રમતગમત અને યુવા પ્રવૃત્તિઓ વિભાગના મંત્રી ડૉ. જયરામભાઈ ગામીતની હાજરીમાં વિદ્યાર્થીઓને ઉજ્જવળ ભવિષ્ય માટે પ્રેરણા
તાપી જિલ્લાના ઉચ્છલ તાલુકાની માં દેવમોગરા સરકારી વિનયન કોલેજ ખાતે 13મો વાર્ષિકોત્સવ અને ઇનામ વિતરણ સમારોહ યોજાયો હતો. આ કાર્યક્રમમાં રાજ્યના રમતગમત અને સાંસ્કૃતિક મંત્રી ડૉ. જયરામભાઈ ગામીત મુખ્ય મહેમાન તરીકે હાજર રહ્યા હતા. તેમણે વિદ્યાર્થીઓને પ્રોત્સાહિત કરતા જણાવ્યું હતું કે કોલેજનું છેલ્લું વર્ષ જીવનનો સૌથી મહત્વનો વળાંક છે. આ સમયે લીધેલા નિર્ણયો અને નક્કી કરેલા લક્ષ્યો જ ભવિષ્યની દિશા નક્કી કરે છે. મંત્રીશ્રીએ સ્પર્ધાત્મક યુગમાં ટકી રહેવા માટે જ્ઞાન, સખત મહેનત અને લગન પર ભાર મૂક્યો હતો.
સરકારી યોજનાઓ અને કૌશલ્ય વિકાસ દ્વારા ઉજ્જવળ ભવિષ્ય
મંત્રીશ્રીએ વિદ્યાર્થીઓને સરકારની વિવિધ યોજનાઓ જેવી કે ‘ફ્રીશીપ કાર્ડ’નો લાભ લેવા અને ઉચ્ચ અભ્યાસ પૂર્ણ કરવા પ્રેરણા આપી હતી. તેમણે સમજાવ્યું કે આજનો જમાનો મેરિટ અને નોલેજનો છે, તેથી વિદ્યાર્થીઓએ પોતાના કૌશલ્યનો વિકાસ કરવો જોઈએ. યોગ્ય માર્ગદર્શન અને હકારાત્મક વિચારસરણી સાથે મહેનત કરવાથી કોઈપણ સપનું સાકાર કરી શકાય છે. આ પ્રસંગે શિક્ષણ અને સહ-અભ્યાસિક પ્રવૃત્તિઓમાં શ્રેષ્ઠ દેખાવ કરનાર તેજસ્વી વિદ્યાર્થીઓને મહાનુભાવોના હસ્તે ઇનામો આપી સન્માનિત કરવામાં આવ્યા હતા.
પ્રિન્સિપાલ ડૉ. કલ્યાણી ભટ્ટને ભાવભીની વિદાય
આ વાર્ષિકોત્સવમાં કોલેજના પ્રિન્સિપાલ ડૉ. કલ્યાણી આર. ભટ્ટના વયનિવૃત્તિ નિમિત્તે તેમને વિદાય આપવામાં આવી હતી. મંત્રીશ્રીએ તેમને શાલ ઓઢાડી અને માં દેવમોગરાનું સ્મૃતિચિહ્ન અર્પણ કરી કોલેજના વિકાસમાં તેમના અમૂલ્ય યોગદાન બદલ આભાર વ્યક્ત કર્યો હતો. કાર્યક્રમમાં જિલ્લા પંચાયત પ્રમુખ જાલમસિંહ વસાવા સહિત અનેક પદાધિકારીઓ, વિવિધ કોલેજોના આચાર્યો, પ્રાધ્યાપકો અને મોટી સંખ્યામાં વિદ્યાર્થીઓ ઉપસ્થિત રહ્યા હતા. આ કાર્યક્રમ હર્ષોલ્લાસ અને લાગણીસભર વાતાવરણમાં સંપન્ન થયો હતો.
