ભાગેડુ ઉદ્યોગપતિ વિજય માલ્યાની મુશ્કેલીઓ યથાવત: હાઈકોર્ટમાં બેંકોએ રજૂ કર્યું અપડેટેડ સોગંદનામું
ભારતીય બેંકિંગ ક્ષેત્રના સૌથી ચર્ચિત અને મોટા કૌભાંડોમાં સામેલ વિજય માલ્યાના કેસમાં નવો ખુલાસો થયો છે. સ્ટેટ બેંક ઑફ ઇન્ડિયા (SBI) ની અગુવાવાળા બેંકોના કન્સોર્ટિયમ બોમ્બે હાઈકોર્ટમાં એક સોગંદનામું દાખલ કરીને જણાવ્યું છે કે ભાગેડુ ઉદ્યોગપતિ વિજય માલ્યા પાસેથી ૩૧ ઑગસ્ટ ૨૦૨૬ સુધીમાં આશરે ₹૮,૭૫૧.૮૬ કરોડની રકમ હજુ પણ વસૂલવાની બાકી છે. આ રકમ કોઈપણ પ્રકારના કાનૂની કે અન્ય ખર્ચાઓને બાદ કર્યા વગરની છે, જે દર્શાવે છે કે બેંકોની લોનની રકમની વસૂલાતની પ્રક્રિયા હજુ અધૂરી છે.
બેંકો દ્વારા અત્યાર સુધીમાં કુલ કેટલી રકમની રિકવરી થઈ?
બેંકોએ કોર્ટમાં રજૂ કરેલી માહિતી મુજબ, ડેટ રિકવરી ઑફિસર (DRO) ના માધ્યમથી અત્યાર સુધીમાં અંદાજે ₹૧૦,૨૭૦ કરોડની રકમ અસ્થાયી રૂપે રિકવર કરવામાં આવી છે. આ ઉપરાંત, કાનૂની મુકદ્દમો દાખલ થતા પહેલાં અગાઉ ₹૫૪૪.૫૮ કરોડની રિકવરી થઈ ચૂકી હતી. જોકે, બેંકોનું સ્પષ્ટપણે કહો છે કે આ રિકવર થયેલી રકમને કુલ બાકી લેણાંમાંથી સીધી બાદ કરીને જોઈ શકાય નહીં. અગાઉ જાન્યુઆરી ૨૦૨૬માં દાખલ કરવામાં આવેલા એક સોગંદનામામાં આશરે ₹૮,૧૩૫.૬૩ કરોડનું દેવું બાકી હોવાનું જણાવાયું હતું, પરંતુ સમયની સાથે વ્યાજ અને અન્ય નાણાકીય દેયતાઓ ઉમેરાતા આ રકમ ૩૧ ઑગસ્ટ સુધીમાં વધીને ₹૮,૭૫૧.૮૬ કરોડ પર પહોંચી ગઈ છે.
વિજય માલ્યાના દાવાઓ સામે બેંકોનો સખત વિરોધ
ઉલ્લેખનીય છે કે, વિજય માલ્યાએ વર્ષ ૨૦૨૦માં બોમ્બે હાઈકોર્ટમાં અરજી કરીને પોતાની સામે ચાલી રહેલા ફોજદારી અને કાનૂની કેસોને રદ કરવાની માંગ કરી હતી. માલ્યાનો એવો દાવો હતો કે બેંકોએ તેમની પાસેથી તેમની કુલ દેનદારી કરતાં પણ વધુ રકમ વસૂલ કરી લીધી છે અને હવે આ વિવાદનો સંપૂર્ણ અંત આવી ચૂક્યો છે. તાજેતરમાં દાખલ કરવામાં આવેલા નવા સોગંદનામામાં બેંકોએ માલ્યાના આ દાવાઓને ફગાવી દીધા છે અને સ્પષ્ટ કર્યું છે કે હજુ પણ કરોડો રૂપિયા વસૂલવાના બાકી છે.
બેંકોએ કોર્ટને એમ પણ જણાવ્યું છે કે આ સમગ્ર કેસમાં જપ્ત (Attatch) કરવામાં આવેલા કેટલાક શેરો હજુ સુધી વેચવામાં આવ્યા નથી અને તે સુરક્ષિત છે. આનો અર્થ સ્પષ્ટ છે કે બેંકોની રિકવરી પ્રક્રિયા હજુ પૂરી થઈ નથી અને કાનૂની લડાઈ આગામી સમયમાં પણ ચાલુ રહેશે.
એન્ફોર્સમેન્ટ ડિરેક્ટરોટ (ED) નું વલણ અને મની લોન્ડરિંગના કેસ
આ સમગ્ર મામલામાં પ્રવર્તન નિદેશાલય (ED) એ પણ કોર્ટમાં પોતાની અલગ દલીલ રજૂ કરી છે. ED ના જણાવ્યા અનુસાર, અત્યાર સુધીમાં અંદાજે ₹૧૪,૧૩૧.૬ કરોડની ચલ અને અચલ સંપત્તિઓ એસબીઆઈના નેતૃત્વવાળા બેંક કન્સોર્ટિયમને પરત કરવામાં આવી છે. જોકે, ઇડીનું માનવું છે કે બેંક દ્વારા લોનની રકમની વસૂલાત અને મની લોન્ડરિંગ (નાણાકીય હેરાફેરી) તથા અન્ય ફોજદારી કેસોને તદ્દન અલગ-અલગ દ્રષ્ટિએ જોવામાં આવવા જોઈએ. આ કાનૂની જટિલતાઓને કારણે વિજય માલ્યા સામેની મુશ્કેલીઓ હજુ પણ યથાવત છે અને બેંકો તથા તપાસ એજન્સીઓ દેશના નાણાં પાછા મેળવવા માટે કાયદાકીય માર્ગે અથાક પ્રયાસો કરી રહી છે.
