વડોદરા જિલ્લાના પ્રભારી અને ગૃહ રાજ્ય મંત્રી હર્ષ સંઘવી આજે વડોદરા આવી પહોંચ્યા હતા જ્યાં તેઓનું કલેક્ટર અને ધારાસભ્યો દ્વારા તેમનું સ્વાગત કરવામાં આવ્યું હતું.
ત્યારબાદ હર્ષ સંઘવીના અધ્યક્ષ સ્થાને મળેલી વડોદરા જિલ્લા આયોજન મંડળની બેઠકમાં 2023-24 ના વર્ષમાં રાજ્ય સરકાર દ્વારા આયોજન મંડળની વિવિધ જોગવાઈઓ હેઠળ વડોદરા જિલ્લાના આઠ તાલુકાઓમાં કુલ રૂા.1100 લાખના વિવિધ ૫૩૬ વિકાસ કામો મંજૂર કરવામાં આવ્યા હતા.
રાજ્ય સરકાર દ્વારા મળવાપાત્ર વિકાસલક્ષી અનુદાનોની મદદથી જિલ્લાના તમામ તાલુકાઓમાં પાયાની સુવિધાઓ જેવી કે,ગંદા વસવાટની નાબૂદી, ગ્રામ રસ્તા, પાણી પુરવઠા, પ્રાથમિક શિક્ષણ,ભૂમિ સંરક્ષણ, પોષણ,વીજળીકરણ,સ્થાનિક વિકાસ અને પ્રાથમિક આરોગ્યના ક્ષેત્રોમાં ૧૫ ટકા વિવેકાધિન ( સામાન્ય અને ખાસ અંગભુત) હેઠળ સૂચિત 536 કામોને અમલીકરણ માટે મંજૂરી આપવા ચર્ચા વિચારણા કરાઈ હતી.
મહત્વનુ છે કે રાજ્ય સરકાર પાસેથી 15 ટકા વિવેકાધિન સામાન્ય જોગવાઈ હેઠળ રૂ.895 લાખ અને ખાસ અંગભુત હેઠળ રૂ.80 લાખ મળીને કુલ રૂ.975 લાખ મળવાપાત્ર છે. તેની સામે કુલ રૂ.975 લાખના અંદાજિત ખર્ચથી 499 કામોનું સૂચિત આયોજન તૈયાર કરવામાં આવ્યું છે. આ ઉપરાંત 5 ટકા પ્રોત્સાહક જોગવાઈ હેઠળ ગ્રામ રસ્તા, ભૂમિ સંરક્ષણ અને સ્થાનિક વિકાસના 11 કામોનું રૂ.25 લાખના ખર્ચે સુચિત આયોજન માટે બેઠકમાં ચર્ચા થઈ હતી.
આ બેઠકમાં જિલ્લાની ચાર નગર પાલિકાઓમાં રૂ.100 લાખના ખર્ચથી નિર્માણ થનાર 26 કામોનું આયોજન મંજૂર કરવામાં આવ્યું હતું.
સામાજિક અને શૈક્ષણિક રીતે પછાત વર્ગ (ખાસ પ્લાન) યોજના હેઠળ વર્ષ 2023-24 માં સાવલી અને પાદરા તાલુકામાં રૂ.10 લાખના ખર્ચના પાંચ વિકાસ કામો બેઠકમાં મંજૂર કરવામાં આવ્યા હતા.
ગૃહ રાજ્ય મંત્રી હર્ષ સંઘવીએ આયોજન હેઠળ મંજૂર થયેલ કામો ગુણવત્તા યુક્ત અને સમયમર્યાદામાં પૂર્ણ થાય તે જોવા અમલીકરણ અધિકારીઓને જણાવ્યું હતું.તેમણે અગાઉના જે કામો શરૂ ન થયા હોય તેવા બાકી કામો સત્વરે શરૂ કરી આગામી ત્રણ માસમાં પૂર્ણ કરવા અધિકારીઓને તાકીદ કરી હતી. મંત્રીએ વિકેન્દ્રિત જિલ્લા આયોજન તથા એટીવીટી યોજનાના છેલ્લા ચાર વર્ષના કામોની વિસ્તૃત સમીક્ષા કરી બાકી કામોને ઝડપભેર પૂર્ણ કરવા અધિકારીઓને સૂચના આપી હતી.
