ટ્રમ્પની અધ્યક્ષતામાં બોર્ડ ઓફ પીસની રચના અને અબજો ડોલરનું ભંડોળ.
અમેરિકી રાષ્ટ્રપતિ ડોનાલ્ડ ટ્રમ્પે આજે વોશિંગ્ટનમાં એક ભવ્ય કાર્યક્રમ દરમિયાન ‘બોર્ડ ઓફ પીસ’ (Board of Peace) ના નિર્માણની જાહેરાત કરી છે. આ સંસ્થાનો ઉદ્દેશ્ય મધ્ય પૂર્વમાં લાંબા સમયથી ચાલી રહેલા સંઘર્ષોનો અંત લાવી સ્થિરતા સ્થાપિત કરવાનો છે. પરંતુ આ આંતરરાષ્ટ્રીય મંચ પર ટ્રમ્પે ફરી એકવાર સાબિત કરી દીધું કે તેઓ રાજદ્વારી ગંભીરતા વચ્ચે પણ હળવી પળો સર્જવામાં માહેર છે.
“મને સ્ત્રીઓ ગમે છે…” ટ્રમ્પની રમૂજી ટિપ્પણી
કાર્યક્રમ દરમિયાન જ્યારે પેરાગ્વેના ૪૭ વર્ષીય યુવા અને પ્રભાવશાળી રાષ્ટ્રપતિ સેન્ટિયાગો પેના મંચ પર આવ્યા, ત્યારે ટ્રમ્પે તેમનું સ્વાગત અનોખી રીતે કર્યું. ટ્રમ્પે પેનાની દેખાવડી પ્રતિભા તરફ ઈશારો કરતા મજાકમાં કહ્યું, “યુવાન અને સુંદર રહેવું હંમેશા સારું છે. તેનો અર્થ એ નથી કે મારે તમને પસંદ કરવા જોઈએ. મને આવા યુવાન, સુંદર પુરુષો પસંદ નથી. મને સ્ત્રીઓ ગમે છે. મને પુરુષોમાં રસ નથી.”
ટ્રમ્પની આ ટિપ્પણી સાંભળીને આખું સભાખંડ હાસ્યથી ગુંજી ઉઠ્યું હતું. સેન્ટિયાગો પેના, જેઓ પોતે એક અર્થશાસ્ત્રી અને ભૂતપૂર્વ નાણામંત્રી છે, તેમણે પણ આ મજાકને ખેલદિલીથી સ્વીકારી હતી. ઉલ્લેખનીય છે કે પેના ઓગસ્ટ ૨૦૨૩માં પેરાગ્વેના સૌથી યુવા લોકશાહી રાષ્ટ્રપતિ તરીકે ચૂંટાયા હતા.
ગાઝાના પુનર્નિર્માણ માટે ૧૦ બિલિયન ડોલરની જાહેરાત
મજાક-મસ્તી સિવાય આ કાર્યક્રમનો મુખ્ય એજન્ડા ગાઝા પટ્ટીનું પુનર્નિર્માણ હતો. ટ્રમ્પે જાહેરાત કરી કે અમેરિકા આ પ્રદેશની સ્થિરતા માટે ૧૦ બિલિયન ડોલર (આશરે ૮૩,૦૦૦ કરોડ રૂપિયાથી વધુ) નું યોગદાન આપશે. આ રકમનો ઉપયોગ યુદ્ધમાં તબાહ થયેલા ઈન્ફ્રાસ્ટ્રક્ચરને ફરીથી બેઠું કરવા માટે કરવામાં આવશે.
વ્હાઇટ હાઉસના પ્રેસ સેક્રેટરી કેરોલિન લેવિટે માહિતી આપી હતી કે આ નેક કામમાં કતાર, સાઉદી અરેબિયા અને સંયુક્ત આરબ અમીરાત (UAE) એ પણ ૧-૧ બિલિયન ડોલર આપવાનું વચન આપ્યું છે. અત્યાર સુધીમાં કુલ ૬.૫ બિલિયન ડોલરથી વધુના આંતરરાષ્ટ્રીય વચનો મળી ચૂક્યા છે.
શું છે આ ‘બોર્ડ ઓફ પીસ’?
ટ્રમ્પ વહીવટીતંત્રે ‘યુનાઇટેડ સ્ટેટ્સ ઇન્સ્ટિટ્યૂટ ઓફ પીસ’ ના મુખ્યાલયને રિ-ડિઝાઇન કરીને આ નવી સંસ્થા બનાવી છે. આ સંસ્થાની વિશેષતા એ છે કે:
રાષ્ટ્રપતિ પાસે આ સંસ્થા પર વીટો પાવર રહેશે.
ડોનાલ્ડ ટ્રમ્પ પ્રમુખપદ છોડ્યા પછી પણ આ સંસ્થાના વડા રહી શકે છે, જે તેમને નિવૃત્તિ પછી પણ વૈશ્વિક પ્રભાવ આપશે.
કાયમી સભ્ય બનવા માટે કોઈપણ દેશે ૨ વર્ષમાં ૧ બિલિયન ડોલરનું યોગદાન આપવું પડશે.
આગામી પગલાં અને શાંતિ કરાર
આ પહેલ ઇઝરાયલ અને હમાસ વચ્ચે ઇજિપ્ત અને કતારની મધ્યસ્થીથી થયેલા યુદ્ધવિરામ બાદ લેવામાં આવી છે. આ યોજનાના આગામી તબક્કામાં હમાસના શસ્ત્રો નિષ્ક્રિય કરવા અને પ્રદેશમાં કાયમી શાંતિ સ્થાપવા માટે કડક જોગવાઈઓ રાખવામાં આવી છે.
ટ્રમ્પની આ જાહેરાત મધ્ય પૂર્વમાં અમેરિકાના વધતા પ્રભુત્વ અને નવી વિદેશ નીતિનો સંકેત આપે છે. હવે જોવાનું એ રહેશે કે આ ‘બોર્ડ ઓફ પીસ’ ખરેખર ગાઝામાં શાંતિ લાવવામાં કેટલી સફળ રહે છે.
