વૈભવ સૂર્યવંશી ક્યારેય ‘પ્રોફેશનલ’ નહીં બની શકે: જીતેશ શર્માનો એબી ડી વિલિયર્સને ચોંકાવનારો જવાબ
ઇન્ડિયન પ્રીમિયર લીગ (IPL) 2026ની શરૂઆતને હવે ગણતરીના દિવસો જ બાકી છે, ત્યારે ક્રિકેટ જગતમાં માત્ર એક જ નામની ચર્ચા છે – વૈભવ સૂર્યવંશી. માત્ર 15 વર્ષની ઉંમરે રાજસ્થાન રોયલ્સ તરફથી રમતા આ યુવા ખેલાડીએ પોતાની વિસ્ફોટક બેટિંગથી વિશ્વભરના દિગ્ગજોને પ્રભાવિત કર્યા છે. જોકે, રોયલ ચેલેન્જર્સ બેંગ્લોર (RCB) ના સ્ટાર વિકેટકીપર જીતેશ શર્માનું માનવું કંઈક અલગ જ છે. જીતેશના મતે, વૈભવ ભલે મેદાન પર ગમે તેટલો મહાન બને, પણ તે ક્યારેય ‘પ્રોફેશનલ’ બની શકશે નહીં.
ડી વિલિયર્સની પ્રશંસા અને જીતેશનો મતભેદ
દક્ષિણ આફ્રિકાના પૂર્વ સુકાની એબી ડી વિલિયર્સ વૈભવની રમતની સમજ અને તેની પરિપક્વતાથી ખૂબ પ્રભાવિત છે. અંડર-19 વર્લ્ડ કપમાં દક્ષિણ આફ્રિકા સામે વૈભવની 175 રનની શાનદાર ઈનિંગ જોઈને ડી વિલિયર્સે તેને અત્યંત ‘પ્રોફેશનલ’ ખેલાડી ગણાવ્યો હતો.
પરંતુ, જ્યારે જીતેશ શર્માને પૂછવામાં આવ્યું કે તે કયા એક યુવા ખેલાડી પર 1 મિલિયન ડોલરનો દાવ લગાવવા તૈયાર છે, ત્યારે તેણે તરત જ વૈભવનું નામ લીધું. જીતેશે કહ્યું, “વૈભવ પાસે ક્રિકેટ જગત પર રાજ કરવાની ક્ષમતા છે. તેની પાસે ‘છઠ્ઠો ગિયર’ છે.” જોકે, ‘પ્રોફેશનલ’ શબ્દ પર જીતેશે ડી વિલિયર્સ સાથે અસંમતિ દર્શાવતા હસતા હસતા કહ્યું કે, વૈભવ મેદાનની બહાર ક્યારેય પ્રોફેશનલ બની શકશે નહીં.
મેદાનની બહારની મસ્તી અને આઈસ્ક્રીમનો પ્રેમ
જીતેશ શર્માએ ગયા વર્ષે ઈન્ડિયા-એ એશિયા કપમાં વૈભવની કેપ્ટનશીપ કરી હતી. તે અનુભવના આધારે જીતેશે જણાવ્યું કે વૈભવમાં હજુ પણ તે બાળક જેવી નિર્દોષતા અને મસ્તી છે જે તેને શિસ્તબદ્ધ ‘પ્રોફેશનલ’ બનતા રોકે છે. જીતેશે એક રમૂજી કિસ્સો શેર કરતા કહ્યું, “તે પ્રોફેશનલ નથી, એ હું ખાતરી પૂર્વક કહી શકું છું. દરેક તેને પ્રોફેશનલ બનાવવાનો પ્રયત્ન કરે છે, પણ મને નથી લાગતું કે તે ક્યારેય બનશે. તે મેદાન પર ભલે પ્રોફેશનલ હોય, પણ મેદાનની બહાર તે પોતાની મરજીનો માલિક છે.”
જીતેશે વધુમાં ઉમેર્યું કે, “હું તેને સતત સલાહ આપતો રહું છું કે રાત્રે આઈસ્ક્રીમ ન ખા, પણ તે માનતો નથી. તેની આ જ અદા તેને બીજાથી અલગ પાડે છે.”
