IND vs PAK મેચના બહિષ્કાર મુદ્દે PCB પર શ્રીલંકા બોર્ડનું દબાણ, પત્ર લખી 2009ના આતંકી હુમલાનો કર્યો ઉલ્લેખ
T20 વર્લ્ડ કપ 2026 શરૂ થવાને માત્ર એક દિવસ બાકી છે ત્યારે પાકિસ્તાન માટે મુશ્કેલીઓ સતત વધતી જઈ રહી છે. 7 ફેબ્રુઆરીથી શરૂ થનારી આ મહામુકાબલાની શરૂઆત પહેલાં જ ભારત અને પાકિસ્તાન વચ્ચેની હાઈ-વોલ્ટેજ મેચને લઈને મોટો વિવાદ ઉભો થયો છે. 15 ફેબ્રુઆરીએ રમાનારી ભારત-પાકિસ્તાન મેચમાંથી પાકિસ્તાનએ બહિષ્કાર કરવાનો નિર્ણય લીધો છે, જેના કારણે ટૂર્નામેન્ટના આયોજન પર પ્રશ્નચિહ્ન ઊભું થયું છે.
આ મામલે હવે શ્રીલંકા ક્રિકેટ બોર્ડ (SLC) પણ ખુલ્લેઆમ મેદાનમાં આવી ગયું છે. શ્રીલંકા ક્રિકેટ બોર્ડે પાકિસ્તાન ક્રિકેટ બોર્ડ (PCB)ને બે પાનાનો સત્તાવાર પત્ર લખીને ભારત સામેની મેચ રમવાનો નિર્ણય ફરી વિચારવા અપીલ કરી છે. આ પત્રમાં શ્રીલંકાએ 2009ના આતંકી હુમલાનો ઉલ્લેખ કરીને પાકિસ્તાનને તેની જૂની મદદ યાદ અપાવી છે.
શ્રીલંકા ક્રિકેટ બોર્ડે PCBને શું લખ્યું પત્રમાં?
શ્રીલંકા ક્રિકેટ બોર્ડે પોતાના પત્રમાં સ્પષ્ટ શબ્દોમાં લખ્યું છે કે શ્રીલંકા ICC મેન્સ T20 વર્લ્ડ કપ 2026ને લઈને અત્યંત ઉત્સાહિત છે, ખાસ કરીને તે મેચો માટે જે શ્રીલંકામાં યોજાવાની છે. બોર્ડે જણાવ્યું કે ભારત-પાકિસ્તાન મેચ સહિત તમામ મુકાબલાઓ માટે વ્યાવસાયિક, ઓપરેશનલ, લોજિસ્ટિક્સ અને સુરક્ષા સંબંધિત તમામ તૈયારીઓ પૂર્ણ કરી દેવામાં આવી છે.
પત્રમાં આગળ લખવામાં આવ્યું છે કે ભારત-પાકિસ્તાન મેચ માટેના ટિકિટ્સનું વેચાણ પહેલેથી જ શરૂ થઈ ચૂક્યું છે અને ચાહકો તરફથી જબરદસ્ત પ્રતિસાદ મળી રહ્યો છે. જો પાકિસ્તાન આ મેચ નહીં રમે તો શ્રીલંકાને ભારે નાણાકીય નુકસાન સહન કરવું પડશે.
મેચ ન રમાય તો શ્રીલંકાને ભારે નુકસાનની ચેતવણી
શ્રીલંકા ક્રિકેટ બોર્ડે PCBને ચેતવણી આપતા કહ્યું છે કે જો ભારત-પાકિસ્તાન જેવી મોટી મેચ રદ થાય છે, તો તેની અસર માત્ર ક્રિકેટ પૂરતી સીમિત નહીં રહે. આ નિર્ણયથી શ્રીલંકાના અર્થતંત્ર, પ્રવાસન ઉદ્યોગ અને દેશની વૈશ્વિક પ્રતિષ્ઠા પર પણ ગંભીર અસર પડશે.
બોર્ડે સ્પષ્ટ કર્યું છે કે ભારત-પાકિસ્તાન મેચ T20 વર્લ્ડ કપની સૌથી મોટી આકર્ષણ હોય છે અને તેનાથી સ્થાનિક હોટેલ ઉદ્યોગ, પરિવહન, પ્રવાસન અને અન્ય વ્યવસાયો સીધા જોડાયેલા છે. આવી મેચ ન થવાથી શ્રીલંકાને કરોડો રૂપિયાનું નુકસાન થવાની શક્યતા છે.
2009ના આતંકી હુમલાનો ઉલ્લેખ કરી પાકિસ્તાનને યાદ અપાવ્યું જૂનું સહયોગ
પત્રમાં સૌથી સંવેદનશીલ મુદ્દો 2009ના આતંકી હુમલાનો ઉલ્લેખ છે. શ્રીલંકા ક્રિકેટ બોર્ડે યાદ અપાવ્યું કે જ્યારે 2009માં લાહોરમાં શ્રીલંકાની ટીમ પર આતંકી હુમલો થયો હતો, ત્યારે પરિસ્થિતિ અત્યંત જોખમી અને સંવેદનશીલ હતી. તેમ છતાં, શ્રીલંકાએ પાકિસ્તાન સાથે ક્રિકેટ સંબંધો જાળવી રાખ્યા હતા.
બોર્ડે લખ્યું કે જ્યારે અન્ય દેશોની ટીમો સુરક્ષા કારણોસર પાકિસ્તાન પ્રવાસે જવા તૈયાર નહોતી, ત્યારે શ્રીલંકાએ પરસ્પર સન્માન અને ક્રિકેટ ભાવનાને ધ્યાનમાં રાખીને પાકિસ્તાન સાથે સહકાર આપ્યો હતો. આ નિર્ણય બંને બોર્ડ વચ્ચેના વિશ્વાસ અને મિત્રતાનું પ્રતીક હતો.
PCBને નિર્ણય પુનર્વિચાર કરવા વિનંતી
શ્રીલંકા ક્રિકેટ બોર્ડે અંતમાં પાકિસ્તાન ક્રિકેટ બોર્ડને અપીલ કરી છે કે તે ભારત સામેની મેચના બહિષ્કાર અંગે ફરી વિચાર કરે. બોર્ડે જણાવ્યું કે આ નિર્ણય માત્ર એક મેચ પૂરતો નથી, પરંતુ સમગ્ર ટૂર્નામેન્ટ, યજમાન દેશ અને ક્રિકેટ જગત પર તેની ઊંડી અસર પડશે.
હવે જોવાનું રહેશે કે PCB શ્રીલંકા બોર્ડની આ અપીલ અને ચેતવણીને કેટલું ગંભીરતાથી લે છે. T20 વર્લ્ડ કપ શરૂ થવાના એક દિવસ પહેલા ઊભો થયેલો આ વિવાદ ટૂર્નામેન્ટની શરુઆત પર છાયા પાડી રહ્યો છે.
