વલસાડ જિલ્લામાં દંગા ફસાદ કરવાની નેમ ધરાવતા તત્વોને ચેતી જવા પોલીસનો હુંકાર,જાહેર જનતા માટે હેલ્પ લાઈન જાહેર કરાયો

રાજ્યમાં હાલ ખંભાત, હિંમતનગર વગરે જગ્યાએ ફાટી નીકળેલા કોમી હુલ્લડો વચ્ચે તંગદીલીનો માહોલ હોય ખોટી અફવા ફેલાય નહિ અને શાંતિ ડહોળાય નહિ તે માટે સોશયલ મીડિયા ઉપર પોલીસ વોચ રાખી રહી છે,ત્યારે વલસાડ જિલ્લા પોલીસની ટેકનીકલ તથા સાયબર ક્રાઇમ ટીમ તેમજ વાપી પોલીસ આવા તત્વો ઉપર બાજ નજર રાખી રહી છે.
જો કોઈ પણ સોશિયલ મીડિયાના પ્લેટફોર્મ ઉપર કોઈપણ પ્રકારના ઉશ્કેરણીજનક મેસેજ કે કોમી એખલાસ ભર્યા વાતાવરણની શાંતિને ડહોળવાની પ્રવૃતિઓ થતી હોવાનું જણાય આવશે તો તેઓ વિરુદ્ધ કાયદેસરની કાર્યવાહી કરવામાં આવશે. જેની જાહેર જનતાએ નોંધ લેવા અપીલ કરી છે. વાપી ટાઉન પોલીસને મદદરૂપ થવા મો.નં. 7984188023 ઉપર માહિતી વોટ્સએપ શેર કરવા અપીલ કરવામાં આવી છે.
વલસાડ જિલ્લામાં કોમી એખલાસભર્યુ વાતાવરણ જાળવવા માટે જિલ્લા પોલીસે અપીલ કરતા જણાવ્યું છે કે, સોશ્યિલ મીડિયાના માધ્યમથી કેટલાક અસામાજિક તત્વો શહેરમાં શાંતિ ડહોળાય તેવા પ્રયત્નો કરી રહ્યા હોય એવા તત્વો સામે તાત્કાલિક કડક પગલા ભરવા પોલીસ સક્રિય બની છે અને નજર રાખી રહી છે.