વલસાડ જિલ્લા ના વાપી માં ડુપ્લીકેટ આરસીબુક બનાવવા સહિત પોલીસ ના ખોટા અભિપ્રાય અને પોલીસ ના ખોટા સ્ટેમ્પ મારવાનું મસમોટું કૌભાંડ બહાર આવતા સનસનાટી મચી ગઇ છે.
વિગતો મુજબ વાપી જીઆઇડીસી ચાર રસ્તા સ્થિત પંચરત્ન બિલ્ડિંગમાં પટેલ મોટર્સ ડ્રાઇવિંગ નામની સ્કૂલ ચલાવતા અને આરટીઓનું કામ કરતા અલીભાઇ પટેલ અને તેમનો પુત્ર આરિફ ગુમ ગયેલી અથવા ખોવાયેલી વાહનની આરસી બુક આરટીઓમાંથી ડુપ્લીકેટ કઢાવી આપવા માટે જેતે પોલીસ સ્ટેશનના બોગસ રબર સ્ટેમ્પનો ઉપયોગ કરીને તથા અધિકારીની ખોટી સહીઓ કરીને આરસી બુક બનાવતા હોવાના રેકેટ નો પર્દાફાશ થયો છે.
પોલીસે આ ઘટના માં આરટીઓ એજન્ટ અલી ઇસ્માઇલ પટેલ અને તેમનો પુત્ર આરિફ બંને રહે. મુસ્કાન રો હાઉસ, ન્યૂ રાંદેર રોડ – સુરતની ઘરપકડ કરી ઓફિસમાંથી જિલ્લાના અલગ અલગ પોલીસ સ્ટેશનના રબર સ્ટેમ્પ તથા પોલીસના લખાણવાળા દાખલાના પ્રફોર્મા જપ્ત કર્યા હતા. પોલીસે તમામ દસ્તાવેજો અને 16 બોગસ રબર સ્ટેમ્પ, ચાર નંગ મોબાઇલ મળી કુલ 16 હજારનો મુદ્દામાલ કબજે લીધો હતો.
પોલીસ ની પ્રાથમિક તપાસ માં ખુલાસો થયો કે સુરતમાં રહેતા આ આરોપીઓ વાપીમાં ઓફિસ શરૂ કરીને છેલ્લા અઢી વર્ષની બોગસ દસ્તાવેજના આધારે આરસી બુક કાઢી આપવાનું કૌંભાડ ચલાવી રહ્યા હતા. ડુપ્લીકેટ આરસી બુક કાઢવાના આરોપી 5થી 10 હજાર રૂપિયા લેતા હતા.
ખરેખર તો વાહનની આરસી બુક ગુમ, ચોરી કે ખોવાય જાય તો જે તે પોલીસ સ્ટેશનમાં અરજી કે FIR કરવી પડે છે. જે બાદ પોલીસ તપાસ કરીને નવી ડુપ્લીકેટ આરસી બુક માટે અભિપ્રાય લખી આપતી હોય છે. આ એજન્ટે પાંચ હજારમાં જિલ્લાના પોલીસ સ્ટેશનનો સિક્કો બનાવી પોતે જ અભિપ્રાય લખીને સ્ટેમ્પ મારી દેતા હતા. આમ આ મોટું રેકેટ બહાર આવ્યું છે.
