Video: યુવકે અડક્યા વગર વગાડ્યો મંદિરનો ઘંટ! વીડિયો જોઈને લોકોનું ચકરાવે ચડ્યું માથું
સોશિયલ મીડિયા પર અત્યારે એક એવો વીડિયો ધૂમ મચાવી રહ્યો છે, જેને જોઈને તમે તમારી આંખો પર વિશ્વાસ નહીં કરી શકો. સામાન્ય રીતે આપણે જ્યારે મંદિરમાં જઈએ છીએ, ત્યારે ઘંટ વગાડવા માટે તેને હાથથી અડકવું પડે છે. પરંતુ આ વાયરલ વીડિયોમાં એક શખ્સે હાથ લગાવ્યા વગર જ ઘંટને હવામાં હલાવી દીધો અને જોરજોરથી વગાડવા પણ માંડ્યો. આ ચમત્કાર છે કે કોઈ ટ્રીક? તે જોઈને ઈન્ટરનેટ પર લોકો બે જૂથમાં વહેંચાઈ ગયા છે.
શું છે આ વીડિયોમાં?
આશરે 25 સેકન્ડની આ વીડિયો ક્લિપમાં એક શખ્સ મંદિરના ગર્ભગૃહની સામે ઉભેલો જોવા મળે છે. તેની સામે મંદિરનો મોટો અને ભારે ઘંટ લટકી રહ્યો છે. આ શખ્સ પૂરા એકાગ્ર ચિત્તે ઘંટ તરફ જુએ છે અને પછી હવામાં પોતાના હાથ એવી રીતે ફેરવે છે જાણે તે ઘંટને આદેશ આપી રહ્યો હોય. જોતજોતામાં ઘંટ આપમેળે હલવા લાગે છે અને જોરદાર અવાજ સાથે વાગવા માંડે છે.
કોણ છે આ ચમત્કાર કરનાર શખ્સ?
આ વીડિયો ઇન્સ્ટાગ્રામ પર @powelljadaun એકાઉન્ટ પરથી પોવેલ જાદૌન નામના યુઝરે શેર કર્યો છે. પોવેલે પોતાની પ્રોફાઈલમાં પોતાને એક લેખક, દિગ્દર્શક, એડિટર અને યોગી ગણાવ્યા છે. તેમનો દાવો છે કે તેમણે આ અદભૂત કારનામું ‘મંત્ર સિદ્ધિ’ દ્વારા કરી બતાવ્યું છે. તેમની પ્રોફાઈલ પર આવા અનેક વીડિયો છે જે જોઈને લોકો આશ્ચર્યમાં મુકાઈ જાય છે.
View this post on Instagram
લોકોએ લીધી ફિરકી: “બોર્ડર પર જઈને મિસાઈલની દિશા બદલી નાખો”
વીડિયો વાયરલ થતા જ કોમેન્ટ્સનો વરસાદ થયો છે. કેટલાક લોકો તેને આધ્યાત્મિક શક્તિ માની રહ્યા છે, તો મોટાભાગના લોકો તેને માનવા તૈયાર નથી.
- એક યુઝરે લખ્યું: “ભાઈ, ફિઝિક્સના 50થી વધુ નિયમો એકસાથે તૂટી ગયા!”
- બીજાએ ચેલેન્જ આપી: “હલતા ઘંટને અડ્યા વગર રોકીને બતાવો, તો અમે માનીએ.”
- અન્ય એકે મજાક કરતા કહ્યું: “ભાઈ, તમે બોર્ડર પર જતા રહો, ત્યાં દુશ્મનની મિસાઈલની દિશા બદલી નાખજો, દેશનું ભલું થશે!”
- ઘણા લોકોએ સવાલ ઉઠાવ્યો કે જ્યારે મંદિર ખાલી હોય ત્યારે જ આવા ચમત્કાર કેમ થાય છે? ભીડમાં આવું કરીને બતાવો.
શું આ ખરેખર શક્ય છે?
આજના આધુનિક યુગમાં CGI (Computer Generated Imagery), એડિટિંગ સોફ્ટવેર કે પછી પારદર્શક દોરાઓ (Invisible threads) નો ઉપયોગ કરીને આવા વીડિયો બનાવવા ખૂબ જ સરળ છે. પોવેલ પોતે એક એડિટર હોવાથી લોકો આ વીડિયોને એડિટિંગની કરામત માની રહ્યા છે. જોકે, પોવેલ તેને પોતાની યોગ શક્તિ ગણાવી રહ્યા છે. સત્ય ગમે તે હોય, પણ આ વીડિયોએ અત્યારે લોકોના મગજ ચોક્કસ ચકરાવે ચડાવ્યા છે.
