વિરાટ કોહલીએ સ્લિપમાં પકડ્યો અદભૂત કેચ, તોડ્યો એમ.એસ. ધોનીનો રેકોર્ડ! 37 વર્ષની ઉંમરે રચ્યો નવો ઇતિહાસ, જુઓ VIDEO
વિરાટ કોહલી માત્ર પોતાની શાનદાર બેટિંગ માટે જ નહીં, પરંતુ મેદાન પરની ચપળતા અને અદભૂત ફિલ્ડિંગ માટે પણ જાણીતા છે. આ વાત તેમણે ફરી એકવાર સાબિત કરી છે. ભારત અને ન્યૂઝીલેન્ડ વચ્ચે ઓકલેન્ડના ઈડન પાર્કમાં રમાઈ રહેલી પ્રથમ વન-ડે મેચમાં કોહલીએ એવો શાનદાર કેચ પકડ્યો કે મેદાન પર હાજર ખેલાડીઓ પણ આશ્ચર્યચકિત થઈ ગયા હતા. સ્લિપમાં ઊભેલા કોહલીએ જમણી તરફ ડાઇવ લગાવીને એક હાથે નાથન સ્મિથનો કેચ પકડ્યો હતો. આ કેચ સાથે તેમણે ભારતીય ક્રિકેટના દિગ્ગજ ખેલાડી એમ.એસ. ધોનીનો એક ખાસ રેકોર્ડ પણ તોડી નાખ્યો છે.
ખાસ વાત એ છે કે 37 વર્ષની ઉંમરે પણ કોહલીની ફિટનેસ અને ફિલ્ડિંગમાં જોવા મળતી ચપળતા યુવા ખેલાડીઓ માટે પ્રેરણારૂપ છે. આ મેચમાં ભારતીય ટીમે માત્ર બોલિંગમાં જ નહીં, પરંતુ ફિલ્ડિંગમાં પણ શાનદાર પ્રદર્શન કર્યું હતું. રોહિત શર્માના રનઆઉટ બાદ હવે વિરાટ કોહલીના અદભૂત કેચની ચર્ચા થઈ રહી છે. ભારતીય ટીમે આ મુકાબલામાં ન્યૂઝીલેન્ડને 185 રનમાં ઓલઆઉટ કરવામાં સફળતા મેળવી હતી.
વિરાટ કોહલીએ એક હાથે પકડ્યો અદભૂત કેચ, નાથન સ્મિથને મોકલ્યા પેવેલિયન
ન્યૂઝીલેન્ડની ઇનિંગ્સની 29મી ઓવર દરમિયાન ભારતીય ઝડપી બોલર અંશુલ કંબોજ બોલિંગ કરી રહ્યા હતા. ઓવરના એક બોલ પર ન્યૂઝીલેન્ડના બેટ્સમેન નાથન સ્મિથના બેટની કિનારી લાગી હતી. બોલ ઝડપથી સેકન્ડ સ્લિપની દિશામાં ગયો હતો. ત્યાં ફિલ્ડિંગ કરી રહેલા વિરાટ કોહલીએ પોતાની જમણી તરફ જોરદાર ડાઇવ લગાવી અને એક હાથે બોલને પકડી લીધો હતો.
કોહલીનો આ કેચ એટલો શાનદાર હતો કે તેઓ પોતે પણ ક્ષણભર માટે આશ્ચર્યચકિત થઈ ગયા હતા. જોકે, તરત જ તેમણે વિકેટની ઉજવણી શરૂ કરી દીધી હતી. કેચ સાચો પકડાયો છે કે નહીં તેની ખાતરી કરવા માટે નિર્ણય થર્ડ અમ્પાયર પાસે મોકલવામાં આવ્યો હતો. રિપ્લેમાં સ્પષ્ટ થયું કે કોહલીએ બોલને જમીન પર પડવા દીધા વિના સુરક્ષિત રીતે પકડી લીધો હતો. ત્યારબાદ નાથન સ્મિથને આઉટ જાહેર કરવામાં આવ્યા હતા.
કેચ પકડ્યા બાદ કોહલીનો ઉત્સાહ જોવા જેવો હતો. તેમણે બોલ અમ્પાયર તરફ ઉછાળીને પોતાની ખુશી વ્યક્ત કરી હતી. આ ઘટનાનો વીડિયો પણ ક્રિકેટપ્રેમીઓમાં ચર્ચાનો વિષય બન્યો છે. કોહલીની આ ફિલ્ડિંગે ફરી સાબિત કર્યું કે તેમની પાસે હજુ પણ મેદાન પર મેચનો મિજાજ બદલવાની ક્ષમતા છે.
