SCO meeting 2025: ચીનમાં મોટી રાજદ્વારી બેઠક: ભારત-પાકિસ્તાનના સંરક્ષણ પ્રધાનો સામસામે
SCO meeting 2025: શાંઘાઈ સહયોગ સંગઠન (SCO)ની મહત્વપૂર્ણ સમિટ 25-26 જૂને ચીનના કિંગદાઓ શહેરમાં યોજાઈ રહી છે. આ બેઠકમાં ભારત, પાકિસ્તાન, ચીન, રશિયા, ઈરાન સહિત કુલ 10 સભ્ય દેશોના સંરક્ષણ પ્રધાનો અને રાષ્ટ્રીય સુરક્ષા સલાહકારો (NSAs) હાજર રહેશે. ખાસ વાત એ છે કે, ઓપરેશન સિંદૂર બાદ પહેલીવાર ભારત અને પાકિસ્તાનના ટોચના રક્ષા અને સુરક્ષા અધિકારીઓ સામસામે બેસશે.
ભારત-પાકિસ્તાન: તણાવ વચ્ચે સહભાગિતા
ભારત તરફથી સંરક્ષણ પ્રધાન રાજનાથ સિંહ અને રાષ્ટ્રીય સુરક્ષા સલાહકાર અજિત ડોભાલ ચીન પહોંચી ગયા છે. જ્યારે પાકિસ્તાન તરફથી ખ્વાજા આસિફ અને અસીમ મલિક પણ સમિટમાં ભાગ લેશે. હજુ સુધી ભારત અને પાકિસ્તાન વચ્ચે કોઈ દ્વિપક્ષીય બેઠક નિશ્ચિત નથી. ભારતે સ્પષ્ટ કર્યું છે કે આતંકવાદ અને પાકિસ્તાન અધિકૃત કાશ્મીર (PoK)ના મુદ્દાઓ ઉકેલાયા વગર કોઈ પણ પ્રકારની સીધી ચર્ચા શક્ય નથી.
ઓપરેશન સિંદૂર પછીનો પહેલો મોકો
ઓપરેશન સિંદૂર પછી બંને દેશના રક્ષા અધિકારીઓ અને NSAs માટે આ પહેલીવાર છે જ્યારે તેઓ એક જ આંતરરાષ્ટ્રીય મંચ પર મળવા જઈ રહ્યા છે. અનુમાન છે કે ભારત આ બેઠકમાં આતંકવાદના મુદ્દે પાકિસ્તાન સામે સખત વલણ અપનાવશે.
ભારતનો સ્પષ્ટ સંદેશ: “આતંકવાદ સાથે વ્યવહાર નહીં”
પ્રધાનમંત્રી નરેન્દ્ર મોદી, સંરક્ષણ મંત્રી રાજનાથ સિંહ અને વિદેશ મંત્રી એસ. જયશંકર વારંવાર કહી ચૂક્યા છે કે “વેપાર અને આતંકવાદ એકસાથે ચાલી શકે નહીં.” ભારતે લશ્કર-એ-તૈયબા, જૈશ-એ-મોહમ્મદ અને હિઝબુલ મુજાહિદ્દીન જેવા આતંકવાદી જૂથોને આશ્રય આપવા બદલ પાકિસ્તાન વિરુદ્ધ આંતરરાષ્ટ્રીય મંચો પર વારંવાર પુરાવા રજૂ કર્યા છે.
SCO – એક મહત્વપૂર્ણ મંચ
SCOની સ્થાપના 2001માં થઈ હતી. ભારત 2017થી તેની સભ્યતા ધરાવે છે. આ મંચ રાષ્ટ્રીય સુરક્ષા, આતંકવાદ વિરોધ, અને આર્થિક સહયોગ જેવા મુદ્દાઓ પર ચર્ચા માટે મહત્વપૂર્ણ બની ગયો છે. ગયા વર્ષે નવી દિલ્હીમાં યોજાયેલી SCO સમિટમાં પાકિસ્તાનના સંરક્ષણ પ્રધાન વર્ચ્યુઅલ રીતે જોડાયા હતા.
SCO સમિટ 2025 ફક્ત એક પારિવારિક મેળાવડો નથી, પરંતુ એક એવું મંચ બની શકે છે જ્યાં આતંકવાદ, પ્રાદેશિક સુરક્ષા અને ભાવિ રાજકીય દિશા નક્કી કરવામાં આવશે. જો ભારત આતંકવાદ સામે તેની સામાન્ય કડક રણનીતિ અપનાવે છે, તો શક્ય છે કે આ બેઠક પાકિસ્તાન માટે વધુ કડક સાબિત થાય.
