ (Reuters/Ipsos) દ્વારા કરવામાં આવેલા એક નવા સર્વેક્ષણે અમેરિકી રાજકીય વર્તુળોમાં હલચલ મચાવી દીધી છે. આ સર્વે મુજબ, રાષ્ટ્રપતિ ડોનાલ્ડ ટ્રમ્પનું લોકપ્રિયતા રેટિંગ (approval rating) ઘટીને માત્ર ૩૧% થઈ ગયું છે—જે તેમના વર્તમાન કાર્યકાળ દરમિયાન નોંધાયેલું સૌથી નીચું સ્તર છે. ૩ નવેમ્બરે યોજાનારી યુએસ કોંગ્રેસની ચૂંટણી માટે ડેમોક્રેટ્સ અને રિપબ્લિકન્સ વચ્ચે ‘હાઉસ ઓફ રિપ્રેઝન્ટેટિવ્સ’ (પ્રતિનિધિ સભા) અને ‘સેનેટ’ પર નિયંત્રણ મેળવવા માટે જોરદાર મુકાબલો ચાલી રહ્યો છે. ચૂંટણીના આટલા નજીકના સમયે આવેલા આ પરિણામો ટ્રમ્પ વહીવટીતંત્ર માટે ચેતવણી સમાન સાબિત થઈ શકે છે.
સર્વેમાં ડેમોક્રેટ્સની મજબૂત બઢત
રોયટર્સ/ઇપ્સોસ દ્વારા ઓનલાઈન કરવામાં આવેલા આ ચાર દિવસીય સર્વેમાં કુલ 1,679 પુખ્ત વયના લોકો સામેલ થયા હતા, જેમાં 1,279 રજિસ્ટર્ડ મતદારો હતા. જ્યારે લોકોને એ સવાલ પૂછવામાં આવ્યો કે તેઓ આગામી કોંગ્રેસની ચૂંટણીમાં કઈ પાર્ટીને મત આપશે, ત્યારે ચોંકાવનારા આંકડા સામે આવ્યા.
સર્વે મુજબ, ૪૭% મતદારોએ ડેમોક્રેટિક પાર્ટીને સમર્થન આપ્યું હતું, જ્યારે રિપબ્લિકન પાર્ટીને માત્ર ૩૫% સમર્થન મળ્યું હતું. આનાથી ડેમોક્રેટ્સને રિપબ્લિકન્સ પર ૧૨ પોઈન્ટની નોંધપાત્ર સરસાઈ મળી છે. ખાસ નોંધવા જેવી બાબત એ છે કે, માત્ર બે અઠવાડિયા પહેલા કરવામાં આવેલા આવા જ એક સર્વેમાં ડેમોક્રેટ્સ ૪૪% અને રિપબ્લિકન્સ ૩૭% પર હતા, જે દર્શાવે છે કે ટ્રમ્પના પક્ષ માટેનું સમર્થન ઝડપથી ઘટી રહ્યું છે.
મહિલા મતદારોનું ભારી સમર્થન
આ સર્વેમાં બીજી એક મહત્વની વાત એ સામે આવી કે અમેરિકી મહિલા મતદારોનો ઝુકાવ ડેમોક્રેટ્સ તરફ વધુ છે. લગભગ 50 ટકા મહિલાઓએ ડેમોક્રેટિક પાર્ટીને મત આપવાની વાત કહી, જ્યારે માત્ર 32 ટકા મહિલાઓએ રિપબ્લિકન ઉમેદવારોનું સમર્થન કર્યું. જોકે પુરુષ મતદારો વચ્ચે પણ ડેમોક્રેટ્સ આગળ રહ્યા, પરંતુ ત્યાં બંને પાર્ટીઓ વચ્ચેનું અંતર મહિલાઓની સરખામણીમાં ઓછું હતું.
મોંઘવારી અને આસમાન સ્પર્શતા ઇંધણના ભાવ બન્યા મુખ્ય કારણ
ટ્રમ્પની ઘટતી લોકપ્રિયતા પાછળનું મુખ્ય કારણ દેશમાં સતત વધતી મોંઘવારી અને પેટ્રોલ-ડીઝલના આસમાન સ્પર્શતા ભાવો છે. મિડલ ઇસ્ટ (પશ્ચિમ એશિયા) માં ચાલુ અમેરિકા અને ઈરાન વચ્ચેના સંઘર્ષે સ્થિતિને વધુ ગંભીર બનાવી દીધી છે, જેની સીધી અસર સામાન્ય અમેરિકી નાગરિકોના ઘરેલુ બજેટ પર પડી રહી છે.
આર્થિક મોરચે ટ્રમ્પની નિષ્ફળતાથી જનતા ખાસી નારાજ નજરે પડી રહી છે. સર્વે મુજબ, લગભગ 68 ટકા લોકોએ અર્થવ્યવસ્થા સંભાળવાના મામલે ટ્રમ્પના કામકાજ સામે અસંતોષ વ્યક્ત કર્યો છે. આશ્ચર્યની વાત એ છે કે આ અસંતુષ્ટ વર્ગમાં ખુદ રિપબ્લિકન પાર્ટીના સમર્થકો પણ સામેલ છે, જેમાંથી લગભગ 37 ટકા લોકોએ પણ અર્થવ્યવસ્થા પર ટ્રમ્પના વલણને નકાર્યું છે. જ્યારે જનતાને પૂછવામાં આવ્યું કે અર્થવ્યવસ્થાને વધુ સારી રીતે કોણ સંભાળી શકે છે, ત્યારે 40 ટકાએ ડેમોક્રેટ્સ અને 33 ટકાએ રિપબ્લિકન્સનું સમર્થન કર્યું.
આગામી ચૂંટણીઓ પહેલાં આવેલા આ આંકડાઓએ સ્પષ્ટ કરી દીધું છે કે વધતી મોંઘવારી અને આર્થિક મોરચે જનતાનો અસંતોષ ટ્રમ્પ વહીવટીતંત્ર પર ભારે પડી રહ્યો છે. હવે જોવાનું એ રહેશે કે ચૂંટણી પહેલાં રિપબ્લિકન પાર્ટી આ વાતાવરણને પોતાના પક્ષમાં વાળવા માટે કઈ રણનીતિ અપનાવે છે.