એમ.એસ. ધોનીનો રેકોર્ડ તૂટ્યો, કોહલી બન્યા સૌથી મોટી ઉંમરના ભારતીય
નાથન સ્મિથનો આ કેચ પકડવાની સાથે જ વિરાટ કોહલીએ એક ખાસ રેકોર્ડ પોતાના નામે કર્યો છે. તેઓ ન્યૂઝીલેન્ડની ધરતી પર વન-ડે ક્રિકેટમાં કેચ પકડનારા સૌથી મોટી ઉંમરના ભારતીય ખેલાડી બન્યા છે. આ મામલે તેમણે પૂર્વ ભારતીય કેપ્ટન એમ.એસ. ધોનીને પાછળ છોડી દીધા છે.
આંકડા પ્રમાણે, એમ.એસ. ધોનીએ ન્યૂઝીલેન્ડમાં 37 વર્ષ અને 218 દિવસની ઉંમરે કેચ પકડ્યો હતો. જ્યારે વિરાટ કોહલીએ 37 વર્ષ અને 364 દિવસની ઉંમરે આ સિદ્ધિ મેળવી છે. આમ, કોહલીએ ધોનીનો રેકોર્ડ તોડીને પોતાના નામે એક નવો રેકોર્ડ નોંધાવ્યો છે.આ સિદ્ધિ ખાસ એટલા માટે પણ મહત્ત્વપૂર્ણ છે કે આંતરરાષ્ટ્રીય ક્રિકેટમાં ઉંમરની સાથે ખેલાડીઓની ઝડપ અને ચપળતા જાળવી રાખવી પડકારજનક બની શકે છે. જોકે, કોહલી પોતાની ફિટનેસ અને રમત પ્રત્યેના સમર્પણથી સતત સાબિત કરી રહ્યા છે કે તેઓ હજુ પણ ફિલ્ડિંગમાં સર્વશ્રેષ્ઠ પ્રદર્શન કરી શકે છે.
It’s the King’s birthday weekend, and we get the presents! 👑 🎁
Watch the HERO VIDA India Tour of New Zealand 1st ODI, LIVE NOW on Sony Sports Network TV channels, Sony LIV & Sony Vizha.
#SonySportsNetwork #SonyLIV #SonyVizha #NZvIND | [Virat Kohli] https://t.co/LffbctfFwm
— Sony Sports Network (@SonySportsNetwk) November 4, 2026
અર્શદીપ અને ગુરનૂરની ઘાતક બોલિંગ, ન્યૂઝીલેન્ડ 185 રનમાં ઓલઆઉટ
ઓકલેન્ડ વન-ડેમાં ભારતીય કેપ્ટન શુભમન ગિલે ટોસ જીતીને પહેલાં બોલિંગ કરવાનો નિર્ણય લીધો હતો. ચાર ઝડપી બોલરો સાથે મેદાનમાં ઉતરવાનો તેમનો નિર્ણય સફળ સાબિત થયો હતો. ભારતીય બોલરોએ શરૂઆતથી જ ન્યૂઝીલેન્ડના બેટ્સમેનો પર દબાણ બનાવ્યું હતું અને આખી ટીમને 185 રનમાં ઓલઆઉટ કરી દીધી હતી.
ભારત તરફથી અર્શદીપ સિંહે શાનદાર બોલિંગ કરતાં પોતાની 10 ઓવરમાં 4 વિકેટ ઝડપી હતી. ગુરનૂર બ્રારે પણ પ્રભાવશાળી પ્રદર્શન કરીને 3 વિકેટ પોતાના નામે કરી હતી. જ્યારે અંશુલ કંબોજે 2 વિકેટ મેળવી હતી.બીજી તરફ, આકિબ નબીને આ મેચમાં એકપણ વિકેટ મળી નહોતી, પરંતુ નવી બોલ સાથે તેમણે ન્યૂઝીલેન્ડના બેટ્સમેનોને મુશ્કેલીમાં મૂક્યા હતા. ભારતીય બોલરોની સાથે ફિલ્ડરોએ પણ તેમને સારો સાથ આપ્યો હતો.
