દિલ્હી લાલ કિલ્લા બ્લાસ્ટ પાછળ જૈશ-એ-મોહમ્મદનો હાથ, UN ના રિપોર્ટે પાકિસ્તાનની પોલ ખોલી
સંયુક્ત રાષ્ટ્ર (UN) ના તાજેતરના અહેવાલે ભારતના એ દાવાઓની પુષ્ટિ કરી છે કે ગયા વર્ષે ૧૦ નવેમ્બરના રોજ દિલ્હીના લાલ કિલ્લા પાસે થયેલા ભીષણ કાર ધડાકા પાછળ પાકિસ્તાન સ્થિત આતંકી સંગઠન જૈશ-એ-મોહમ્મદ (JeM) નો હાથ હતો. યુએનની એનાલિટિકલ સપોર્ટ એન્ડ સેંક્શન્સ મોનિટરિંગ ટીમની ૩૭મી રિપોર્ટમાં આ ખુલાસો કરવામાં આવ્યો છે કે જૈશે આ હુમલાની જવાબદારી સ્વીકારી હતી, જેમાં ૧૫ લોકોના મોત થયા હતા.
UN રિપોર્ટમાં મોટો ખુલાસો: ‘મહિલા વિંગ’ની રચના
યુએનના અહેવાલ મુજબ, જૈશ-એ-મોહમ્મદના વડા અને વૈશ્વિક આતંકવાદી મસૂદ અઝહરે આતંકવાદી પ્રવૃત્તિઓમાં સહાયતા પૂરી પાડવા માટે ‘જમાત-ઉલ-મુમિનાત’ નામની એક સમર્પિત મહિલા વિંગની રચના કરી છે. જોકે પાકિસ્તાને આંતરરાષ્ટ્રીય મંચ પર આ દાવાઓને ફગાવી દેતા જૈશને એક ‘નિષ્ક્રિય’ (defunct) સંગઠન ગણાવ્યું છે, પરંતુ ભારત અને અન્ય સભ્ય દેશોના પુરાવાઓએ પાકિસ્તાનના આ જૂઠાણાને બેનકાબ કરી દીધું છે.
શું હતો લાલ કિલ્લા બ્લાસ્ટ કાંડ?
૧૦ નવેમ્બર ૨૦૨૫ની સાંજે લાલ કિલ્લા મેટ્રો સ્ટેશન પાસે એક સફેદ હ્યુન્ડાઈ i20 કારમાં જોરદાર ધડાકો થયો હતો. પ્રાથમિક તપાસમાં તેને ‘ફિદાયીન’ (આત્મઘાતી) હુમલો ગણાવવામાં આવ્યો હતો. તપાસ એજન્સીઓના જણાવ્યા અનુસાર, હુમલાખોરે ત્યારે વિસ્ફોટ કરવાનો નિર્ણય લીધો જ્યારે તેને ખબર પડી કે ફરીદાબાદમાં તેના આતંકી મોડ્યુલનો પર્દાફાશ થઈ ગયો છે.
‘ડોક્ટર્સ મોડ્યુલ’ અને મુખ્ય કાવતરાખોરો
આ હુમલાની સૌથી ચોંકાવનારી બાબત એ હતી કે તેની પાછળ ઉચ્ચ શિક્ષિત વ્યાવસાયિકોનો હાથ હતો, જેને ‘ડોક્ટર્સ મોડ્યુલ’ કહેવામાં આવી રહ્યું છે:
- ડો. ઉમર નબી: આત્મઘાતી હુમલાખોર અને અલ-ફલાહ યુનિવર્સિટી, ફરીદાબાદમાં આસિસ્ટન્ટ પ્રોફેસર.
- ડો. શાહીન શાહિદ: જૈશની મહિલા વિંગ અને ભરતી નેટવર્કને ભારતમાં સ્થાપિત કરનાર મુખ્ય આરોપી.
- ડો. આદિલ અહેમદ રાથર: મુખ્ય હેન્ડલર, જેણે પાકિસ્તાનમાં બેઠેલા આકાઓ અને સ્થાનિક નેટવર્ક વચ્ચે સંકલન સાધ્યું હતું.
- ડો. મુઝમ્મિલ: મોડ્યુલનો અન્ય એક મુખ્ય સભ્ય, જેની ધરપકડ થઈ ચૂકી છે.
સુરક્ષા દળોએ ફરીદાબાદના એક ભાડાના રૂમમાંથી ૩૬૦ કિલોગ્રામ એમોનિયમ નાઈટ્રેટ અને મોટી માત્રામાં હથિયારો જપ્ત કર્યા હતા.
ભારતની UNSC માં કડક ચેતવણી
આ ઘટનાના થોડા કલાકો બાદ જ ભારતે સંયુક્ત રાષ્ટ્ર સુરક્ષા પરિષદ (UNSC) માં સીમા પારથી થતા આતંકવાદ પર પોતાની કડક આપત્તિ નોંધાવી હતી. ભારતના કાયમી પ્રતિનિધિ, રાજદૂત પર્વતનેની હરીશે સ્પષ્ટ કર્યું કે આતંકવાદી જૂથો બાહ્ય સમર્થન અને નાણાકીય સહાય વિના કામ કરી શકતા નથી. ભારતે માંગ કરી હતી કે હથિયારોના ગેરકાયદે વેપાર અને આતંકી જૂથોને મળતા સમર્થનને રોકવા માટે આંતરરાષ્ટ્રીય સહયોગને મજબૂત કરવામાં આવે.
પાકિસ્તાનની બેવડી ચાલ
એક તરફ જ્યાં પાકિસ્તાન અધિકૃત કાશ્મીર (PoK) ના પૂર્વ નેતા અનવારુલ હકે જાહેરમાં આ હુમલાની ઉજવણી કરતા તેને પોતાના ‘બહાદુર માણસો’નું કામ ગણાવ્યું હતું, તો બીજી તરફ ઈસ્લામાબાદ આંતરરાષ્ટ્રીય સ્તરે આ જૂથોથી પલ્લો ઝાટકતું રહ્યું છે. નેશનલ ઇન્વેસ્ટિગેશન એજન્સી (NIA) હાલમાં આ મામલાની ઊંડી તપાસ કરી રહી છે અને અનેક રાજ્યોમાં દરોડા પાડવાની કાર્યવાહી ચાલુ છે.
