અમેરિકી રાષ્ટ્રપતિ ડોનાલ્ડ ટ્રમ્પે ફરી 25 ટકા ટેરિફ લગાવ્યો, જાણો ક્યારથી થશે લાગુ
અમેરિકી રાષ્ટ્રપતિ ડોનાલ્ડ ટ્રમ્પે સોમવારે જાહેરાત કરી કે 1 નવેમ્બર, 2025 થી અમેરિકામાં આયાત થતા તમામ મધ્યમ (મીડિયમ) અને ભારે (હેવી) ટ્રકો પર 25% આયાત શુલ્ક (ટેરિફ) લગાવવામાં આવશે. ટ્રમ્પે કહ્યું કે આ પગલું અમેરિકન ઉદ્યોગો અને કામદારોની ગેરવાજબી વિદેશી સ્પર્ધાથી રક્ષા કરવા માટે લેવામાં આવ્યું છે.
ટ્રમ્પે પોતાના સોશિયલ મીડિયા પ્લેટફોર્મ પર લખ્યું કે, “1 નવેમ્બર 2025 થી અન્ય દેશોમાંથી આવતા તમામ મીડિયમ અને હેવી ડ્યુટી ટ્રકો પર 25% ટેરિફ લગાવવામાં આવશે.” તેમણે કહ્યું કે આ નિર્ણય અન્યાયી વિદેશી સ્પર્ધાથી અમેરિકન કંપનીઓ અને કામદારોની રક્ષા કરવા માટે લેવામાં આવ્યો છે. તેમણે સ્પષ્ટ કહ્યું, “અમે અમારા ઉદ્યોગોને વિદેશી ડમ્પિંગ અને ખોટી વેપાર નીતિઓથી નુકસાન નહીં થવા દઈએ.”
કયા દેશો પ્રભાવિત થશે?
આ નિર્ણયની અસર ઘણા દેશો પર પડશે, જેમાં મેક્સિકો, કેનેડા, જાપાન, જર્મની અને ફિનલેન્ડ મુખ્ય છે.
મેક્સિકો અમેરિકામાં સૌથી વધુ મીડિયમ અને હેવી ટ્રકોની નિકાસ કરે છે. 2019 થી અત્યાર સુધીમાં મેક્સિકોની ટ્રક નિકાસ ત્રણ ગણી વધીને લગભગ 3.4 લાખ યુનિટ થઈ ગઈ છે.
અમેરિકા, મેક્સિકો અને કેનેડા વચ્ચે થયેલા USMCA કરાર હેઠળ, અત્યાર સુધી ટ્રકો પર કોઈ શુલ્ક વિના આયાત કરી શકાતી હતી, જોકે તેની 64% વેલ્યુ ઉત્તર અમેરિકામાંથી આવતી હોય. નવો ટેરિફ આ વ્યવસ્થાને અસર કરી શકે છે.
કંપનીઓ પર અસર
Stellantis (જે ‘Ram’ બ્રાન્ડની ટ્રક અને વેન બનાવે છે) ને હવે મેક્સિકોમાં બનેલા ટ્રકો પર વધુ ખર્ચ ઉઠાવવો પડી શકે છે.
Volvo Group સ્વીડનની કંપની છે, જે મેક્સિકોના મોન્ટેરેમાં 700 મિલિયન ડોલરનો નવો ટ્રક પ્લાન્ટ બનાવી રહી છે, જે 2026માં શરૂ થવાની અપેક્ષા છે. નવા ટેરિફથી આ રોકાણ પર પણ અસર થઈ શકે છે.
ટેરિફ લાગુ કરવાની સમયમર્યાદા લંબાવાઈ
ગયા મહિને ટ્રમ્પે કહ્યું હતું કે આ ટેરિફ 1 ઓક્ટોબરથી લાગુ થઈ શકે છે, પરંતુ હવે તેની તારીખ લંબાવીને 1 નવેમ્બર 2025 કરી દેવામાં આવી છે. તેમણે દાવો કર્યો કે આ પગલું Peterbilt, Kenworth અને Freightliner જેવી અમેરિકન કંપનીઓને ફાયદો પહોંચાડશે.
વર્તમાનમાં અમેરિકા, જાપાન અને યુરોપિયન યુનિયન સાથે થયેલા વેપાર કરારો હેઠળ હળવા વાહનો પર 15% ટેરિફ લગાવે છે, પરંતુ નવો નિયમ મોટા વાહનો પર કેવી રીતે લાગુ થશે તે સ્પષ્ટ નથી.
