BCCI આ દિવસે IPL 2026 નું શેડ્યૂલ જાહેર કરશે!
ભારત અને શ્રીલંકા દ્વારા આયોજિત T20 વર્લ્ડ કપ ૨૦૨૬ તેના અંતિમ તબક્કા તરફ આગળ વધી રહ્યો છે, ત્યારે ભારતીય ક્રિકેટ કંટ્રોલ બોર્ડ (BCCI) એ હવે IPL ૨૦૨૬ ના આયોજન માટે કમર કસી લીધી છે. સૂત્રોના જણાવ્યા અનુસાર, ઇન્ડિયન પ્રીમિયર લીગની ૧૯મી સીઝનનું શિડ્યુલ આગામી ૬ કે ૭ માર્ચ ના રોજ જાહેર કરવામાં આવી શકે છે. આ વખતે ફેન્સ માટે સૌથી મોટા સમાચાર એ છે કે ટૂર્નામેન્ટની પ્રથમ મેચ અને ભવ્ય ફાઈનલ બંને બેંગલુરુના ઐતિહાસિક એમ. ચિન્નાસ્વામી સ્ટેડિયમમાં રમાવાની શક્યતા છે.
બે તબક્કામાં કેમ જાહેર થશે શિડ્યુલ?
BCCI આ વખતે IPL ના સમયપત્રકને બે ભાગમાં વહેંચી શકે છે. આ નિર્ણય પાછળનું મુખ્ય કારણ ભારતના ત્રણ મહત્વના રાજ્યો – તમિલનાડુ, પશ્ચિમ બંગાળ અને આસામ માં યોજાનારી વિધાનસભા ચૂંટણીઓ છે. ચૂંટણી દરમિયાન સુરક્ષા વ્યવસ્થા જાળવવી પડકારજનક હોવાથી, BCCI પ્રથમ તબક્કાનું શિડ્યુલ જાહેર કરશે અને ચૂંટણીની તારીખો સ્પષ્ટ થયા બાદ બીજા તબક્કાના સ્થળો અને સમયની જાહેરાત કરશે. ગવર્નિંગ કાઉન્સિલે પ્રથમ તબક્કાના ડ્રાફ્ટને મંજૂરી આપી દીધી હોવાનું જાણવા મળ્યું છે.
આરસીબીના ગઢમાં થશે પ્રારંભ
ડિફેન્ડિંગ ચેમ્પિયનના હોમ ગ્રાઉન્ડ પર સીઝનની પ્રથમ મેચ રમવાની પરંપરા મુજબ, IPL ૨૦૨૬ નો પ્રારંભ બેંગલુરુમાં થશે. રોયલ ચેલેન્જર્સ બેંગ્લોર (RCB) એ એક નિવેદન દ્વારા પુષ્ટિ કરી છે કે તેઓ તેમની પાંચ હોમ મેચ ચિન્નાસ્વામી સ્ટેડિયમમાં રમશે. વધુમાં, પ્લેઓફની એક મેચ અને ૩૧ મે ના રોજ રમાનારી ફાઈનલ પણ આ જ મેદાન પર આયોજિત થશે. ટૂર્નામેન્ટનો પ્રારંભ ૨૮ અથવા ૨૯ માર્ચથી થવાની ધારણા છે.
વિદેશી ખેલાડીઓ અને પ્રેક્ટિસ સત્રો
હાલમાં ચાલી રહેલા T20 વર્લ્ડ કપ ૨૦૨૬ ના સમાપન બાદ તરત જ તમામ વિદેશી ખેલાડીઓના નો-ઓબ્જેક્શન સર્ટિફિકેટ (NOC) સંબંધિત ફ્રેન્ચાઇઝીઓને સોંપવામાં આવશે. BCCI એ તમામ ૧૦ ટીમોને જાણ કરી છે કે પ્રેક્ટિસ સત્રો અને કેમ્પ અંગેની વિગતવાર માહિતી આવતા અઠવાડિયે આપવામાં આવશે. વર્લ્ડ કપમાં રમી રહેલા સ્ટાર ખેલાડીઓ સીધા જ પોતાની IPL ટીમ સાથે જોડાશે, જેના કારણે આ વખતે પ્રેક્ટિસ માટે ઓછો સમય મળશે, પરંતુ રોમાંચ બમણો રહેશે.
સ્ટેડિયમ અને સુરક્ષા વ્યવસ્થા
ચૂંટણીને કારણે કોલકાતા (ઈડન ગાર્ડન્સ) અને ચેન્નાઈ (ચેપોક) જેવા મેદાન પરની મેચોના સમયમાં ફેરફાર થઈ શકે છે. BCCI ના અધિકારીઓએ જણાવ્યું છે કે તેઓ સ્થાનિક સત્તાવાળાઓ સાથે સતત સંપર્કમાં છે જેથી ખેલાડીઓ અને પ્રેક્ષકોની સુરક્ષા સાથે કોઈ બાંધછોડ ન થાય. ટૂંક સમયમાં જ બોર્ડ સત્તાવાર પ્રેસ કોન્ફરન્સ દ્વારા સંપૂર્ણ ચિત્ર સ્પષ્ટ કરશે.
૪ માર્ચ ૨૦૨૬ ના રોજ આ સમાચાર આવતા જ સોશિયલ મીડિયા પર #IPL2026 ટ્રેન્ડ થવા લાગ્યું છે. ક્રિકેટ રસિયાઓ હવે માત્ર સત્તાવાર શિડ્યુલની રાહ જોઈ રહ્યા છે જેથી તેઓ પોતાના મનપસંદ ખેલાડીઓને મેદાન પર ચોગ્ગા-છગ્ગા ફટકારતા જોઈ શકે.
