Bilawal Bhutto: બિલાવલ ભુટ્ટોનું કબૂલનામું, પહેલગામ હુમલો આતંકી હતો, પાકિસ્તાનમાં LeT અને JeM સક્રિય
Bilawal Bhutto: પાકિસ્તાનના ભૂતપૂર્વ વિદેશ પ્રધાન બિલાવલ ભુટ્ટો ઝરદારીએ પહેલી વાર સ્વીકાર્યું છે કે જમ્મુ-કાશ્મીરના પહેલગામમાં થયેલો હુમલો આતંકવાદી હુમલો હતો. તેમણે એ પણ સ્વીકાર્યું કે લશ્કર-એ-તૈયબા (એલઈટી) અને જૈશ-એ-મોહમ્મદ (જેઈએમ) જેવા આતંકવાદી સંગઠનોની પાકિસ્તાનમાં વાસ્તવિક હાજરી છે.
ભારતીય પત્રકાર કરણ થાપરને આપેલા ઇન્ટરવ્યુમાં બિલાવલે કહ્યું, “હું આ હુમલાના પીડિતો અને તેમના પરિવારોનું દુઃખ સમજી શકું છું.” જોકે, તેમણે સ્પષ્ટ કર્યું કે આ હુમલાઓમાં પાકિસ્તાની સરકાર કે સેનાનો કોઈ સીધો હાથ નથી. તેમણે આ આરોપોને “પ્રચાર” ગણાવ્યા.
પાકિસ્તાન આતંકવાદનો પીડિત – ભુટ્ટોનો દાવો
બિલાવલે દાવો કર્યો કે પાકિસ્તાન પોતે આતંકવાદનો શિકાર રહ્યું છે અને દાયકાઓથી તેની સામે સંઘર્ષ કરી રહ્યું છે. તેમણે કહ્યું કે દેશે આ યુદ્ધમાં અત્યાર સુધીમાં 92,000 થી વધુ લોકો ગુમાવ્યા છે. તેમણે ચેતવણી આપી હતી કે જો પરિસ્થિતિ નહીં બદલાય તો 2025 પાકિસ્તાન માટે સૌથી હિંસક વર્ષ બની શકે છે.
મુંબઈ હુમલા અને હાફિઝ સઈદ પર પ્રતિક્રિયા
મુંબઈ હુમલા અને હાફિઝ સઈદ પર પ્રશ્નો પૂછવામાં આવતા બિલાવલે કહ્યું કે સઈદને 2022 માં 31 વર્ષની સજા ફટકારવામાં આવી હતી. તેમણે મુંબઈ કેસમાં વિલંબ માટે ભારતને દોષી ઠેરવ્યું અને કહ્યું કે ભારતે પૂરતો સહયોગ આપ્યો નથી, ખાસ કરીને સાક્ષીઓ રજૂ કરવામાં.
ભારત-પાકિસ્તાન સંવાદના હિમાયતી
બિલાવલે ભારત અને પાકિસ્તાન વચ્ચે વ્યાપક વાતચીતની હાકલ કરી, જેમાં આતંકવાદનો પણ સમાવેશ થાય છે. તેમણે કહ્યું કે “દરેક પાકિસ્તાની આતંકવાદી નથી” અને “આપણે નફરતને બદલે શાંતિ તરફ આગળ વધવું જોઈએ.” તેમણે 2007 માં તેમની માતા બેનઝીર ભુટ્ટોની આતંકવાદી હત્યાનો પણ ઉલ્લેખ કર્યો.
લશ્કર અને જૈશ-એ-મોહમ્મદના અસ્તિત્વનો સ્વીકાર કર્યો
બિલાવલે સ્વીકાર્યું કે લશ્કર અને જૈશ-એ-મોહમ્મદ જેવા સંગઠનો હજુ પણ પાકિસ્તાનમાં અસ્તિત્વ ધરાવે છે. તેમણે કહ્યું કે આ સંગઠનો અફઘાન જેહાદ દરમિયાન ઉભરી આવ્યા હતા અને બાદમાં તેમને “આતંકવાદી જૂથો” જાહેર કરવામાં આવ્યા હતા. પીપીપી અને તેમની માતાએ ક્યારેય તેમને ટેકો આપ્યો નથી, તેના બદલે તેમની સામે કાર્યવાહી કરવામાં આવી છે.
ઇન્ટરવ્યૂમાં ગુસ્સો
ઇન્ટરવ્યૂ દરમિયાન આતંકવાદી સંગઠનો અને મુંબઈ હુમલાઓ વિશે વારંવાર પ્રશ્નો પૂછવામાં આવતા બિલાવલ ગુસ્સે થઈ ગયા અને કહ્યું, “જો તમે જવાબ સાંભળવા માંગતા નથી, તો હું ઇન્ટરવ્યૂ છોડી દઈશ.”
