કોમ્પ્યુટર ટ્રેનિંગને ટ્યુશન ક્લાસની કેટેગરીમાં રાખી શકાય? મોટો સવાલ

ગાંધીનગર – કોમ્પ્યુટર ટ્રેનિંગની કેટેગરીને ટ્યુશન ક્લાસની કેટેગરીમાં મૂકવામાં આવ્યું હોવાથી કોમ્પ્યુટર એસોસિયેશને વિરોધ કર્યો છે અને કહ્યું છે કે આ ટ્રેનિંગને સોફ્ટવેર ટેકનોલોજી કંપની કે આઇટી કંપની ગણવી જોઇએ. આ એસોસિયેશને વડાપ્રધાન નરેન્દ્ર મોદી અને મુખ્યમંત્રી વિજય રૂપાણીને પત્ર લખી કેટેગરી ચેન્જ કરવાની માગણી કરી છે.

આ એસોસિયેશનના પ્રમુખ હેમાંગ રાવલે ઇમેઇલમાં મોકલેલા આવેદનપત્રમાં જણાવ્યું છે કે કોમ્પ્યુટર એજ્યુકેશન એસોસિએશન એ કોમ્પ્યુટર સ્કિલ ટ્રેનિંગ અને ઓનલાઈન ટ્રેનિંગ, સોફ્ટવેર ડેવલોપમેન્ટ ક્ષેત્રે 37,500 લોકોનું ભરણપોષણ કરે છે. ગુજરાતમાં 2500થી વધારે કોમ્પ્યુટર ટ્રેનિંગ સેન્ટરો ચાલે છે. આ સેન્ટરોના 2500 લોકોનું ભરણપોષણ આ ટ્રેનિંગ સેન્ટરથી થાય છે.

આ એસોસિયેશને લોકડાઉનનો ઉલ્લેખ કરી કેન્દ્ર અને રાજ્ય સરકારની આર્થિક મદદ પણ માગી છે, કારણ કે ટ્યુશન ક્લાસની જેમ કોમ્પ્યુટર ટ્રેનિંગ સેન્ટરો પણ લોકડાઉનમાં બંધ રાખવામાં આવ્યા હતા. આ ટ્રેનિંગ સેન્ટરો મોટાભાગે સ્કૂલો અને કોલેજોના વેકેશન સમય દરમ્યાન ચાલતા હોય છે પરંતુ વેકેશન સમય લોકડાઉનમાં જતો રહ્યો હોવાથી સેન્ટરોના સંચાલકોની હાલત કફોડી બની છે.

આ એસોસિયેશને આર્થિક પેકેજની સાથે કેટેગરી બદલવાની પણ માગણી કરી છે અને લોકડાઉન 4.0માં તે ચાલુ રાખવા રજૂઆત કરી છે. આ સાથે એવું પણ કહ્યું છે કે ટ્યુશન ક્લાસમાં એક બેન્ચ પર ત્રણ વિદ્યાર્થીઓ બેસતા હોય છે. મિનિમમ 40 સ્ટુડન્ટ્સની આ બેચ હોય છે પરંતુ એક કોમ્પ્યુટર પર માત્ર એક જ સ્ટુડન્ટ બેસે છે તેથી સોશ્યલ ડિસ્ટન્સિંગનો પણ સવાલ પેદા થતો નથી.

હેમાંગ રાવલે કહ્યું છે કે અત્યારે ધોરણ-12 અને ધોરણ-10ના પરિણામો આવી રહ્યાં છે ત્યારે વાલીઓ તેમના બાળકોને અમારા ટ્રેનિંગ સેન્ટરમાં કોમ્પ્યુટર શિખવા મોકલતા હોય છે પરંતુ લોકડાઉનમાં આ સેન્ટરોને ટ્યુશન ક્લાસ સાથે સરખાવી દેતાં તેને પણ ફરજીયાત બંધ કરવાની ફરજ પડી છે તેથી આ સેન્ટરોની કેટેગરી બદલવા વિનંતી છે.