વૈભવ સૂર્યવંશીએ IPL 2026 પહેલા મચાવ્યું તોફાન, માત્ર 14 બોલમાં ફટકારી ફિફ્ટી, બાઉન્ડ્રીની લગાવી વણઝાર
ટીમ ઈન્ડિયાના સ્ટાર ખેલાડીઓ અત્યારે T20 વર્લ્ડ કપ 2026માં વ્યસ્ત છે, ત્યારે બીજી તરફ ભારતીય ક્રિકેટના ભવિષ્ય ગણાતા યુવા ખેલાડીઓએ IPLની આગામી સીઝન માટે અત્યારથી જ પડઘમ વગાડવાનું શરૂ કરી દીધું છે. મુંબઈમાં રમાઈ રહેલી પ્રતિષ્ઠિત ડીવાય પાટિલ T20 ટૂર્નામેન્ટમાં 14 વર્ષના ઓપનિંગ બેટ્સમેન વૈભવ સૂર્યવંશીએ પોતાની વિસ્ફોટક બેટિંગથી ક્રિકેટ જગતને ચોંકાવી દીધું છે. તેણે માત્ર 14 બોલમાં અડધી સદી ફટકારીને IPL ફ્રેન્ચાઈઝીઓનું ધ્યાન ખેંચ્યું છે.
વૈભવ સૂર્યવંશીએ 331ના સ્ટ્રાઈક રેટથી રન ઝૂડ્યા
ડીવાય પાટિલ બ્લુ ટીમ તરફથી રમતા વૈભવ સૂર્યવંશીએ ઈન્ડિયન નેવી સામેના મુકાબલામાં રનનો પહાડ તોડી નાખ્યો હતો. નેવીની ટીમે આપેલા 220 રનના વિશાળ લક્ષ્યાંકનો પીછો કરવા ઉતરેલી બ્લુ ટીમ તરફથી વૈભવે શરૂઆતથી જ આક્રમક વલણ અપનાવ્યું હતું. તેણે માત્ર 14 બોલમાં જ પોતાની ફિફ્ટી પૂરી કરી લીધી હતી. પોતાની 19 બોલની ટૂંકી પણ ધમાકેદાર ઇનિંગમાં વૈભવે 63 રન બનાવ્યા હતા, જેમાં 7 ચોગ્ગા અને 5 છગ્ગાનો સમાવેશ થાય છે. આ દરમિયાન તેનો સ્ટ્રાઈક રેટ 331.58નો રહ્યો હતો, જે જોઈને વિરોધી ટીમના બોલરો લાચાર દેખાતા હતા.
અર્જુન તેંડુલકરનો પણ જોવા મળ્યો જલવો
આ મેચમાં માત્ર વૈભવ જ નહીં, પણ સચિન તેંડુલકરના પુત્ર અર્જુન તેંડુલકરે પણ શાનદાર પ્રદર્શન કર્યું હતું. ડીવાય પાટિલ બ્લુ ટીમ માટે રમતા અર્જુને મુશ્કેલ સમયે ટીમની કમાન સંભાળી હતી અને 29 બોલમાં અણનમ 55 રન બનાવ્યા હતા. અર્જુને પોતાની ઇનિંગમાં 7 ચોગ્ગા અને 2 છગ્ગા ફટકાર્યા હતા અને ટીમને 19.1 ઓવરમાં વિજય અપાવીને જ મેદાનની બહાર આવ્યો હતો. વૈભવ અને અર્જુન બંનેનું આ ફોર્મ આગામી IPL 2026 માટે અત્યંત મહત્વનું માનવામાં આવે છે.
14 ball 50 for Vaibhav Suryavanshi 👀 against the Indian Navy in the DY PATIL T20 CUP pic.twitter.com/KAcl0UOJ3V
— Rithik Rajeev Yadav (@Rithikdb5) February 26, 2026
IPL 2026 માટે આ ખેલાડીઓ પર રહેશે નજર
વૈભવ સૂર્યવંશી જેવી નાની ઉંમરે આટલી પરિપક્વ અને આક્રમક બેટિંગ કરવી એ કોઈ સામાન્ય વાત નથી. તેની આ ઈનિંગ બાદ સોશિયલ મીડિયા પર તેની ખૂબ પ્રશંસા થઈ રહી છે. IPLની 19મી સીઝન શરૂ થવામાં હવે ગણતરીના દિવસો બાકી છે, ત્યારે ફ્રેન્ચાઈઝીઓ આવા યુવા અને આક્રમક ખેલાડીઓને પ્લેઈંગ ઈલેવનમાં તક આપવા માટે ચોક્કસપણે વિચારશે. ખાસ કરીને વૈભવની નિખરતી બેટિંગ શૈલી તેને આગામી સમયનો મોટો સ્ટાર બનાવી શકે છે.
