Pakistan સામે કાર્યવાહી કરતા પહેલા ભારતનું મોટું નિવેદન – ‘OICનું પક્ષપાતી વલણ અસ્વીકાર્ય’
Pakistan: ભારતે મંગળવારે ઓર્ગેનાઇઝેશન ઓફ ઇસ્લામિક કોઓપરેશન (OIC) ના તે નિવેદનને સખત શબ્દોમાં નકારી કાઢ્યું જેમાં જમ્મુ અને કાશ્મીરના પહેલગામમાં થયેલા આતંકવાદી હુમલાને સરહદ પારના આતંકવાદ સાથે જોડવાનો ઇનકાર કરવામાં આવ્યો હતો. વિદેશ મંત્રાલયે સ્પષ્ટતા કરી કે આ નિવેદન પાકિસ્તાનના ઇશારે જારી કરવામાં આવ્યું હતું અને તેને સંપૂર્ણપણે નકારી કાઢવામાં આવે છે.
વિદેશ મંત્રાલયના પ્રવક્તા રણધીર જયસ્વાલે કહ્યું, “OICનું આ નિવેદન વાહિયાત છે, જેમાં પહેલગામ હુમલાના સરહદ પારના જોડાણને અવગણવામાં આવ્યું છે. આ સ્પષ્ટપણે પાકિસ્તાનનું એક ષડયંત્ર છે, જે OICને ગેરમાર્ગે દોરીને પોતાના રાજકીય હિતોની સેવા કરવા માંગે છે.”
તેમણે કહ્યું કે પાકિસ્તાન લાંબા સમયથી સરહદ પાર આતંકવાદને પ્રોત્સાહન આપી રહ્યું છે, અને હવે OIC જેવા મંચોનો ઉપયોગ કરીને આંતરરાષ્ટ્રીય સમુદાયને ગેરમાર્ગે દોરવાનો પ્રયાસ કરી રહ્યું છે. ભારતે પોતાના આંતરિક બાબતો પર OICની ટિપ્પણીઓને પણ નકારી કાઢી.
પોતાના નિવેદનમાં, OIC એ દક્ષિણ એશિયામાં બગડતી સુરક્ષા પરિસ્થિતિ પર ચિંતા વ્યક્ત કરી અને ભારત અને પાકિસ્તાનને સંયમ રાખવા અને વાતચીત પુનઃસ્થાપિત કરવા અપીલ કરી. સંગઠને બંને દેશોને આંતરરાષ્ટ્રીય કાયદા અને સંયુક્ત રાષ્ટ્ર ચાર્ટર હેઠળ શાંતિપૂર્ણ રીતે મતભેદોનો ઉકેલ લાવવા હાકલ કરી હતી.
ભારતે આ નિવેદનને પાકિસ્તાન દ્વારા પ્રાયોજિત પ્રચાર ગણાવ્યો અને સ્પષ્ટ કર્યું કે દેશ તેની સાર્વભૌમત્વ અને સુરક્ષા સાથે કોઈ સમાધાન કરશે નહીં. આના થોડા કલાકો પછી, ભારતે મંગળવારે રાત્રે પાકિસ્તાનમાં આતંકવાદી ઠેકાણાઓ પર નિર્ણાયક લશ્કરી કાર્યવાહી કરી, જેને આતંકવાદ સામે મજબૂત પ્રતિક્રિયા માનવામાં આવી રહી છે.
