શ્રીલંકામાં ફરી એક વખત બોંબ બ્લાસ્ટ થયા છે. કોલંબોથી 40 કિમી દૂર આવેલા પુગોડા શહેરમાં આજે બોંબ ધડાકા સાંભળવા મળ્યા હતા. સમાચાર એજન્સી રોઇટર્સના અહેવાલ મુજબ પુગોડા શહેરમાં ગુરુવારે સવારે બ્લાસ્ટ થયા હતા. પોલીસ અને સ્થાનિક નાગરિકોનાં જણાવ્યા અનુસાર આ બ્લાસ્ટ પુગોડામાં મેજિસ્ટ્રેટ કોર્ટની પાછળની એક ખાલી જગ્યામાં થયો છે. આ ઘટનામાં હજી સુધી કોઈ જાનહાની થઈ હોવાના કોઈ સમાચાર મળ્યા નથી.
ઉલ્લેખનીય છે કે, શ્રીલંકામાં રવિવારે થયેલ સીરિયલ બોંબ બ્લાસ્ટમાં મૃતકોની સંખ્યા 359 થઈ ગઈ હતી. ત્યારબાદ મોટા પાયે સર્ચ ઓપરેશન હાથ ધરાયું હતું. સર્ચ ઓપરેશન અંતર્ગત મંગળવારે કેટલાક લોકોની ધરપકડ કરવામાં આવી હતી. આતંકી સંગઠન આઈએસઆઈએસે શ્રીલંકામાં થયેલ આઠ ઘાતકી હુમલાની જવાબદારી સ્વિકારી હતી. શ્રીલંકામાં આતંકી હુમલો કરનાર આતંકીઓની પણ ઓળખ થઈ ગઈ છે.